«قازاق ەلى» اتتى قازاق مۋلتيپليكاتسياسى تاريحىنداعى تۇڭعىش تاريحي تولىقمەتراجدى انيماتسيالىق ءفيلمى قاراشانىڭ 4-ءى مەن 13-ءى ارالىعىندا بارسەلونادا (يسپانيا) وتەتىن ازيالىق كينو فەستيۆالىنىڭ (Asian Film Festival) نەگىزگى بايقاۋىنا ىرىكتەلىپ الىندى.
انيماتسيالىق كينوتۋىندىنىڭ حالىقارالىق كينوفەستيۆالدەردە كورسەتىلىپ، كەڭىنەن ناسيحاتتالۋ جۇمىستارىن ش.ايمانوۆ اتىنداعى «قازاقفيلم» اق جۇزەگە اسىرادى.
بۇل تۋىندىنى قر مادەنيەت جانە سپورت مينيسترلىگىنىڭ تاپسىرىسى بويىنشا «ساق-دالا» جشس تۇسىرگەن.
رەجيسسەرى: باتىرحان داۋرەنبەكوۆ
ستسەناري اۆتورلارى: ساعادىلدا ۇسىپباليەۆ، باقىتجان كۇلجاباي.
«قازاق ەلى» انيماتسيالىق ءفيلمى بولاشاق حاندار – جانىبەك پەن كەرەيدىڭ بالالىق شاعى مەن ەسەيۋ جىلدارى تۋرالى باياندايدى. مۋلتفيلمدە – ۇلان-عايىر قازاق دالاسى، زاڭعار تاۋلار جانە ۇلى جىبەك جولىنداعى سىعاناق، وتىرار، تاراز جانە تۇركىستان سەكىلدى ەجەلگى قالالار بەينەلەنگەن.
- فيلم حالىقارالىق ارەنادا - سوناۋ يسپانيادا كورسەتىلەتىنىنە قۋانىشتىمىن. بۇل ءمۋلتفيلمدى ءبىز ەڭ بىرىنشىدەن بالالارعا ارناپ جاسادىق. كارتينادا بوستاندىق پەن تاۋەلسىزدىك ءۇشىن كۇرەس جولىندا قازاق ەلىنىڭ باسىن قالاي بىرىكتىرگەندىگى جايلى اڭگىمەلەنەدى.سوندىقتان يسپاندىق كورەرمەندەر دە ەلىمىزدىڭ باي تاريحىمەن تانىساتىن بولادى, - دەدى ءفيلمنىڭ رەجيسسەرى باتىرحان داۋرەنبەكوۆ.
اتالمىش فەستيۆالدە 20 ازيا ەلدەرىنىڭ 80-گە جۋىق فيلمدەرى كورسەتىلەدى. وتاندىق تۋىندىدان باسقا فەستيۆالگە قىتاي، كورەي، يران، فيليپپين، سينگاپۋر، اۋعانىستان، جاڭا زەلانديا، تايلاند، مالايزيا جانە ۆەتنام ەلدەرىنىڭ فيلمدەرى قاتىسادى. ايتا كەتەتىن جايت، فەستيۆال شەڭبەرىندە ش.ايمانوۆ اتىنداعى «قازاقفيلم» اق جارىققا شىعارعان ساتىبالدى نارىمبەتوۆتىڭ «امانات» جانە دوسحان جولجاقسىنوۆتىڭ «قۇنانباي» تاريحي تۋىندىلارى، سونىمەن قاتار اسقار ۇزاباەۆتىڭ «جول» دراماسى مەن مۇرات ماحاننىڭ دەبيۋتتىك «سوت ورىنداۋشىسى» ءفيلمى كورسەتىلەدى.
ەستەرىڭىزگە سالا كەتسەك، جاسالۋىندا 2-D جانە 3D-تەحنولوگيالار پايدالانىلعان «قازاق ەلى» انيماتسيالىق ءفيلمى ۇستىمىزدەگى جىلى مامىر ايىندا كوپشىلىك نازارىنا ۇسىنىلىپ، كينوتەاترلاردان كورسەتىلگەن بولاتىن. ءفيلمنىڭ جارىققا شىعۋىنا اتسالىسقاندار قاتارىندا قر مادەنيەت جانە سپورت ءمينيسترى ارىستانبەك مۇحامەديۇلى، تاريح عىلىمدارىنىڭ دوكتورى جامبىل ارتىقباي جانە بەلگىلى جازۋشى دۋلات يسابەكوۆ تە بار. باس كەيىپكەرلەردى ع.مۇسىرەپوۆ اتىنداعى قازاق مەملەكەتتىك اكادەميالىق بالالار جانە جاسوسپىرىمدەر تەاترىنىڭ، سونداي-اق، ج.شانين اتىنداعى وڭتۇستىك-قازاقستان وبلىستىق قازاق دراما تەاترىنىڭ ارتىستەرى دىبىستادى. ءفيلمنىڭ ساۋندترەكتەرىن نۇرلان ابدۋللين، ساكەن مايعازيەۆ جانە باسقا دا تانىمال قازاقستاندىق انشىلەر ورىندادى.
"ادىرنا"
