Olımpıada chempıony jeke zattaryn Ulttyq mýzeıge tapsyrdy

2153
Adyrna.kz Telegram

Táýelsizdik alǵaly beri Qazaqstan atynan Olımpıada oıyndaryna qatysyp, el namysyn tý etip, kók baıraǵymyzdy bıikten jelbiretip, sporttyń bıik shyńynan kóringen spotshylarymyz jeterlik. Solardyń biri - qazaqstandyq jeńil atlet Olga Shıshıgına.

Sıdneı Olımpıadasynyń chempıony, Qazaqstannyń eńbek sińirgen sport sheberi Olga Shıshıgına - 1968 jyly Almaty qalasynda dúnıege kelgen. Jeńil atletıkamen 1978 jyldan beri shuǵyldanady. 1995 jyly Geteborgta ótken álem chempıonatynda kúmis medal, 2000 jyly Sıdneı olımpıadasynyń chempıony, 2001 jyly Edmontonda qola júldege ıe boldy. Osy jarystan soń sportshy jaraqat alyp, úlken sportpen qoshtasty. Qazaqstan Respýblıkasynyń Parlamenti Májilisiniń depýtaty. O.Shıshıgına «Qurmet», I dárejeli «Barys», II dárejeli «Dostyq» ordenderi men «Daryn» memlekettik jastar syılyǵynyń ıegeri.

Jaqynda Olımpıada chempıony Olga Shıshıgına óziniń sporttyq jeke zattaryn Qazaqstan Respýblıkasynyń Ulttyq mýzeı qoryna estelikke tartý etti. Belgili ǵalymdardan quralǵan arnaıy saraptamalyq komıssııa jeńil atletshiniń syıǵa tartqan zattarynyń qundylyǵyn anyqtap, mýzeıdiń asyl mura zalyna qoıý týraly sheshim qabyldady. – Bizdiń Ulttyq mýzeıde Baýyrjan Momyshuly, Nurǵısa Tilendıev, Ermek Serkebaev syndy tulǵalardyń jeke zattary, jazbasha kitaptary, basqa da tarıhı jádigerler men kóptegen qundy dúnıeler bar. Árıne, onyń ishinde sportqa arnalǵan álem kýboktary, altyn medaldar, Olımpıadalyq medaldar bar. Ol bizdiń qazirgi jastarǵa kerek, - deıdi QR Ulttyq mýzeıdiń dırektory Arystanbek Muhamedıuly.

Qazaqstannyń eńbek sińirgen sport sheberi Ulttyq mýzeıge jıyny 45 jeke zatyn syıǵa tartty. Olardyń qatarynda 2000 jyly jazǵy Sıdneı Olımpıadasynan qalǵan estelik zattary men ózge de halyqaralyq sporttyq jarystarda jeńip alǵan medaldary men nagradalary bar. – Árıne, árbir sporshty úshin Olımpıada oıyndary men odan qalǵan estelikterdiń alatyn orny bólek. Olımpıada - sportshylar jarysyndaǵy eń bıik shyń desem, qate aıtpaspyn. Degenmen, dál qazir mende eshqandaı qımastyq sezimi joq. Kerisinshe, bul men úshin maqtanysh. Sebebi, adamdar kelip, óz kózderimen kórsin, jastarymyz bilsin degen nıetpen medaldar men estelikterimdi syıǵa tartyp otyrmyn, - deıdi belgili sportshy, Olımpıada chempıony Olga Shıshıgına.

Igilikti shara «Ulttyq mýzeıge syı tartý» jobasy aıasynda júzege asyp otyr. Maqsaty mádenı qundylyqtar men tarıhı jádigerlerdi saqtap, keıingi urpaqqa nasıhattaý bolyp tabylady.

 

Dýman Arǵyngeldi,

«Adyrna» ulttyq portaly

Pikirler