2020 جىل: قازاق سپورتى نەسىمەن ەستە قالدى؟

5972
Adyrna.kz Telegram

2020 جىلى الەمدىك دەڭگەيدەگى باستى شارا (توكيو وليمپياداسى) كەلەسى جىلعا شەگەرىلگەنىمەن، ەلىمىزدىڭ سپورتشىلارى باق سىناعان بىرنەشە جارىستار ءوتتى.

جىل جەتىستىكتەرى:

ەلەنا رىباكينا (ۇلكەن تەننيس). 21 جاستاعى وتانداسىمىز 5 بىردەي WTA ءتۋرنيرىنىڭ (شەنچجەن، حوبارت، سانكت-پەتەربۋرگ، دۋباي، ستراسبۋرگ) فينالىنا شىعىپ، 1-ۋىندە (حوبارت) توپ جاردى. جاقسى ونەر كورسەتۋىنىڭ ارقاسىندا قىزدار رەيتينگىسىندە 17-ورىنعا كوتەرىلىپ، قازاق تاريحىنداعى رەكوردتى (2012 جىلى ياروسلاۆا شۆەدوۆا 25-ورىنعا دەيىن كوتەرىلگەن)  جاڭارتتى. سونىمەن قاتار ول قارجىلىق جاعدايىن ( 1 ملن $-دان استام)   جاقسارتا الدى. ايەلدەر تەننيس قاۋىمداستىعى (WTA) دا ەلەنا رىباكينا مەن سيمونا حالەپ (6:3, 3:6, 6:7(5)) اراسىنداعى فينالدىق ويىندى (WTA دۋباي )  اتالمىش جىلدىڭ «ەڭ ۇزدىگى» رەتىندە تانىدى.

 باقتيار زاينۋتدينوۆ (فۋتبول). ۇلتتىق قۇرامانىڭ بەلدى ويىنشىسى رەسەي چەمپيوناتىنداعى مىقتى ۇجىمداردىڭ ءبىرى – «تسسكا» ساپىنا اۋىسىپ، 20 كەزدەسۋ وتكىزدى. «ۋرال» كلۋبىنا سوققان گولى ايدىڭ «ەڭ ۇزدىك گول» رەتىندە باعالانسا، «تسسكا» كومانداسىنا اۋىسۋىن رەسەي چەمپيوناتىنداعى «ەڭ ءساتتى ترانسفەرلەر» رەيتينگىسىندە اتاپ كورسەتتى. اعىمداعى جىلدى قازاقستان ۇلتتىق قۇراماسىنىڭ «ەڭ قىمبات فۋتبولشىسى» (2 ملن ەۋرو) رەتىندە اياقتادى.

 راحات بەكبولات (اۋىر اتلەتيكا). اۋىر اتلەتيكادان تاشكەنتتە (وزبەكستان) وتكەن جاسوسپىرىمدەر اراسىنداعى ازيا چەمپيوناتىندا زىلتەمىرشى راحات بەكبولات (102 كەلى سالماققا دەيىن)  سەرپە كوتەرۋدە 198 كەلىنى كوتەرىپ، الەمدىك رەكوردتى جاڭارتتى. قاراشا ايىندا ليما (پەرۋ) قالاسىندا وتكەن جاسوسپىرىمدەر اراسىنداعى ونلاين فورماتتاعى الەم كۋبوگىندا دا راحات بەكبولات  319 (140+1790 ) كەلى ناتيجەمەن جەڭىمپاز اتاندى. ال ەرەسەكتەر اراسىنداعى ەل چەمپيوناتىندا ارتەم انتروپوۆقا (68 كەلى قالىپ قويدى) عانا جول بەرىپ، كۇمىس جۇلدە يەلەندى.

 اۋەسقوي بوكستان قازاقستان ەرلەر كومانداسى.

 اممان (يوردانيا) قالاسىندا وتكەن ليتسەنزيالىق تۋرنيردە ەرلەرىمىز بارلىق 8 سالماقتا توكيو وليمپياداسىنىڭ جولداماسىن يەلەندى.

 «قايرات» فۋتبول كلۋبى.

اراعا 16 جىل سالىپ، 32 جاستاعى الەكسەي شپيلەۆسكي باپتايتىن (قازاقستان چەمپيونى اتانعان ەڭ جاس باپكەر) «قايرات» كلۋبى قايتا ەل چەمپيونى اتاندى. «استانا» كلۋبىنىڭ 6 جىلدىق گەگەمونياسىن توقتاتقان «قايرات» كلۋبى اتالمىش جىلى ءوز ساپىن برازيليانىڭ اڭىز سۇرمەرگەنى ۆاگنەر لاۆ، «قىرعىز مەسسيى» گۇلجىگىت الىقۇلوۆ، ياتسەك گۋرالسكي ت.ب مىقتى فۋتبولشىلارمەن تولىقتىردى.

 «بارىس» حوككەي كلۋبى.

اندرەي سكابەلكا باپتاعان «بارىس» كلۋبى قۇرلىقتىق حوككەي ليگاسىندا «ەڭ ۇزدىك كورسەتكىشتى» (شىعىس كونفەرەنتسياسىندا 2-ورىن، پلەي-وففتا الەۋەتتى «مەتاللۋرگ» (ماگنيتوگورسك) كلۋبىنان ايلاسىن اسىردى) قايتالادى. كوروناۆيرۋس ەپيدەمياسى كەسىرىنەن پلەي-وففتىڭ شيرەك فينالىن («ءسىبىر» كلۋبىمەن ويناۋى ءتيىس ەدى) جالعاستىرا المادى.

 جىل ەرەكشەلىگى

  • قازاقستان جاستار قۇراماسى (فۋتبول).
  • 2021 جىلى وتەتىن ەۋروپا چەمپيوناتىنا ىرىكتەۋ كەزەڭىندە باق سىناعان جاستارىمىز 10 ۇپاي جيناپ، ەڭ ۇزدىك كورسەتكىشىن قايتالادى. ءبىر قىزىعى، فۋتبولشىلارىمىز بارلىق ۇپايدى تەك سىرت الاڭداعى ويىنداردا (فارەر ارالى، چەرنوگوريا، يزرايل جاستارىن جەڭىپ، سولتۇستىك ماكەدونيامەن تەڭ وينادى) جينادى.

 سابىرحان ماحمۋد (اۋەسقوي بوكس) . اۋەسقوي بوكستان شىمكەنتتە وتكەن ەل چەمپيوناتىندا 52 كەلى سالماقتاعى سابىرحان ماحمۋد قانا توكيو وليمپياداسىنىڭ جولداما يەگەرى ساكەن بيبوسىنوۆتان باسىم ءتۇستى.

 UFC-دەگى دەبيۋت. بيىل العاش رەت توبەلەستەن الەمدەگى ەڭ بەدەلدى Ultimate Fighting Championship (UFC) ليگاسىندا 3 وتانداسىمىز  ماريا اگاپوۆا (1 جەڭىس، 1 جەڭىلىس), جالعاس جۇماعۇلوۆ (1 جەڭىلىس), شاۆكات راحمونوۆ (1 جەڭىس) ونەر كورسەتتى.

 تۇرسىنباي قۇلاحمەت (كاسىپقوي بوكس). 2019 جىلى اۋەسقوي بوكستان رەسەيدە وتكەن الەم چەمپيوناتىنىڭ قولا جۇلدەگەرى تۇرسىنباي قۇلاحمەت كاسىپقوي بوكسقا بەت بۇرىپ، نەبارى 2-ءشى جەكپە-جەگىندە (اعىلشىن بوكسشىسى ماكلەي ماكگوۋەندى ۇتتى) WBC International تۇجىرىمى بويىنشا 1-ءشى ورتا سالماقتاعى بەلبەۋدى يەلەندى.

 جىل ءۇمىتى

  • دانيار ەلەۋسىنوۆ (كاسىپقوي بوكس)
  • ريو وليمپيداسىنىڭ چەمپيونى دانيار ەلەۋسىنوۆ (10-0, 6 KO) ءوز مانسابىندا ەڭ قاۋىپتى قارسىلاس سانالعان ناميبيا بوكسشىسى، WBA, IBF, IBO تۇجىرىمى بويىنشا ەكس-الەم چەمپيونى دجۋليۋس يندونگونى ەش قينالماي، 2 راۋندتا ۋاقىتىنان بۇرىن جەڭدى.

 جىل وكىنىشى

  • باۋىرجان يسلامحان (فۋتبول)
  • فۋتبولدان قازاقستان ۇلتتىق قۇراماسىنىڭ كاپيتانى، «ءال-اين» ء(باا) كلۋبىنىڭ ويىنشىسى دوپينگ داۋىنا ىلىكتى.

 قازاقستان فۋتبول قۇراماسى

 ميحال بيلەك باپتايتىن قازاقستان فۋتبول كومانداسى «ۇلتتار ليگاسى» تۋرنيرىندە سوڭعى ورىن الىپ، ورنىنان بوساتىلدى.

جىل ساتسىزدىگى

 جەڭىلمەگەن بوكسشىلارىمىزدىڭ جەڭىلۋى

  • كاسىپقوي بوكستا فلويد مەيۆەزەردىڭ سالىپ كەتكەن جولىمەن جۇرۋگە تىرىسقان نۇرسۇلتان جاڭاباەۆ (8-1, 5 KO), ماديار اشكەەۆ (14-1, 7 KO),، ءالي احمەدوۆ (16-1, 12 KO) العاش رەت قارسىلاستارىنا جول بەردى.

جىل ساعىنىشى

  • GGG (كاسىپقوي بوكس). گەننادي گولوۆكين مەن كاميل شەرەمەتا اراسىنداعى جەكپە-جەك تەك 8-ءشى مۇمكىندىگىندە عانا جۇزەگە استى. كاميل شەرەمەتا پولشاداعى قازاقستان ەلشىلىگىنە گەننادي گولوۆكيندى ىزدەپ بارسا دا، شارشى رينگتە ەش قارسىلىق (4 نوكداۋن، 7 راۋندتان سوڭ، جەكپە-جەكتى جالعاستىرۋدان باس تارتتى) كورسەتە المادى.

جىل وزگەرىسى

  • كاسىبي سپورتقا بولىنەتىن قارجى ەكى ەسەگە قىسقاردى
  • ەلىمىزدە جىل سايىن 98 كاسىبي كلۋبقا بولىنەتىن 55 ملرد تەڭگە 2 ەسەگە ازايىپ، كەلەسى جىلى 22,2 ملرد تەڭگەنى قۇرايدى. ارتىق قاراجات بۇقارالىق سپورتتى دامىتۋعا باعىتتالادى.

قانات بايۇزاقوۆ،

«ادىرنا» ۇلتتىق پورتالى.

پىكىرلەر