تاۋەلسىزدىك العالى بەرى قازاقستان اتىنان وليمپيادا ويىندارىنا قاتىسىپ، ەل نامىسىن تۋ ەتىپ، كوك بايراعىمىزدى بيىكتەن جەلبىرەتىپ، سپورتتىڭ بيىك شىڭىنان كورىنگەن سپوتشىلارىمىز جەتەرلىك. سولاردىڭ ءبىرى - قازاقستاندىق جەڭىل اتلەت ولگا شيشيگينا.
سيدنەي وليمپياداسىنىڭ چەمپيونى، قازاقستاننىڭ ەڭبەك سىڭىرگەن سپورت شەبەرى ولگا شيشيگينا - 1968 جىلى الماتى قالاسىندا دۇنيەگە كەلگەن. جەڭىل اتلەتيكامەن 1978 جىلدان بەرى شۇعىلدانادى. 1995 جىلى گەتەبورگتا وتكەن الەم چەمپيوناتىندا كۇمىس مەدال، 2000 جىلى سيدنەي وليمپياداسىنىڭ چەمپيونى، 2001 جىلى ەدمونتوندا قولا جۇلدەگە يە بولدى. وسى جارىستان سوڭ سپورتشى جاراقات الىپ، ۇلكەن سپورتپەن قوشتاستى. قازاقستان رەسپۋبليكاسىنىڭ پارلامەنتى ءماجىلىسىنىڭ دەپۋتاتى. و.شيشيگينا «قۇرمەت»، I دارەجەلى «بارىس»، II دارەجەلى «دوستىق» وردەندەرى مەن «دارىن» مەملەكەتتىك جاستار سىيلىعىنىڭ يەگەرى.
جاقىندا وليمپيادا چەمپيونى ولگا شيشيگينا ءوزىنىڭ سپورتتىق جەكە زاتتارىن قازاقستان رەسپۋبليكاسىنىڭ ۇلتتىق مۋزەي قورىنا ەستەلىككە تارتۋ ەتتى. بەلگىلى عالىمداردان قۇرالعان ارنايى ساراپتامالىق كوميسسيا جەڭىل اتلەتشىنىڭ سىيعا تارتقان زاتتارىنىڭ قۇندىلىعىن انىقتاپ، مۋزەيدىڭ اسىل مۇرا زالىنا قويۋ تۋرالى شەشىم قابىلدادى. – ءبىزدىڭ ۇلتتىق مۋزەيدە باۋىرجان مومىشۇلى، نۇرعيسا تىلەنديەۆ، ەرمەك سەركەباەۆ سىندى تۇلعالاردىڭ جەكە زاتتارى، جازباشا كىتاپتارى، باسقا دا تاريحي جادىگەرلەر مەن كوپتەگەن قۇندى دۇنيەلەر بار. ارينە، ونىڭ ىشىندە سپورتقا ارنالعان الەم كۋبوكتارى، التىن مەدالدار، وليمپيادالىق مەدالدار بار. ول ءبىزدىڭ قازىرگى جاستارعا كەرەك، - دەيدى قر ۇلتتىق مۋزەيدىڭ ديرەكتورى ارىستانبەك مۇحامەديۇلى.
قازاقستاننىڭ ەڭبەك سىڭىرگەن سپورت شەبەرى ۇلتتىق مۋزەيگە جيىنى 45 جەكە زاتىن سىيعا تارتتى. ولاردىڭ قاتارىندا 2000 جىلى جازعى سيدنەي وليمپياداسىنان قالعان ەستەلىك زاتتارى مەن وزگە دە حالىقارالىق سپورتتىق جارىستاردا جەڭىپ العان مەدالدارى مەن ناگرادالارى بار. – ارينە، ءاربىر سپورشتى ءۇشىن وليمپيادا ويىندارى مەن ودان قالعان ەستەلىكتەردىڭ الاتىن ورنى بولەك. وليمپيادا - سپورتشىلار جارىسىنداعى ەڭ بيىك شىڭ دەسەم، قاتە ايتپاسپىن. دەگەنمەن، ءدال قازىر مەندە ەشقانداي قيماستىق سەزىمى جوق. كەرىسىنشە، بۇل مەن ءۇشىن ماقتانىش. سەبەبى، ادامدار كەلىپ، ءوز كوزدەرىمەن كورسىن، جاستارىمىز ءبىلسىن دەگەن نيەتپەن مەدالدار مەن ەستەلىكتەرىمدى سىيعا تارتىپ وتىرمىن، - دەيدى بەلگىلى سپورتشى، وليمپيادا چەمپيونى ولگا شيشيگينا.
يگىلىكتى شارا «ۇلتتىق مۋزەيگە سىي تارتۋ» جوباسى اياسىندا جۇزەگە اسىپ وتىر. ماقساتى مادەني قۇندىلىقتار مەن تاريحي جادىگەرلەردى ساقتاپ، كەيىنگى ۇرپاققا ناسيحاتتاۋ بولىپ تابىلادى.
دۋمان ارعىنگەلدى،
«ادىرنا» ۇلتتىق پورتالى
