«پوليتسيادان ءۇمىت ۇزدىك»: 6 جىگىتتەن زورلىق كوردىم دەگەن قىز پرەزيدەنتتەن كومەك سۇرادى

2472
Adyrna.kz Telegram

الماتى وبلىسى پانفيلوۆ اۋدانىندا ءوز قاتارلاستارىنان زورلىق كوردىم دەگەن قىز ىشكى ىستەر ءمينيسترى مەن پرەزيدەنتتەن كومەك سۇرايدى، دەپ حابارلايدى «ادىرنا» ۇلتتىق پورتالى Azattyq Rýhy-نا سىلتەمە جاساپ.

19 جاستاعى بويجەتكەن وسىدان ەكى جىل بۇرىن ءوزىن 6 ادامنىڭ زورلاعانىن ايتادى. الايدا، ەكى جىلعا سوزىلعان تەرگەۋ بارىسىندا ەشكىم جاۋاپقا تارتىلماعان. 2019 جىلدىڭ ناۋرىز ايىنان بەرى ءىس بىرنەشە رەت قىسقارتىلىپ، قايتادان وندىرىسكە الىنعان. الماتى وبلىسىنىڭ پوليتسيا دەپارتامەنتى، وبلىستىق پروكۋراتۋرا ءمان-جايدى بىلگەنىمەن، پروتسەسسۋالدىق شەشىم قابىلدانىپ، ءىس سوتقا جولدانباعان.

جابىرلەنۋشى مەن ونىڭ اعاسى ەرمەك سمايىلوۆ الماتى وبلىستىق پوليتسيا دەپارتامەنتى مەن الماتى وبلىسى پانفيلوۆ اۋداندىق پوليتسيا باسقارماسىنىڭ ارەكەتىنە قۇزىرلى ورگانداردىڭ باعا بەرۋىن سۇرايدى.

ال قىزدىڭ اكەسى 2018-2019 جىلدارى ارالىعىندا زورلىق بىرنەشە رەت بولعانىن ايتادى. 2019 جىلى 9 ناۋرىزدا ءىنىسى مال قارايىن دەپ قورا جاققا بارعاندا، قان ىزدەرى مەن مۇشەقاپتاردىڭ جاتقانىن كورگەن. اقىرىندا ۇيدەگى 16 جاستاعى قىزدىڭ ءزابىر كورگەنى انىقتالادى. 2018 جىلدىڭ جەلتوقسان ايى مەن 2019 جىلدىڭ ناۋرىز ايىندا 11-سىنىپ وقۋشىسىن بىرنەشە ادام قورقىتۋ جانە بوپسالاۋ ارقىلى زورلاپ كەلگەن ەكەن.

«قىزدىڭ اكەسى سول كۇنى پانفيلوۆ اۋداندىق پوليتسيا بولىمىنە بارىپ ارىزداندى. ارىز جازعان كۇننەن سوڭ، تەرگەۋ ءبولىمىنىڭ باستىعى ايدارحان ءابدىراحمانوۆ ءىنىمدى شاقىرىپ الىپ، «سەن كىمگە جالا جاۋىپ جاتىرسىڭ، ارىزىڭدى ال، ايتپەسە وزدەرىڭ سوتتالاسىڭدار» دەپ، ءىنىمدى قورقىتادى. سوسىن اۋىلدان شەشەم حابارلاسقان سوڭ، وسى ىسپەن مەن اينالىسا باستادىم. اۋىلعا بارسام، قىزبەن مەكتەپ ديرەكتورىنىڭ ورىنباسارى مەن پسيحولوگ سويلەسىپ وتىر ەكەن. اقىرىندا ماعان قىزدى باسقا جاققا بارىپ وقىتۋدى سۇرادى. ال ونىڭ مەكتەپ بىتىرۋىنە 3 اي قالعان، مەن قارسى بولدىم. سودان ول سۇراق قايتادان كوتەرىلمەدى. ءبىزدىڭ اۋىلدا «اۋىل اعاسى» دەگەن بار، ءبىز اۋىلدىڭ اقسالدارىن جيناپ، اۋىل اعاسىن شاقىرىپ، كۇدىكتى بالالاردىڭ اتا-انالارىن شاقىرىپ، سويلەستىك، اقىرىندا كىنالى تاراپ قىزدى قارالاعان سوڭ، وڭ شەشىم تاپپادى. وعان دەيىن بالالاردىڭ اتا-انالارى كەشىرىم سۇراپ كەلدى. بىراق ءبىز زاڭمەن شەشىلسىن، وتباسىلىق ابىرويىمىزدى اقشامەن ولشەمەيمىز دەپ ۇسىنعان كومەكتەرىنە قارسى بولدىق»، - دەيدى جابىرلەنۋشى قىزدىڭ تۋىسى.

ەرمەك سمايىلوۆ قورانىڭ الدىنان تابىلعان ايعاقتاردى تەرگەۋشىلەر ىسكە تىگىپ، جابىرلەنۋشىنىڭ ارىزىن قابىلداعانىن ايتادى. ادۆوكات جالداپ، تۇرالينا اينۇر دەگەن تەرگەۋشى ءىستى جۇرگىزگەن. قۇقىق قورعاۋشىلار ساراپتاما تاعايىنداپ، ءبىر ايدان سوڭ جاۋابى كەلەدى دەگەندە، قىلمىستى ءىس الماتى وبلىستىق تەرگەۋ باسقارماسىنا جىبەرىلىپتى.

«بۇل بىزگە تۇسىنىكسىز بولدى، نەگە وبلىس ورتالىعىنا جىبەرگەنىنىڭ سەبەبىن تۇسىندىرگەن جوق. ءبىز ونىڭ ارتىنان تالدىقورعانعا باردىق، سول كۇننەن باستاپ بۇرمالاۋشىلىق باستالادى. الماتى وبلىستىق تەرگەۋ باسقارماسى باسشىسىنىڭ ورىنباسارى بىزگە ەشقايدا ارىزدانباۋدى سۇراپ، ناۋرىز مەيرامى وتكەن سوڭ ءوزىمىز كىنالىلەردى قامايمىز دەدى. سول كۇنى ساعات كەشكى توعىز جارىمدا تەرگەۋ باسقارماسى باسشىسىنىڭ ورىنباسارى بولات تەڭىزباەۆ قىزدىڭ اناسىنا ءوز تەلەفونىنان حابارلاسىپ، وسىنداي ۋادە بەرگەن. ءبىز سەندىك. الماتىداعى كابلۋكوۆ كوشەسىندەگى اۋرۋحانادا ەكسپەرتيزا 1 اي ەمەس، 4 ايدان سوڭ دايىن بولدى. الماتى وبلىسى پوليتسيا دەپارتامەنتى باسشىسى مۇرات ۇرىمحانوۆتىڭ قابىلداۋىنا جازىلىپ، ءمان-جايدى ايتقان سوڭ، ەكى كۇننەن كەيىن عانا ارنايى تەرگەۋشى تاعايىندالىپ، ءىس جاركەنتكە جىبەرىلدى. بىراق تەرگەۋشى ەرنار قالتاەۆ وسى كۇنگە دەيىن ءىستى سوڭىنا جەتكىزگەن جوق، ەشكىم قامالعان دا جوق»، - دەيدى ە.يسمايىلوۆ.

ال جابىرلەنۋشى ءوزىن العاش مەيرامبەك ەسىمدى قاتارلاسىنىڭ زورلاعانىن ايتىپ وتىر. ەكەۋى دوس بولعان ەكەن. 2018 جىلدىڭ جەلتوقسانىندا ءۇي سىرتىندا جىگىت قىزدى زورلاپ شەشىندىرىپ، ارام ويىن جۇزەگە اسىرعان كورىنەدى. ال ەگەر بولعان جايت تۋرالى ءتىس جاراتىن بولسا، ەلدىڭ الدىندا ماسقارالايمىن دەپ قورقىتىپتى. ول كەزدە ەكەۋىنىڭ دە جاسى 16-دا بولعان.

«مەنى ابىرويسىز ەتتى، بىراق ول تۋرالى ەشكىمگە ايتقان جوقپىن. ول WhatsApp ارقىلى تاعى شىعۋىمدى سۇرادى، شىقپاسام اۋىلدىڭ بالالارىنا مەنىڭ «جامان قىز» ەكەنىمدى ايتامىن دەپ قورقىتتى. سوسىن ماعان ول ايتقانداي، ءوز ەركىممەن جىنىستىق قاتىناسقا ءتۇستى دەگەن جازبالار كەلىپ، اۋىلعا تارادى. سودان سوڭ قايتىپ حابارلاسپادى. ءۇش-ءتورت ايدان سوڭ ماعان قايرات ەسىمدى ءبىر بالا جازىپ، كەزدەسۋگە شاقىرىپ، ماڭىزدى ءبىر اقپاراتى بار ەكەنىن ايتتى. بىراق مەن كەزدەسۋدەن باس تارتتىم. بىراق ءۇش اي ماعان جازۋمەن بولدى. سوسىن مەن ءۇيدىڭ اۋلاسىنا شىقتىم. الايدا، قايراتتىڭ قاسىندا مەيرامبەك بار ەكەن، ول ەكەۋى 2018 جىلى جەلتوقسان ايىنىڭ باسىندا كەلىپ، ءبىزدىڭ ءۇيدىڭ ارتىنداعى قورادا ءوز ەركىمنەن تىس تاعى دا زورلادى»، - دەيدى ەسىمىن اتاماۋدى سۇراعان قىز.

زورلىق وسىلايشا بىرنەشە رەت جالعاسقان. بوزبالالار ءار كەلگەن سايىن قىزدى ۇيدەن قورقىتىپ شىعارىپ الىپ وتىرعان ەكەن. ۋاقىت وتە ولاردىڭ قاتارى وزگە جىگىتتەرمەن تولىعىپ كەلگەن.

«سوسىن ەكى-ءۇش كۇننەن سوڭ قايرات پەن مەيرامبەك تاعى دا كەلدى. قايرات تاعى ويىن ىسكە اسىردى، مەيرامبەك ءىسىن ىستەپ جاتقاندا، ۇيدەن مامام شىعىپ قالدى. مەيرامبەك قاشىپ كەتتى. ولار قورقىتتى. سوسىن قايرات وسى وقيعادان سوڭ اتامنىڭ ۇيىنە بارعانىمدا تاعى ءبىر بەيتانىس بالانى الىپ كەلدى. ونىڭ اتى سىرىم بولاتىن. جاسى 18-دە. ولار دا ماعان وسىنداي زورلىق كورسەتتى»، - دەيدى جابىرلەنۋشى.

ارىم تاپتالدى دەگەن بويجەتكەن پرەزيدەنت قاسىم-جومارت توقاەۆتان كومەك سۇراپ وتىر. ول ءىستىڭ 2 جىلدان بەرى ءادىل شەشىمىن تاپپاي كەلە جاتقانىن ايتىپ، كىنالىلەردىڭ جازالانۋىن تالاپ ەتتى.

قىزدىڭ اعاسىنىڭ ايتۋىنشا، وسى ىسكە بارلىعى 6 بالانىڭ قاتىسى بار ەكەنى انىقتالعان. ەڭ باستى كۇدىكتى – مەيرامبەك ەسىمدى جىگىتكە قاتىستى ءىس توقتاتىلعان. ال ەكسپەرتيزا قورىتىندىسىن قۇقىق قورعاۋشىلار قىزدىڭ وزىنە دە، تۋىستارىنا دا بەرمەپتى. تەك Nur Otan پارتياسىنان كومەك سۇراعاننان كەيىن عانا ساراپتاما ناتيجەسى قىزدىڭ اتا-اناسىنا بەرىلگەن. الايدا، ەكسپەرتيزا بالالاردىڭ پايداسىنا شەشىلگەن.

«مەنى 2019 جىلى قاراشا ايىندا تالدىقورعانعا شاقىردى. سول جەردە ەرنار قالتاەۆ مىرزا «سەن مىنالارعا كەشىرىم بەر، 4 ملن تەڭگە اقشا بەرىپ وتىر» دەدى. مەن اقشانىڭ كەرەك ەمەسىن ايتىپ المادىم. اۋىل اقساقالدارىنىڭ الدىندا كىناسىن مويىنداماي، ەندى اقشا ۇسىنعانى بارىپ تۇرعان سوراقىلىق، ءبىزدى ەل-جۇرتتىڭ الدىندا ابىرويسىز ەتتى. كىنالىلەر جازالانسىن، تالابىمىز سول. اۋىل ىشىندە قازىر اڭگىمە ءجۇر، قىزىمىزدى زورلاعاندار پوليتسەيلەرگە پارا بەرگەن كورىنەدى، 3 ميلليون تەڭگە. بالكىم سودان بولار، ءىس ورنىنان ەش قوزعالماي قويدى، «قىزدىڭ ءوزى كىنالى» دەگەندى ايتىپ وتىر»، - دەپ اشىندى بويجەتكەننىڭ اعاسى.

پوليتسەيلەردەن ءۇمىتىن ۇزگەن اتا-انا ەندى پرەزيدەنتتەن كومەك سۇراپ وتىر. سول ءۇشىن باق وكىلدەرىنە كەلدىك دەيدى.

Azattyq Rýhy اقپارات اگەنتتىگى بۇل ءىس بويىنشا الماتى وبلىستىق پوليتسيا دەپارتامەنتىنە ساۋال جولداعان. ايماقتىق دەپارتامەنتتىڭ ءباسپاسوز قىزمەتى قىلمىستىق ءىستىڭ توقتاتىلعانىن مالىمدەدى.

«الماتى وبلىسى پوليتسيا دەپارتامەنتى اتالعان دەرەكتىڭ قر قىلمىستىق كودەكسىنىڭ 120-بابى 3-بولىگى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىندە تىركەلگەنىن حابارلايدى. قىلمىستىق پروتسەسكە قاتىسۋشىلاردان جاۋاپ الۋ، بەتتەستىرۋ، بەس سوت ساراپتاماسى سەكىلدى قر قىلمىستىق ءىس-جۇرگىزۋ كودەكسىمەن قاراستىرىلعان جەدەل تەرگەۋ ءىس-شارالارىنىڭ كەشەنى وتكىزىلدى، ولاردىڭ ناتيجەسى بويىنشا زورلاۋ دەرەگى راستالعان جوق. قىلمىستىق ءىس قر قىجك 35-ب.1-ب. 2-ت. نەگىزىندە توقتاتىلدى. قابىلدانعان شەشىممەن الماتى وبلىسىنىڭ پروكۋراتۋرا ورگاندارى كەلىستى، تەرگەۋ كەزىندە زاڭبۇزۋشىلىقتار بولعان جوق»، - دەلىنگەن الماتى وبلىستىق پد ءباسپاسوز حابارلاماسىندا.

«ادىرنا» ۇلتتىق پورتالى

پىكىرلەر