پەداگوگتەرگە اقىلى كونكۋرستاردا بەرىلەتىن ماراپاتتار اتتەستاتتاۋ كەزىندە ەسكەرىلمەيدى. بۇل تۋرالى «ادىران» ۇلتتىق پورتالى قازاقستان رەسپۋبليكاسى ءبىلىم جانە عىلىم مينيسترلىگىنىڭ رەسمي سايتىنا سىلتەمە جاساي وتىرىپ حابارلايدى.
قازاقستاندا كەيبىر جەكە تۇلعالار پەداگوگتەرگە ارنالعان جالعان ناگرادالاردى جاساپ، ولاردى وڭدى-سولدى ساتىپ جاتىر. كۇماندى اقىلى كونكۋرستارعا قاتىسۋ ناتيجەسىندە الىنعان ناگرادالار مەن ديپلومدار پەداگوگتەردى اتتەستاتتاۋدان وتكىزۋ كەزىندە ەسكەرىلمەيدى. بۇل ماسەلەگە قازاقستان رەسپۋبليكاسى ءبىلىم جانە عىلىم مينيسترلىگىنىڭ اپپارات كەڭەسىندە نازار اۋدارىلدى.
قازاقستان رەسپۋبليكاسى ءبىلىم جانە عىلىم مينيسترلىگىنىڭ ۆەدومستۆولىق ناگرادالارىنىڭ قاتارىنا «ى.التىنسارين»، «ءبىلىم بەرۋ ءىسىنىڭ قۇرمەتتى قىزمەتكەرى»، «عىلىمدى دامىتۋعا سىڭىرگەن ەڭبەگى ءۇشىن» جانە «ەڭبەك اراداگەرى» توسبەلگىلەرى، «قۇرمەت گراموتاسى» جانە «العىس» گراموتالارى كىرەدى. بۇل رەسمي توسبەلگىلەر مەن گراموتالار ۆەدومستۆولىق ناگرادالار جونىندەگى كوميسسيانىڭ شەشىمى بويىنشا عانا بەرىلەدى.
سونداي-اق «پەداگوگ مارتەبەسى تۋرالى» زاڭعا سايكەس 2020 جىلدان باستاپ وبلىستىق اكىمدىكتەر مۇعالىمدەرگە ارنالعان جەرگىلىكتى ناگرادالاردى بەكىتىپ، ايتۋلى داتالارعا وراي ماراپاتتاۋعا قۇقىلى. ول ناگرادالار تەگىن ەكەنىن ەسكەرگەن ءجون.
«سوڭعى كەزدەرى ءار ءتۇرلى اقىلى ماراپاتتاردىڭ تاراعانى بايقالادى. ول ەشكىمگە جاسىرىن ەمەس. ولاردىڭ ديزاينى دا، اتى دا رەسمي بەكىتىلگەن ماراپاتتارعا ۇقساتىپ جاسالعان. كەيبىر مۇعالىمدەر بىلمەگەندىكتەن، كەيبىرەۋلەرى بىلە تۇرا كۇماندى اقىلى جارىستارعا قاتىسادى. ساتىپ الىنعان ماراپات – ماراپات ەمەس. ەگەر بۇل قوعامدىق ماراپات بولسا، ول اقىلى بولماۋى ءتيىس. سوندىقتان وسى اقپاراتتى كوپشىلىككە جەتكىزۋ كەرەك. مۇعالىمدەر، وقۋشىلار مەن اتا-انالارعا ءتۇسىندىرۋ جۇمىستارىن جۇرگىزۋ قاجەت»، – دەدى ءبىلىم جانە عىلىم ءمينيسترى اسحات ايماعامبەتوۆ.
ءبىلىم جانە عىلىم مينيسترلىگى اتا-انالارعا ءبىلىم بەرۋ ۇيىمىنان تىس اقىلى نەگىزدە وتكىزىلەتىن كونكۋرستار مەن وليمپيادالاردى تاڭداۋدا مۇقياتتىلىق تانىتۋعا شاقىرادى. مەكتەپتەردە اقىلى وليمپيادالار وتكىزۋگە قاتاڭ تىيىم سالىنعانىن دا ەسكەرگەن ءجون.
جەكە ۇيىمدار وقۋشىلار مەن مۇعالىمدەرگە ارنالعان كۇماندى اقىلى ونلاين كونكۋرستار مەن وليمپيادالاردى ۇيىمداستىرىپ ءجۇر. سوندىقتان قر بعم پەداگوگتەردى، اتا-انالاردى ۇيىمداستىرۋشىلاردىڭ الاياقتىق ارەكەتتەرىنەن ساق بولۋعا شاقىرادى. ولاردىڭ كوزدەگەن ماقساتى – زاڭسىز اقشا جيناۋ.
«مۇعالىمدەرگە ارنالعان اقىلى كونكۋرستار ناتيجەسىندە بەرىلەتىن ماراپاتتار رەسمي بولىپ ەسەپتەلمەيدى جانە پەداگوگتەردى اتتەستاتتاۋ كەزىندە ەسكەرىلمەيدى. جالعان ناگرادالاردى پايدالانۋ – پەداگوگ پەن ءبىلىم بەرۋ ۇيىمىنىڭ بەدەلىنە نۇقسان كەلتىرەدى»، – دەدى ءبىلىم جانە عىلىم ۆيتسە-ءمينيسترى شولپان كارينوۆا.
"ادىرنا" ۇلتتىق پورتالى
