ارمەنيا ۇكىمەتىنىڭ باسشىسى نيكولاي پاشينيان "زۆارتنوتس" اۋەجايىنا جەتىپ، ماسكەۋگە اتتاندى. بۇل تۋرالى نارازىلىق بىلدىرۋشىلەردىڭ ءبىرى مالىمدەدى،دەپ حابارلايدى «ادىرنا» ۇلتتىق پورتالى سپۋتنيك-ارمەنيا سايتىنا سىلتەمە جاساپ. "ەگەر پرەمەر-مينيستر ماسكەۋدە قانداي دا ءبىر قۇجاتتارعا قول قويسا، ارمەنيانىڭ اۋە كەڭىستىگى ول ءۇشىن جابىلادى" دەپ ەسكەرتۋ جاسادى نارازى توپ.
پاشينياندى مساكەۋدەگى كەزدەسۋگە جىبەرمەيمىز دەگەن نارازى توپ بۇگىن ونىڭ جولىن جاپقان بولاتىن. اۋەجايعا باراتىن جولدى كەس-كەستەگەن ارميان وپپوزيتسيونەرلەرى جولدى اشپاس بۇرىن، پاشينيانعا ۇلكەن ەسكەرتۋ جاسادى. "نيكول پاشينيان - زاڭسىز كوشباسشى، ول ارمەنيانى بىلدىرمەيدى، ال ەرتەڭ ول قول قويعان قۇجاتتار ەشقانداي زاڭدى كۇشكە يە بولمايدى", - دەيدى نارازىلىق بىلدىرۋشىلەردىڭ بەلسەندىسى.
وسىدان كەيىن وپپوزيتسيونەرلەر بۇل نارازىلىقتى اياقتاپ، زۆارتنوتس اۋەجايىنا اپاراتىن جولدى اشاتىنىن ايتتى.
ەستەرىڭىزگە سالا كەتەيىك، وپپوزيتسيا 11 قاڭتاردا تاڭەرتەڭ ارمەنيا ۇكىمەتىنىڭ باسشىسىنا ماسكەۋگە بارۋعا مۇمكىندىك بەرمەۋ ماقساتىندا اكتسيا ۇيىمداستىردى، وندا ول رەسەي مەن ءازىربايجان پرەزيدەنتتەرى ۆلاديمير پۋتين مەن يلحام اليەۆتىڭ قاتىسۋىمەن ۇشجاقتى كەلىسسوزدەر جۇرگىزۋگە نيەتتى.
تاراپتار قاراباق توڭىرەگىندەگى جاعدايدى، سونداي-اق تۇتقىنداردى قايتارۋ جانە كوممۋنيكاتسيالاردى اشۋ ماسەلەسىن تالقىلايدى. پاشينياننىڭ قارسىلاستارى كەزدەسۋدە ەلدىڭ مۇددەلەرىنە نۇقسان كەلتىرەتىن قۇجاتقا قول قويىلادى دەپ سانايدى.
پاشينياننىڭ ەلىنە قايتا ورالۋى وسى كەزدەسۋدە قابىلدانعان كەلىسىمشارتتارعا قول قويۋىمەن انىقتالاتىن سياقتى. ويتكەنى ارميان وپپوزيتسياسى ونى شىعارىپ سالىپ تۇرىپ، قاتتى ەسكەرتتى: "ەگەر پاشينيان ەلىمىزدىڭ اتىنان قانداي دا ءبىر قۇجاتقا قول قويسا، اۋە جولدارى جابىلادى",- دەدى. پاشينيان "قايتپاس ساپارعا" كەتكەندەي مە، قالاي؟ نە بولسا دا، ءالىپتىڭ ارتىن باعايىق.
