الاش جولى – ءبىلىم، بىلىك، بىرلىك جولى

2810
Adyrna.kz Telegram

كۇنى كەشە «الاش ۇلتتىق اۆتونوميالىق رەسپۋبليكاسىنا – 103جىل!» تولۋىنا وراي ءداستۇرلى «الاش الەمى» ينتەللەكتۋالدى سايىسى ونلاين فورماتتا ءوتتى، دەپ حابارلايدى «ادىرنا» ۇلتتىق پورتالى.

ونلاين بايلانىسقا احمەت بايتۇرسىنۇلى مۇراجاي-ۇيىنەن سايىس جۇرگىزۋشىلەرى راقىمجان قالدىكوز بەن بالجان اقىلبەك بايلانىسقا شىقتى. سايىس اتاۋلى ءۇش بولىمنەن تۇرادى: «سوعايىن سوزىمنەن ءبىر التىن ساراي» مانەرلەپ جاتقا وقۋ، «ءىشى التىن، سىرتى كۇمىس ءسوز قالدىرعان» ەسسە جازۋ جانە «103 سۇراق-جاۋاپ» جارىسى. اتالعان سايىستاردىڭ مانەرلەپ ولەڭ وقۋ مەن ەسسە جازۋ ءبولىمى قاتىسۋشىلاردان الدىن الا الىنىپ الەۋمەتتىك جەلىگە جاريالاندى. كەشە «103 سۇراق-جاۋاپ» جارىسى ءوتىپ، ارتىنشا ادىلقازى القالارى بارلىق قاتىسۋشىلاردى جۇلدەلى ورىندارىمەن ماراپاتتادى.

سايىسقا رەسپۋبليكامىزدىڭ وننان اسا قالالارىنان، ءار ءتۇرلى ماماندىقتا ءبىلىم الىپ جاتقان جالپى جيىرما ءۇش ستۋدەنت قاتىستى. ادىلقازى القالارى: بەلگىلى الاشتانۋشى سۆەتلانا سماعۇلوۆا، احمەتتانۋشى رايحان ساحىبەكقىزى، پەداگوگيكا عىلىمدارىنىڭ دوكتورى بەرەكە داۋلەتحانقىزى، الاش ارىسى قوشكە كەمەڭگەردىڭ ۇرپاعى، الاشتانۋشى قايىربەك كەمەڭگەر. تاجىريبەلى ماماندار سايىس جەڭىمپازدارىن قىزۋ تالقىعا سالىپ، بارىنشا ءادىل باعالاۋعا تىرىستى. ءادىل ءوتۋىنىڭ ەرەكشەلىگى دە وسى، ستۋدەنتتەردىڭ جۇمىستارىنا جەكە-جەكە باعالاۋ كريتەريى ارقىلى كەرى بايلانىس جاساپ، ستۋدەنتتەرگە دۇرىس باعىت باعدار كورسەتۋىندە. ەندەشە بيىل ءتورتىنشى رەت جالعاسىن تاۋىپ وتىرعان سايىستىڭ جۇلدەگەرلەرىمەن تانىس بولىڭىزدار!

ءى. «سوعايىن سوزىمنەن ءبىر التىن ساراي» جاتقا مانەرلەپ وقۋ ءبولىمى بويىنشا:
باس جۇلدە يەگەرى تولەۋبەك ارۋجان، ءى ورىن قۇلشار بەكزات، ءىى ورىن ىسقاقوۆ قۋانىش پەن جەڭىسبەك ايجان، ءىىى ورىن گۇلنار تايجان مەن تاسىبەك دانا، اتاۋلى نوميناتسيالارمەن سارسەن راۋان نۇربولاتۇلى، بەكەتاەۆا اراي، المات ءاليحانۇلى، عابدۋل-احمەت سايدعالي، ابدۋراحمانوۆا نوزلي حامدامقىزى، قىرىقباي سايان ماراپاتتالدى.
ءىى. «ءىشى التىن، سىرتى كۇمىس ءسوز قالدىرعان» ەسسە جازۋ ءبولىمى بويىنشا:
ادىلقازى القالارىنىڭ ورتاق شەشىمىمەن باس جۇلدەگە لايىق ەسسە تابىلمادى. ءى ورىن يەگەرى قامشىبەك احمەت قاناتۇلى، ءىى ورىن اقبەرگەن جۇلدىز بەن قىرىقباي سايان، ءىىى ورىن نىشان ايدانا، ارناۋلى نوميناتسيالارمەن ينديرا سۇلتانعاليقىزى، گۇلميرا قۋانىشقىزى، مىرزاقان قۇرالاي ماراپاتتالدى.
ءىىى. «103 سۇراق-جاۋاپ» ءبولىمى بويىنشا:
باس جۇلدە يەگەرى ايداركۋلوۆا گۇلميرا، ءى ورىن قامشىبەك احمەت قاناتۇلى، ءىى ورىن نىشان ايدانا مەن ساۋتبەكوۆا بوپەجان، ءىىى ورىن تۇرلىباي ايشا، تولەۋبەك ارۋجان جانە حالمۋرادوۆا گۇلشات، نوميناتسيامەن ىسقاقوۆ قۋانىش ماراپاتتالدى.

ستۋدەنتتەردىڭ دايىندىعى اسىرەسە «103 سۇراق-جاۋاپ» جارىسىنا جىلداعىدان جاقسى دايىندىق جۇرگەنى بايقالاتىنىن، سۇراقتاردى بۇدان دا كۇردەلەندىرۋگە ادىلقازى القالارى تىكەلەي قاداعالايتىنىن جىلدىق جوسپارعا الدى. ادىلقازى القالارى باس جۇلدەگەرلەرگە ىنتالاندىرۋ ماقساتىندا ءوز اتتارىنان اۆتورلىق كىتاپتارى مەن ءبىر رەتتىك شاكىرتاقى تاعايىندادى. ۇيىمداستىرۋشى تاراپىنان قالعان ءبىرىنشى، ەكىنشى ورىن يەلەرىنە دە قۇندى كىتاپتار مەن قارجىلاي سىيلىق تارتۋ ەتتى. سايىس ناتيجەسىندە ستۋدەنتتەر ونلاين بولسا دا، ورتاق مامىلەگە كەلىپ، ءبىر ءۇيدىڭ بالاسىنداي جىلى ورتا قالىپتاستىردى. قايراتى مەن ءبىلىمى ۇيلەسكەن جاستاردىڭ جۇرەگىنە مىنا زاماندا ادىلەتتىڭ وتىن جاعۋ بىزگە مىندەت. باسى جيىلىپ تۇرعان جاستاردىڭ تانىمىن، ءبىلىمىن ارتتىراتىن ونلاين جۇزدەسۋلەردى جالعاستىرىپ وتىرۋدى ماقسات ەتتى.

قورىتا كەلە، ۇلت ۇستازى احمەت بايتۇرسىنۇلىنىڭ: «…باسقادان كەم بولماس ءۇشىن ءبىز ءبىلىمدى، باي ءھام كۇشتى بولۋىمىز كەرەك. ءبىلىمدى بولۋعا وقۋ كەرەك. باي بولۋعا كاسىپ كەرەك. كۇشتى بولۋعا بىرلىك كەرەك. وسى كەرەكتەردىڭ جولىندا جۇمىس ىستەۋ كەرەك» دەگەن امانات سوزىنە قاراتا سايىستى جوبانىڭ ماقساتى دا وسى ءۇش كەرەككە نەگىزدەلەدى. قاتىسىپ، ءبىلىم بايلىعىن جيناعان جاستارعا، الاش يدەياسى استىندا بىرىگىپ، جول كورسەتىپ جاتقان ۇستازدارىمىزعا العىسىمىز شەكسىز. «قاراڭعى قازاق كوگىنە ورمەلەپ شىعىپ كۇن بولام…»

دايىنداعان: جوبا اۆتورى مەن ۇيىمداستىرۋشىسى – بالجان اقىلبەك

پىكىرلەر