قازاقستاندىقتار ۇلتىمىزدىڭ ۇلىق مەرەكەسى – تاۋەلسىزدىك كۇنىن اتاپ وتۋدە. ءبىر وبلىستا اۆتوكولىكتەردىڭ شەرۋى ۇيىمداستىرىلسا، باسقا وڭىرلەردە وتانداستارىمىز تۋدى بالكونعا ءىلىپ، جاڭا چەللەندج باستادى، دەپ حابارلايدى قازاقپارات ءتىلشىسى. «قۇرمەتتى دوستار! قازاقستان تاۋەلسىزدىگى كۇنى قۇتتى بولسىن. ەلىمىزدىڭ ەڭ قاستەرلى مەيرامى قارساڭىندا وسلو تورىنە كوك بايراعىمىزدى ءىلىپ قويدىم! تاۋەلسىز قازاقستان جاساي بەرسىن! الەۋمەتتىك جەلىنى جىلىنا ءبىر كۇن وسىنداي كوك سارى تۇسكە ەندىرىپ، كوك تۋىمىزدى جەلبىرەتەيىك! قۇرمەتتى، دوستار وسى چەلەندجگە بارشاڭىزدى شاقىرامىن!» - دەپ جازدى تانىمال جۋرناليست بيبىگۇل جەكسەنباي.
چەللەندج كەشەدەن بەرى بىرقاتار وڭىردە قولداۋ تاۋىپ وتىر. سونىڭ ىشىندە قوستاناي وبلىسىنىڭ حالقى بيىك تۇرعىن ۇيلەردىڭ بالكوندارىنا كوك بايراعىمىزدى ءىلىپ، ۇلىق مەرەكەگە قۇرمەتىن بىلدىرۋدە. پاۆلودار وبلىسىنىڭ كوشەلەرىندەگى باننەرلەردە دە تۋىمىز كوپتەپ بەينەلەنگەن. مەملەكەتتىك تۋ وسكەمەندەگى نۇرسۇلتان نازارباەۆ كوشەسىنىڭ ۋشانوۆ الاڭى بويىنداعى ۇيلەردىڭ بالكوندارىنا ىلىنگەن. جالپى وسكەمەندەگى بوتپاي شىڭىندا قالاداعى ەڭ ۇلكەن تۋدىڭ ىلىنگەن اتاپ ءوتۋ كەرەك.
وسىلايشا «مەنىڭ تۋىم، مەنىڭ وتانىم» اكتسياسىنا قازاقستاننىڭ بارلىق دەرلىك ءوڭىرى ءۇن قوسىپ جاتىر. ايتا كەتەرلىگى، مەملەكەتتىك تۋدى پايدالانۋ اياسىن كەڭەيتۋدى قازاقستاندىقتاردىڭ وزدەرى ۇسىنعان ەدى. بۇل يدەيانى مەملەكەت باسشىسى قاسىم-جومارت توقاەۆ قولداپ، مەملەكەتتىك رامىزدەردى پايدالانۋ قاعيدالارىن قايتا قاراۋدى تاپسىرعان ەدى. ال وسى ايدىڭ باسىندا قر پرەمەر-ءمينيسترى مەملەكەتتىك تۋدى ۇيلەردىڭ قاسبەتىنە، بالكوندارعا ىلۋگە رۇقسات بەرەتىن قاۋلىعا قول قويعان بولاتىن.
