بىرنەشە ايدان بەرى بەلارۋس ەلىندە تىنىش ءومىر جوق. ەل پرەزيدەنتى الەكساندر لۋكاشەنكونىڭ ورنىنان كەتۋىن تالاپ ەتكەندەردىڭ قاتارى ازايماي تۇر. بىراق قانشاما بەيبىت ەرەۋىل جاسالسا دا، 26 جىلدان بەرى تاقتا مىزعىماي وتىرعان الەكساندر لۋكاشەنكو ادەيى ۋاقىتتى سوزىپ كەلەدى. كەتۋگە دە قۇلىقتى ەمەس.
حالىقتى الدارقاتىپ، ءارتۇرلى مالىمدەمەلەر جاساپ وتىرعان «ەۋروپانىڭ سوڭعى ديكتاتورى» ەندى كونستيتۋتسيالىق رەفورمالار جاساۋعا كوشەتىنىن ايتتى. الايدا ول رەفورما قالاي جۇزەگە اسادى، وندا باستى نازارعا نە الىنادى؟ كونستيتۋتسيا تاعى دا تاققۇمار پرەزيدەنتتىڭ مۇددەسىن كوزدەي مە؟ ول ەندى الداعى ۋاقىتتىڭ ەنشىسىنە قالايىن دەپ تۇر.
ايتسە دە، كوپتەگەن ساراپشىلار لۋكاشەنكونىڭ جاساماق بولىپ وتىرعان كونستيتۋتسيالىق رەفورمالارىنىڭ استارىندا ءوز مۇددەسىن قورعاۋ ساياساتى جاتقانىن ءبىلىپ وتىر. كەشە بىرقاتار ساراپشىلار «الداعى ۋاقىتتا باسىم وكىلەتتىلىك سەنات توراعاسىنا بەرىلەدى» دەپ بولجام جاسادى. ال پرەزيدەنتتىڭ ورنىنا قازىرگى سەنات توراعاسى ناتاليا كوچانوۆا كەلەدى دە، ونىڭ ورنىن بۇگىنگى پرەزيدەنت الەكساندر لۋكاشەنكو باسادى. ءسويتىپ، «ەۋروپانىڭ سوڭعى ديكتاتورى» باسىم وكىلەتتىلىككە يە بولىپ، ءوز ورنى مەن بارلىق قۇقىن ساقتاپ قالادى.
26 جىل تاقتا مىزعىماي وتىرعان ادامعا بيلىكتى بەرە سالۋ وڭاي دەيمىسىڭ...
ەركىن قالدان،
«ادىرنا» ۇلتتىق پورتالى.
