الماتىدا قازاقستان حالىق پارتياسىنىڭ وكىلدەرى قالاداعى ورتا مەكتەپتەردىڭ، سونداي-اق كوللەدجدەر مەن جوعارى وقۋ ورىندارىنىڭ پەداگوگتارىمەن جانە وقىتۋشىلارىمەن كەزدەستى. دوڭگەلەك ۇستەل «تاۋەلسىزدىك. مەملەكەت. الەۋەت.» تاقىرىبىندا ءوتتى. قاتىۋشىلار ساپالى جوعارى ءبىلىم بولماسا، ەلدى بولاشاعى بۇلىڭعىر ەكەنىنە كوز جەتكىزدى.
قحپ وكىلدەرىنىڭ پىكىرىنشە، قازاقستانداعى ءبىلىم بەرۋدىڭ نەگىزگى پروبلەماسى – ونىڭ قولجەتىمسىزدىگى. تەوريالىق تۇرعىدان العاندا ءبىزدىڭ ەلدە بارلىعىنا تەگىن ورتا بىلىمگە كەپىلدىك بەرىلگەن. الايدا كەي جەرلەردە ساپالى ءبىلىم تەك ەليتا وكىلدەرىنە عانا ارنالعانداي.
– مەيلى ول قالادا نەمەسە اۋىلدا تۇرسىن، ءار بالا، مەكتەپتىڭ ءار تۇلەگى وزدەرى قالاعان بىلىمگە قول جەتكىزۋى كەرەك، – دەدى قحپ الماتى قالالىق فيليالىنىڭ جەتەكشىسى الىبەك شاپەنوۆ.
وكىنىشكە قاراي، قازىر قازاقستانداعى ءبىلىم ەڭ دارىندى بالالارعا ەمەس، دايىندىعى جوعارى بالالارعا باعىتتالعان. ياعني، اتا-انالارى رەپەتيتورلارعا اقشا اياماعان بالالارعا عانا ارنالعانداي. نازارباەۆ زياتكەرلىك مەكتەپتەرى وقۋشىلارعا ءدال وسى قاعيدات بويىنشا تاڭداۋ جاسايدى.
– نزم-دا ءبىلىم الۋ دارىندى بالالاردىڭ بارىنە قولجەتىمدى بولۋى كەرەك. ونداعى ءبىلىم دە سالىق تولەۋشىلەر ەسەبىنەن جۇزەگە اسىرىلۋدا. مۇنداي مەكتەپتەرگە قابىلداۋ باسقا كريتەريلەر بويىنشا جۇرگىزىلۋى كەرەك! – دەدى قحپ وكىلى.
نزم وقۋشىسى اتانۋ ءۇشىن جاس ۇمىتكەرلەر بەلگىلى ءبىر ەمتيحانداردان ءوتۋى كەرەك. ولار تەك تالانت پەن قابىلەتتەردى ەمەس، وقىلعان، ۇيرەنگەن ماتەريالدىڭ كولەمىن عانا ەسكەرەدى. ياعني، اسا ءبىر جاقسى باعاسى جوق، بىراق وتە دارىندى بالالاردىڭ جولى اشىلماي قالادى.
– ەگەر اتا-انانىڭ مۇعالىمدەردى جالداۋعا مۇمكىندىگى بولماسا، ەگەر ول قانداي-دا ءبىر ءپان وقىتىلمايتىن اۋىلدىق مەكتەپتە وقيتىن بولسا، وندا مۇنداي بالانىڭ دانىشپان بولسا دا، نزم-گە تۇسۋگە مۇمكىندىگى جوق. مۇنداي قادام مەملەكەتتىڭ دامۋىنا ءسوزسىز كەرى اسەر ەتەدى. ءاربىر بالا جاقسى، ساپالى ءبىلىم الۋعا قۇقىلى! – دەدى الىبەك شاپەنوۆ.
تۇپتەپ كەلگەندە ءتيىستى ماماندار دايارلانىپ جاتقانداي. بىراق ناتيجە جوق. دەمەك، مۇنداي ءتاسىل ەلدىڭ بولاشاعىنا، ۇلتتىق قاۋىپسىزدىككە قاۋىپ توندىرەدى.
– جوعارى وقۋ ورىندارىنىڭ ساپاسىز كادرلار شوعىرىن قالىپتاستىرىپ وتىرعانى دا سوندىقتان، – دەيدى ول.
قحپ جاعدايدى جاقسارتۋ ءۇشىن نە ۇسىنىپ وتىر؟ ەڭ الدىمەن ءبىلىم بەرۋدى ساپالى، تەگىن جانە ەل حالقىنىڭ بارلىق ساناتتارى ءۇشىن قولجەتىمدى ەتۋ كەرەك.
– ءبىلىم بەرۋ – مەملەكەتتىڭ جۇيە قۇراۋشى ينستيتۋتى. ساپالى جانە قولجەتىمدى بىلىمگە ينۆەستيتسيا قۇيۋ – بۇل قازاقستاننىڭ ادامي كاپيتالىنا قۇيىلعان ينۆەستيتسيا، – دەيدى پارتيالىقتار.
