Shalqar ulttyq arnasy 1966 jyldyń 1 qańtarynda aqparatty-sazdy Shalqar baǵdarlamasy ataýymen alǵash efırge shyqty. 1998 jyly jumysyn ýaqytsha toqtatqanymen, 2002 jyly qaıta ashylyp, alǵashynda tek Almaty qalasyna, keıinnen efır ýaqyty ulǵaıyp, Respýblıka aýmaǵyna habar taratty.
Shalqar radıosy - respýblıkadaǵy tek qana qazaq tilinde ult rýhanııatyn ulyqtaıtyn jalǵyz arna. Radıo qazirgi kezde el aýmaǵynyń 64 paıyzyn qamtıdy.
Shalqar ulttyq arnasynyń basty maqsaty - qazaq halqynyń rýhanı qundylyqtaryn nasıhattaý. Alǵash ashylǵanda «Ónerim-ómirim», «Atadan qalǵan asyl sóz», «Jeti ǵasyr jyrlaıdy», «Altyn tamyr» syndy baǵdarlamalar arqyly tyńdarman júregine jol tapty.
Radıoda ár jyldary belgili jýrnalıster: M.Jantıkın, E.Ábdiǵapparov, T.Rsaev, Ý.Qydyrhanov, E.Qashqynov, K.Ábdimáýlenov, K.Ámirbek, Ǵ.Esensarıev, A.Eńsebaıuly, S. Tursynbaev, T.Mombekuly, Ǵ.Igisin, D.Isabekov, G.Qablanova, A.Imanbaeva, L.Qapyshevalar jáne talantty dıktorlar: S.Jaqanova, O.Qalmyrzaev, U.Barmashqyzy jumys istedi.
Qazaq ádebıetiniń súbeli shyǵarmalaryn, ulttyq mýzykasyn, ǵasyrlar qoınaýynan jetken ǵulamalar ǵıbratyn keńinen nasıhattaýdy maqsat tutqan arna «Shalqar tańy», «Shalqar shańyraǵynda, «Shalqar keshi kóńildi», «Án dombyra», «Altyn qor», «Álqıssa», «Sóz kıesi», «Aǵalardyń alaqany», «Kıeli Qazaqstan», «Kúı shashý», «Dáýir sazy», «Ádebıet álemi», «Abaı ulaǵaty», «Dástúr», «Jaqsynyń jary» jáne «Besigińdi túze», «Qonaqjaı Almaty», «Ǵylym kilti», «Sahna syry» syndy t.b. habarlaryn usynyp keledi.
Shalqar radıosy ulttyq arna atyna saı 2020 jyldyń 1 qyrkúıeginen bastalǵan jańa maýsymnan tek qana qazaqtyń dástúrli mýzykasy men tól ónerin, ulttyq mádenıeti men ádebıetin, babalar murasy - qazaqtyń áni men kúıin, saǵyndyrǵan retro mýzykasyn, ótkenimizden syr shertetin «Altyn qordaǵy» asyl qazynalaryn nasıhattaýǵa túbegeıli bet burdy. Iaǵnı, Shalqar radıosynyń kontenti de, mýzykasy da taza ulttyq baǵytqa kóshti.Efırden beriletin mýzykalary: tek dástúrli mýzyka, halyq ánderi, kúı, jyr, tolǵaýlar, orkestrde oryndalǵan kúıler, termeler, kúıler men retro t. b. Al arnaıy estradalyq mýzykaǵa arnalǵan baǵdarlamada ǵana estradaǵa óńdelgen halyq ánderi men qazaqy sıpattaǵy estradalyq ánder berilýde.
