Belgili ánshi Dımash Qudaıbergen «Táýelsizdik tarlandary» derekti fılminde artynan ergen ini-qaryndastaryna óz aqyl-keńesin aıtty, dep habarlaıdy «Adyrna» tilshisi.
«Alla Taǵala pendesin ártúrli synaıdy. Bireýine aqshany da, ataqty da, abyroıdy da beredi. Al ekinshisine dym bermeıdi. Ol sonda barlyǵyna ıe bolǵan adam Allaǵa rahmetin aıta ma, dym almaǵan adam óz renishin bildire me dep qaraıdy. Belgili bir deńgeıge jetip kele jatqan jastar áp-sátte barlyǵyn joǵaltyp alýǵa bolatynyn umytpaǵandaryn qalaımyn»,-dedi ol.
Ánshi óskeleń urpaqty eńbekqor bolýǵa shaqyrdy.
«Armanǵa qol jetkizýdiń jalǵyz joly – tynbaı eńbek etý. Óz qalaýyńyzdan qol úzýge bolmaıdy. Keıde oǵan jetýdiń sáti túspeýi múmkin, keıde «amal neshik» deıtin jaǵdaılar bolady, al endi birde jolyńyz bolmaı jatady. Sondaı kezderde jetistikke jetken uly tulǵalardyń ómirbaıandaryn oqyp shyǵyńyz»,-dep keńes berdi Dımash.
Sondaı-aq, óner ıesi súıikti aqyn-jazýshylaryn da aıta ketti.
«Atam men ájem kishkentaı kezimnen ertegimen sýsyndatyp tárbıeledi. Men aqyn Muqaǵalı Maqataevtyń poezııasyn jaqsy kóremin. Onyń úlken jankúıerimin. Abaıdy oqyǵandy unatamyn. Sonymen qatar, "kúmis dáýiriniń" ókilderi Maıakovskıı men Gýmılevti súısinip oqımyn. Meniń oıymsha, árbir ánshi ádebıet salasyna kóz salyp júrýi kerek, óıtkeni bul onyń kásibimen tyǵyz baılanysty»,-dedi QR Eńbek sińirgen qaıratkeri.
«Adyrna» ulttyq portaly
