بەلگىلى ءانشى ديماش قۇدايبەرگەن «تاۋەلسىزدىك تارلاندارى» دەرەكتى فيلمىندە ارتىنان ەرگەن ءىنى-قارىنداستارىنا ءوز اقىل-كەڭەسىن ايتتى، دەپ حابارلايدى «ادىرنا» ءتىلشىسى.
«اللا تاعالا پەندەسىن ءارتۇرلى سىنايدى. بىرەۋىنە اقشانى دا، اتاقتى دا، ابىرويدى دا بەرەدى. ال ەكىنشىسىنە دىم بەرمەيدى. ول سوندا بارلىعىنا يە بولعان ادام اللاعا راحمەتىن ايتا ما، دىم الماعان ادام ءوز رەنىشىن بىلدىرە مە دەپ قارايدى. بەلگىلى ءبىر دەڭگەيگە جەتىپ كەلە جاتقان جاستار ءاپ-ساتتە بارلىعىن جوعالتىپ الۋعا بولاتىنىن ۇمىتپاعاندارىن قالايمىن»،-دەدى ول.
ءانشى وسكەلەڭ ۇرپاقتى ەڭبەكقور بولۋعا شاقىردى.
«ارمانعا قول جەتكىزۋدىڭ جالعىز جولى – تىنباي ەڭبەك ەتۋ. ءوز قالاۋىڭىزدان قول ۇزۋگە بولمايدى. كەيدە وعان جەتۋدىڭ ءساتى تۇسپەۋى مۇمكىن، كەيدە «امال نەشىك» دەيتىن جاعدايلار بولادى، ال ەندى بىردە جولىڭىز بولماي جاتادى. سونداي كەزدەردە جەتىستىككە جەتكەن ۇلى تۇلعالاردىڭ ءومىرباياندارىن وقىپ شىعىڭىز»،-دەپ كەڭەس بەردى ديماش.
سونداي-اق، ونەر يەسى سۇيىكتى اقىن-جازۋشىلارىن دا ايتا كەتتى.
«اتام مەن اجەم كىشكەنتاي كەزىمنەن ەرتەگىمەن سۋسىنداتىپ تاربيەلەدى. مەن اقىن مۇقاعالي ماقاتاەۆتىڭ پوەزياسىن جاقسى كورەمىن. ونىڭ ۇلكەن جانكۇيەرىمىن. ابايدى وقىعاندى ۇناتامىن. سونىمەن قاتار، "كۇمىس ءداۋىرىنىڭ" وكىلدەرى ماياكوۆسكي مەن گۋميلەۆتى سۇيسىنىپ وقيمىن. مەنىڭ ويىمشا، ءاربىر ءانشى ادەبيەت سالاسىنا كوز سالىپ ءجۇرۋى كەرەك، ويتكەنى بۇل ونىڭ كاسىبىمەن تىعىز بايلانىستى»،-دەدى قر ەڭبەك سىڭىرگەن قايراتكەرى.
«ادىرنا» ۇلتتىق پورتالى
