Pedagogterge aqyly konkýrstarda beriletin marapattar attestattaý kezinde eskerilmeıdi. Bul týraly «Adyran» ulttyq portaly Qazaqstan Respýblıkasy Bilim jáne ǵylym mınıstrliginiń resmı saıtyna silteme jasaı otyryp habarlaıdy.
Qazaqstanda keıbir jeke tulǵalar pedagogterge arnalǵan jalǵan nagradalardy jasap, olardy ońdy-soldy satyp jatyr. Kúmándi aqyly konkýrstarǵa qatysý nátıjesinde alynǵan nagradalar men dıplomdar pedagogterdi attestattaýdan ótkizý kezinde eskerilmeıdi. Bul máselege Qazaqstan Respýblıkasy Bilim jáne ǵylym mınıstrliginiń apparat keńesinde nazar aýdaryldy.
Qazaqstan Respýblıkasy Bilim jáne ǵylym mınıstrliginiń vedomstvolyq nagradalarynyń qataryna «Y.Altynsarın», «Bilim berý isiniń qurmetti qyzmetkeri», «Ǵylymdy damytýǵa sińirgen eńbegi úshin» jáne «Eńbek aradageri» tósbelgileri, «Qurmet gramotasy» jáne «Alǵys» gramotalary kiredi. Bul resmı tósbelgiler men gramotalar vedomstvolyq nagradalar jónindegi komıssııanyń sheshimi boıynsha ǵana beriledi.
Sondaı-aq «Pedagog mártebesi týraly» Zańǵa sáıkes 2020 jyldan bastap oblystyq ákimdikter muǵalimderge arnalǵan jergilikti nagradalardy bekitip, aıtýly datalarǵa oraı marapattaýǵa quqyly. Ol nagradalar tegin ekenin eskergen jón.
«Sońǵy kezderi ár túrli aqyly marapattardyń taraǵany baıqalady. Ol eshkimge jasyryn emes. Olardyń dızaıny da, aty da resmı bekitilgen marapattarǵa uqsatyp jasalǵan. Keıbir muǵalimder bilmegendikten, keıbireýleri bile tura kúmándi aqyly jarystarǵa qatysady. Satyp alynǵan marapat – marapat emes. Eger bul qoǵamdyq marapat bolsa, ol aqyly bolmaýy tıis. Sondyqtan osy aqparatty kópshilikke jetkizý kerek. Muǵalimder, oqýshylar men ata-analarǵa túsindirý jumystaryn júrgizý qajet», – dedi Bilim jáne ǵylym mınıstri Ashat Aımaǵambetov.
Bilim jáne ǵylym mınıstrligi ata-analarǵa bilim berý uıymynan tys aqyly negizde ótkiziletin konkýrstar men olımpıadalardy tańdaýda muqııattylyq tanytýǵa shaqyrady. Mektepterde aqyly olımpıadalar ótkizýge qatań tyıym salynǵanyn da eskergen jón.
Jeke uıymdar oqýshylar men muǵalimderge arnalǵan kúmándi aqyly onlaın konkýrstar men olımpıadalardy uıymdastyryp júr. Sondyqtan QR BǴM pedagogterdi, ata-analardy uıymdastyrýshylardyń alaıaqtyq áreketterinen saq bolýǵa shaqyrady. Olardyń kózdegen maqsaty – zańsyz aqsha jınaý.
«Muǵalimderge arnalǵan aqyly konkýrstar nátıjesinde beriletin marapattar resmı bolyp eseptelmeıdi jáne pedagogterdi attestattaý kezinde eskerilmeıdi. Jalǵan nagradalardy paıdalaný – pedagog pen bilim berý uıymynyń bedeline nuqsan keltiredi», – dedi Bilim jáne ǵylym vıe-mınıstri Sholpan Karınova.
"Adyrna" ulttyq portaly
