الماتى قالاسىنىڭ ۋچاسكەلىك ينسپەكتورلارى كوپبالالى وتباسىنى ورتتەن قۇتقارىپ قالدى، دەپ حابارلايدى «ادىرنا» ءتىلشىسى الماتى قالاسىنىڭ پوليتسيا دەپارتامەنتىنە سىلتەمە جاساپ.
«مەن ارىپتەسىم، پوليتسيا اعا لەيتەنانتى سامات نۇروۆپەن تاڭەرتەڭ جۇمىسقا بارا جاتتىم. جانسۇگىروۆا كوشەسىنىڭ بويىمەن كەلە جاتىپ، جەكە سەكتوردان شىققان ءتۇتىن بۇلتتارىن كوردىك. كەرى قاراي بۇرىلىپ، 657 ۇيگە جۇگىردىك. مونشا ورتەنىپ جاتىر ەكەن، ءورت ۇيگە قاراي تاراپ ۇلگەرگەن. ىشىندە ادامدار بولدى. قاتتى ۇيىقتاپ جاتقاندىقتان، وتتى سەزبەدى. ولاردى ۇيدەن تەرەزە ارقىلى الىپ شىعا باستادىق. الدىمەن بالالاردى، سودان كەيىن ەرەسەكتەرگە كومەكتەستىك. وتاعاسى ارعى بولمەدەن اجەنى شىعاردى، ءبىز ونى تەرەزە الدىندا كۇتىپ الدىق. سونىمەن قاتار، كومەكتى دە شاقىردىق. پاترۋلدىك ەكيپاج كەلىپ، جاقىن ماڭداعى ۇيلەردىڭ تۇرعىندارىن ەۆاكۋاتسيالاي باستادى. ءورتتىڭ ءبىر-بىرىنە جاقىن ورنالاسقان باسقا تۇرعىن ۇيلەرگە تارالۋ قاۋپى بولدى. قۇدايعا شۇكىر، ەشكىم زارداپ شەككەن جوق »، - دەدى تۇركسىب اۋداندىق پوليتسيا باسقارماسىنىڭ ۋچاسكەلىك ينسپەكتورى، پوليتسيا لەيتەنانتى جاينات مولداعالي.
ءوز كەزەگىندە كوپبالالى انا دا پوليتسەيلەرگە العىسىن ءبىلدىردى.
«مەن پوليتسياعا وتە ريزامىن. ەگەر ولار بولماسا، ءبىز ءبارىمىز، بۇكىل وتباسى ورتەنىپ كەتەر ەدىك. جانىمىزدان ءوتىپ كەتپەي بىزگە كومەكتەسكەندەرىڭىز ءۇشىن كوپ راحمەت »، - دەدى ول.
ايتا كەتەيىك، قازىرگى تاڭدا ماماندار ءورت سەبەبىن انىقتاۋدا.
«ادىرنا» ۇلتتىق پورتالى
