رەسەي پرەزيدەنتىنىڭ ءباسپاسوز حاتشىسى دميتري پەسكوۆ ماسكەۋ ارمەنيانى ۇجىمدىق قاۋىپسىزدىك تۋرالى شارت ۇيىمىنىڭ مۇشەسى رەتىندە بۇرىنعىداي مويىندايتىنىن مالىمدەدى، دەپ حابارلايدى «ادىرنا» ءتىلشىسى.
ونىڭ ايتۋىنشا، ۇقشۇ-عا قاتىسۋ — بۇل ەرەۆاننىڭ دەربەس شەشىمى، الايدا ەلدىڭ ۇيىمنان شىعۋى تۋرالى ءسوز قوزعالماعان.
ء«بىز ارمەنيا ۇيىمنان شىققان جوق دەگەن ۇستانىمدامىز. ال قاتىسۋدى توقتاتۋ نەمەسە قايتا باستاۋ ماسەلەسى بويىنشا ەرەۆان قابىلدايتىن شەشىمدەرگە سۇيەنەمىز»، — دەدى پەسكوۆ ارمەنيا سىرتقى ىستەر ءمينيسترىنىڭ ورىنباسارى ۆاان كوستانياننىڭ مالىمدەمەسىنە پىكىر بىلدىرە وتىرىپ.
بۇعان دەيىن كوستانيان ارمەنيا ۇقشۇ-عا مۇشەلىك تۋرالى سوڭعى شەشىمىن جاريالايتىنىن مالىمدەگەن ەدى.
دميتري پەسكوۆتىڭ ايتۋىنشا، ۇقشۇ ارمەنياعا «ايقىن پايدا» اكەلىپ وتىر جانە بۇل ۇيىم ءوزىنىڭ تيىمدىلىگىن بىرنەشە رەت دالەلدەگەن. ول مۇنداي فورماتتاعى ىنتىماقتاستىق مۇشە مەملەكەتتەردىڭ مۇددەلەرىنە ساي كەلەدى دەپ اتاپ ءوتتى.
ەسكە سالايىق، ارمەنيا پرەمەر-ءمينيسترى نيكول پاشينيان 2024 جىلدىڭ اقپانىندا ەلدىڭ ۇيىمداعى مۇشەلىگىن ۋاقىتشا توقتاتقانىن جاريالاعان ەدى. ال مامىر ايىندا ارمەنيا سىرتقى ىستەر مينيسترلىگى ەرەۆاننىڭ ۇقشۇ جۇمىسىنا قارجىلىق ۇلەسىن توقتاتاتىنىن راستادى. بۇل شەشىمدى ارميان بيلىگى قاراباق سوعىسى كەزىندە ۇيىم تاراپىنان ءتيىستى جاۋاپ بولماعانىمەن ءتۇسىندىردى.
