ءبىلىم مينيسترلىگى سوتتا جاۋاپ بەرە مە؟

2496
Adyrna.kz Telegram

«ۇلتتىق اۋدارما بيۋروسىنىڭ» نەگىزىن قالاۋشى ءارى جەتەكشىسى راۋان كەنجەحانۇلى ەڭبەكتەرىنىڭ اقىسى وتەلمەگەنىن ايتىپ، سوتقا جۇگىنۋگە ءماجبۇر بولعانىن جاريا ەتتى دەپ حابارلايدى «ادىرنا» ۇلتتىق پورتالى اۆتوردىڭ Facebook الەۋمەتتىك جەلىدەگى جازباسىنا سىلتەمە جاساپ.

«قۇرمەتتى قاۋىم! «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى مازمۇندىق جاعىنان اياقتالدى. الەمنىڭ ەڭ جاقسى دەگەن 100 وقۋلىعى قازاق تىلىنە اۋدارىلدى، ارقايسىسى 10 مىڭ دانامەن باسىلىپ، ەلىمىزدىڭ بارلىق جوعارى وقۋ ورىندارىنا جەتكىزىلدى. وقۋلىقتاردىڭ ەلەكتروندى نۇسقالارىن OpenU.kz پورتالىنان ەركىن وقۋعا بولادى. ولاردىڭ نەگىزىندە دايىندالعان 200 ۆيدەو كۋرس تا اتالعان پورتالدا اشىق تۇر.

بۇل جۇمىستىڭ قانداي جاۋاپكەرشىلىكپەن، نەندەي تالاپپەن، قانداي زور ەڭبەك ارقاسىندا ورىندالعانىن جوباعا قاتىسقان جۇزدەگەن ارىپتەسىمىز جاقسى بىلەدى.
«ۇلتتىق اۋدارما بيۋروسى» وسى جۇمىسقا جاۋاپتى ۇيىم رەتىندە مەملەكەت الدىنداعى مىندەتىن تولىق ورىندادى. اۋدارما مەن باسپا ساپاسىنا، كىتاپتاردى جەتكىزۋ مەرزىمىنە قاتىستى بىزگە قويار كىنا جوق.

بۇل — ورتاق جۇمىستىڭ ناتيجەسى، وسى جوباعا اتسالىسقان اۋدارماشىلار، عالىمدار مەن رەداكتور ماماندار، كوررەكتورلار مەن بەتتەۋشىلەردىڭ، بىزبەن بىرگە ەڭبەك ەتكەن باسپاحانالار مەن ستۋديا ماماندارىنىڭ قاجىرلى ەڭبەگىنىڭ جەمىسى. ول ءۇشىن بارلىق ارىپتەستەرىمىزگە العىس ايتامىز، ريزاشىلىق بىلدىرەمىز.

الايدا، اراداعى شارتتىڭ تالاپتارىنا سايكەس تولىق ورىندالىپ، تاپسىرىلعان جۇمىستى ءبىلىم جانە عىلىم مينيسترلىگى قابىلداپ المادى. جۇمىستىڭ اقىسى تولەنبەدى. وسىعان وراي، «ۇلتتىق اۋدارما بيۋروسى» شارتتا كورسەتىلگەن زاڭدى تالاپتارىن العا تارتىپ، سوتقا جۇگىندى.

«ۇلتتىق اۋدارما بيۋروسى» ونداعان شەتەلدىك اۆتور مەن قۇقىق يەلەنۋشى باسپالار، بىرنەشە ءىرى باسپاحانا جانە بارىنەن بۇرىن جۇزدەگەن اۋدارماشى مەن رەداكتورلارعا قاراجات بەرەشەك. العاشقى كەزەكتە جۇمىسقا اتسالىسقان ماماندار الدىنداعى قارىز تولەنەدى. ونىڭ نەگىزگى بولىگى وتەلدى. ەلىمىزدەگى زاڭنىڭ بيلىگى، سوتتىڭ ادالدىعى راس بولسا، ءسوزىمىز راستالىپ، ەڭبەگىمىز وتەلۋى ءتيىس. وعان كامىل سەنەمىز.

بۇكىل قوعام كوز تىككەن ۇلكەن جۇمىس و باستان كوپشىلىكتىڭ نازارىندا. قازىر دە الەۋمەتتىك جەلىدە ءتۇرلى تالقى ءجۇرىپ جاتىر. شىن مانىندە انىق-قانىعىن بىلگىسى كەلەتىن ادامعا ۇعىنىقتى جاۋاپتار الدەقاشان بەرىلدى. جۇمىستىڭ ەسەپ-قيسابى تالاي رەت قارالىپ، تەكسەرىلدى. ءتارتىپ پەن زاڭنىڭ بۇزىلماعانى دالەلدەنگەن. بۇل جولى دا سولاي بولاتىنىنا سەنىمدىمىز. سوندىقتان سابىر ساقتاپ، اق-قاراسىن اجىراتۋدى سوتقا تاپسىردىق.

وسىعان وراي، «ۇلتتىق اۋدارما بيۋروسى» ازىرگە شىعارماشىلىق جۇمىسىن توقتاتىپ، قىزمەتكەرلەرىن قىسقارتۋعا ءماجبۇر. شىعارماشىلىق ۇجىمعا، ەلدىك جوباعا جاناشىر بارشا قاۋىمعا راحمەت ايتامىز!» — دەپ جازدى قوعام قايراتكەرى Facebook پاراقشاسىندا جازدى.

پىكىرلەر