Bilim mınıstrligi sotta jaýap bere me?

2495
Adyrna.kz Telegram

«Ulttyq aýdarma bıýrosynyń» negizin qalaýshy ári jetekshisi Raýan Kenjehanuly eńbekteriniń aqysy ótelmegenin aıtyp, sotqa júginýge májbúr bolǵanyn jarııa etti dep habarlaıdy «Adyrna» ulttyq portaly avtordyń Facebook áleýmettik jelidegi jazbasyna silteme jasap.

«Qurmetti qaýym! «Jańa gýmanıtarlyq bilim. Qazaq tilindegi 100 jańa oqýlyq» jobasy mazmundyq jaǵynan aıaqtaldy. Álemniń eń jaqsy degen 100 oqýlyǵy qazaq tiline aýdaryldy, árqaısysy 10 myń danamen basylyp, elimizdiń barlyq joǵary oqý oryndaryna jetkizildi. Oqýlyqtardyń elektrondy nusqalaryn OpenU.kz portalynan erkin oqýǵa bolady. Olardyń negizinde daıyndalǵan 200 vıdeo kýrs ta atalǵan portalda ashyq tur.

Bul jumystyń qandaı jaýapkershilikpen, nendeı talappen, qandaı zor eńbek arqasynda oryndalǵanyn jobaǵa qatysqan júzdegen áriptesimiz jaqsy biledi.
«Ulttyq aýdarma bıýrosy» osy jumysqa jaýapty uıym retinde memleket aldyndaǵy mindetin tolyq oryndady. Aýdarma men baspa sapasyna, kitaptardy jetkizý merzimine qatysty bizge qoıar kiná joq.

Bul — ortaq jumystyń nátıjesi, osy jobaǵa atsalysqan aýdarmashylar, ǵalymdar men redaktor mamandar, korrektorlar men betteýshilerdiń, bizben birge eńbek etken baspahanalar men stýdııa mamandarynyń qajyrly eńbeginiń jemisi. Ol úshin barlyq áriptesterimizge alǵys aıtamyz, rızashylyq bildiremiz.

Alaıda, aradaǵy sharttyń talaptaryna sáıkes tolyq oryndalyp, tapsyrylǵan jumysty Bilim jáne ǵylym mınıstrligi qabyldap almady. Jumystyń aqysy tólenbedi. Osyǵan oraı, «Ulttyq aýdarma bıýrosy» shartta kórsetilgen zańdy talaptaryn alǵa tartyp, sotqa júgindi.

«Ulttyq aýdarma bıýrosy» ondaǵan sheteldik avtor men quqyq ıelenýshi baspalar, birneshe iri baspahana jáne bárinen buryn júzdegen aýdarmashy men redaktorlarǵa qarajat bereshek. Alǵashqy kezekte jumysqa atsalysqan mamandar aldyndaǵy qaryz tólenedi. Onyń negizgi bóligi óteldi. Elimizdegi zańnyń bıligi, sottyń adaldyǵy ras bolsa, sózimiz rastalyp, eńbegimiz ótelýi tıis. Oǵan kámil senemiz.

Búkil qoǵam kóz tikken úlken jumys o bastan kópshiliktiń nazarynda. Qazir de áleýmettik jelide túrli talqy júrip jatyr. Shyn máninde anyq-qanyǵyn bilgisi keletin adamǵa uǵynyqty jaýaptar áldeqashan berildi. Jumystyń esep-qısaby talaı ret qaralyp, tekserildi. Tártip pen zańnyń buzylmaǵany dáleldengen. Bul joly da solaı bolatynyna senimdimiz. Sondyqtan sabyr saqtap, aq-qarasyn ajyratýdy sotqa tapsyrdyq.

Osyǵan oraı, «Ulttyq aýdarma bıýrosy» ázirge shyǵarmashylyq jumysyn toqtatyp, qyzmetkerlerin qysqartýǵa májbúr. Shyǵarmashylyq ujymǵa, eldik jobaǵa janashyr barsha qaýymǵa rahmet aıtamyz!» — dep jazdy qoǵam qaıratkeri Facebook paraqshasynda jazdy.

Pikirler