اقش-تىڭ مەملەكەتتىك حاتشىسى مايك پومپەو رەسەي امەريكانىڭ دۇشپاندارى تىزىمىندە ەكەنىن ايتتى دەپ حابارلايدى "ادىرنا" ۇلتتىق پورتالى Newsroom+اقپارات سايتىنا سىلتەمە جاساپ.
«مەنەن ءاردايىم ءبىزدىڭ جاۋىمىز كىم دەپ سۇرايدى جانە بۇعان جاۋابىم: ءومىر سالتىمىزعا، رەسپۋبليكامىزعا، نەگىزگى دەموكراتيالىق قاعيدالارعا نۇقسان كەلتىرگىسى كەلەتىندەر كوپ. رەسەي ءسوزسىز وسى تىزىمدە»، – دەدى پومپەو ءوز سۇحباتىندا.ادەتتە اقش-تىڭ رەسمي وكىلدەرى رەسەيدى جاۋ ەمەس، قارسىلاس دەپ اتايدى. پومپەونىڭ ءوزى وسى اپتانىڭ باسىندا ۆاشينگتوننىڭ ماسكەۋگە دەگەن كوزقاراسى تۋرالى ايتقان كەزدە «باسەكەلەستىك» تۇجىرىمداماسىن قولداندى. مەملەكەتتىك حاتشى اقش-تىڭ بۇقارالىق اقپارات قۇرالدارىنداعى رەسەيدىڭ سوڭعى كيبەرشابۋىلدارعا قاتىسى بار دەگەن اقپاراتتى ەسكە ءتۇسىردى.
«ءبىز مۇنداي جاعدايدى وتە ۇزاق ۋاقىتتان بەرى بايقاپ كەلەمىز. اسيممەتريالىق پوتەنتسيالدى پايدالانىپ، ولار اقش-تى اقى تولەۋگە اپاراتىن جاعدايعا جەتكىزۋگە تىرىسادى»، – دەپ قوستى پومپەو.
ول سونىمەن بىرگە رەسەي باسشىلىعى «بوستاندىقتى سۇيەتىن ادامدار ءۇشىن ناقتى قاۋىپ» ەكەنىن ايتتى. سونىمەن قاتار، پومپەو رەسەيدەن كەلەتىن قاۋىپتىڭ از ەمەس ەكەنىن ايتا كەلە، قىتايدى دا اقش-قا قاۋىپ ءتوندىرىپ تۇرعان ەلدەر قاتارىنا قوستى.
