ءۇيدىڭ تۇرعىندارى جالپى چات بويىنشا «بايقوڭىر» اۋدانى پوليتسيا باسقارماسىنىڭ ۋچاسكەلىك ينسپەكتورى پوليتسيا كاپيتانى داۋلەتبەك تاڭىربەرگەنوۆكە وزدەرى تۇراتىن ۇيدە تاراقان مەن تىشقاننىڭ كوبەيىپ كەتكەنى، قولاڭسى ءيىس شىعىپ تۇرعانى تۋرالى شاعىمدانعان. بۇل تۋرالى «ادىرنا» ۇلتتىق پورتالى نۇر-سۇلتان قالاسىنىڭ پوليتسيا دەپارتامەنتىنىڭ رەسمي سايتىنا سىلتەمە جاساي وتىرىپ حابارلايدى.
سەبەبى ولاردىڭ كورشىسى بىرنەشە جىل بويى ءوزىنىڭ ءۇش بولمەلى ءۇيىن قوقىس ورنىنا اينالدىرعان. تۇرعىندار كورشىسىنىڭ كەيبىر زاتتاردى كەرەك دەپ قالدىرعانىن، ودان كەيىن كوشەدەن، قوقىس ورىندارىنان زاتتاردى پاتەرىنە تاسي باستاعانىن ايتقان. تۇرعىنداردىڭ پوليتسياعا جۇگىنۋىنە تۋرا كەلگەن، سەبەبى، ول ەشكىمگە ەسىك اشپاعان.
ساسىق ءيىس، تاراقاندار مەن ءتۇرلى جاندىكتەر تۇرعىنداردىڭ مازاسىن كەتىرگەن.
ءمان-جايدى انىقتاۋ كەزىندە 53 جاستاعى ەر ادامنىڭ جالعىز تۇراتىنى انىقتالعان.
ۋچاسكەلىك پوليتسيا ينسپەكتورىنىڭ كومەگىمەن ەر ادامنىڭ پاتەرىن تازالاۋ جۇمىستارى ۇيىمداستىرىلعان. ءۇيدى جيناۋ ەكى كۇنگە سوزىلعان. ناتيجەسىندە ونىڭ تۇراتىن ۇيىنەن بىرنەشە جۇك كولىگىمەن قوقىس شىعارىلعان. ءۇيدىڭ تۇرعىندارى ۋچاسكەلىك ينسپەكتورعا كومەك كورسەتكەنى ءۇشىن العىس ايتۋدا.
بۇعان قوسا، ۋچاسكەلىك ينسپەكتور ەر ادامنىڭ جەكە كۋالىگىن جانە الەۋمەتتىك جاردەماقى الۋ ءۇشىن قۇجاتتارىن قالپىنا كەلتىرۋگە كومەكتەسكەن.
«ادىرنا» ۇلتتىق پورتالى
