شالقار ۇلتتىق ارناسى 1966 جىلدىڭ 1 قاڭتارىندا اقپاراتتى-سازدى شالقار باعدارلاماسى اتاۋىمەن العاش ەفيرگە شىقتى. 1998 جىلى جۇمىسىن ۋاقىتشا توقتاتقانىمەن، 2002 جىلى قايتا اشىلىپ، العاشىندا تەك الماتى قالاسىنا، كەيىننەن ەفير ۋاقىتى ۇلعايىپ، رەسپۋبليكا اۋماعىنا حابار تاراتتى.
شالقار راديوسى - رەسپۋبليكاداعى تەك قانا قازاق تىلىندە ۇلت رۋحانياتىن ۇلىقتايتىن جالعىز ارنا. راديو قازىرگى كەزدە ەل اۋماعىنىڭ 64 پايىزىن قامتيدى.
شالقار ۇلتتىق ارناسىنىڭ باستى ماقساتى - قازاق حالقىنىڭ رۋحاني قۇندىلىقتارىن ناسيحاتتاۋ. العاش اشىلعاندا «ونەرىم-ءومىرىم»، «اتادان قالعان اسىل ءسوز»، «جەتى عاسىر جىرلايدى»، «التىن تامىر» سىندى باعدارلامالار ارقىلى تىڭدارمان جۇرەگىنە جول تاپتى.
راديودا ءار جىلدارى بەلگىلى جۋرناليستەر: م.جانتيكين، ە.ابدىعاپپاروۆ، ت.رساەۆ، ۋ.قىدىرحانوۆ، ە.قاشقىنوۆ، ك.ابدىماۋلەنوۆ، ك.امىربەك، ع.ەسەنساريەۆ، ا.ەڭسەبايۇلى، س. تۇرسىنباەۆ، ت.مومبەكۇلى، ع.يگىسىن، د.يسابەكوۆ، گ.قابلانوۆا، ا.يمانباەۆا، ل.قاپىشەۆالار جانە تالانتتى ديكتورلار: س.جاقانوۆا، و.قالمىرزاەۆ، ۇ.بارماشقىزى جۇمىس ىستەدى.
قازاق ادەبيەتىنىڭ سۇبەلى شىعارمالارىن، ۇلتتىق مۋزىكاسىن، عاسىرلار قويناۋىنان جەتكەن عۇلامالار عيبراتىن كەڭىنەن ناسيحاتتاۋدى ماقسات تۇتقان ارنا «شالقار تاڭى»، «شالقار شاڭىراعىندا، «شالقار كەشى كوڭىلدى»، «ءان دومبىرا»، «التىن قور»، «القيسسا»، «ءسوز كيەسى»، «اعالاردىڭ الاقانى»، «كيەلى قازاقستان»، «كۇي شاشۋ»، «ءداۋىر سازى»، «ادەبيەت الەمى»، «اباي ۇلاعاتى»، «ءداستۇر»، «جاقسىنىڭ جارى» جانە «بەسىگىڭدى تۇزە»، «قوناقجاي الماتى»، «عىلىم كىلتى»، «ساحنا سىرى» سىندى ت.ب. حابارلارىن ۇسىنىپ كەلەدى.
شالقار راديوسى ۇلتتىق ارنا اتىنا ساي 2020 جىلدىڭ 1 قىركۇيەگىنەن باستالعان جاڭا ماۋسىمنان تەك قانا قازاقتىڭ ءداستۇرلى مۋزىكاسى مەن ءتول ونەرىن، ۇلتتىق مادەنيەتى مەن ادەبيەتىن، بابالار مۇراسى - قازاقتىڭ ءانى مەن كۇيىن، ساعىندىرعان رەترو مۋزىكاسىن، وتكەنىمىزدەن سىر شەرتەتىن «التىن قورداعى» اسىل قازىنالارىن ناسيحاتتاۋعا تۇبەگەيلى بەت بۇردى. ياعني، شالقار راديوسىنىڭ كونتەنتى دە، مۋزىكاسى دا تازا ۇلتتىق باعىتقا كوشتى.ەفيردەن بەرىلەتىن مۋزىكالارى: تەك ءداستۇرلى مۋزىكا، حالىق اندەرى، كۇي، جىر، تولعاۋلار، وركەستردە ورىندالعان كۇيلەر، تەرمەلەر، كۇيلەر مەن رەترو ت. ب. ال ارنايى ەسترادالىق مۋزىكاعا ارنالعان باعدارلامادا عانا ەستراداعا وڭدەلگەن حالىق اندەرى مەن قازاقى سيپاتتاعى ەسترادالىق اندەر بەرىلۋدە.
