ەلەكتروندىق ۇكىمەت جانە كورسەتىلەتىن مەملەكەتتىك قىزمەتتەردىڭ دەڭگەيىن كوتەرۋ – ەل باسشىلىعى مەن مينيسترلىك جۇمىسىنىڭ ماڭىزدى باعىتتارىنىڭ ءبىرى.
ءوءمىر بويى، ءارتۇرلى ومىرلىك جاعدايلاردا، ءاربىر ازامات مەملەكەتتىك قىزمەتتەردى الۋ قاجەتتىلىگىنە تاپ بولاتىنى داۋسىز. ءبىرى نەكەسىن زاڭدى تىركەۋگە نيەتتەنسە، ەكىنشىسى بالاسىنىڭ ومىرگە كەلۋىنە بايلانىستى وعان تۋ تۋرالى كۋالىك العىسى كەلەدى، تاعى بىرىنە ەمحاناعا تىركەلۋ قاجەتتىلىگى تۋىنداسا، ەندى بىرەۋگە ءوز بيزنەسىن زاڭدى تىركەۋ كەرەك بولادى. وسىلار تەكتەس ءبىزدىڭ ءومىر سۇرۋىمىزگە قاجەتتى قىزمەت تۇرلەرى جەتەرلىك. قازىرگى كۇنى قازاقستان رەسپۋبليكاسىنىڭ مەملەكەتتىك تىزىلىمىندە ولاردىڭ سانى 740 قۇراپ وتىر. وسى 740 ءتۇرلى قىزمەتتىڭ 71,9 پايىزى تولىعىمەن اۆتومانتتاندىرىلعان جانە ءبىر تەرەزە قاعيداتى بويىنشا ۇسىنىلادى.
ەلىمىزدىڭ ازاماتتارى مەملەكەتتىك قىزمەتتەردى egov.kz پورتالى ارقىلى، MGov موبيلدىك قوسىمشاسىنىڭ جانە تەلەگرام-بوت ارقىلى ونلاين تۇردە، نەمەسە ەلىمىزدىڭ تۇكپىر-تۇكپىرىندە ورنالاسقان بارلىعى 359 حالىققا قىزمەت كورسەتۋ ورتالىقتارىنىڭ كەڭسەلەرى ارقىلى وفلاين تۇردە دە الا الادى.
2019 جىلدىڭ 6 ايىندا قازاقستاندىقتار بارلىعى 23,5 ملن قىزمەتتى "ەلەكتروندىق ۇكىمەت" پورتالى ارقىلى، ال 15 ملن قىزمەتتى "ازاماتتارعا ارنالعان ۇكىمەت" مەملەكەتتىك كورپوراتسياسىنىڭ كەڭسەلەرى ارقىلى العان.
مەملەكەتتىك قىزمەتتەردى اۆتوماتتاندىرۋ جانە وڭتايلاندىرۋ "تسيفرلىق قازاقستان"مەملەكەتتىك باعدارلاماسىنىڭ نەگىزگى باعىتتارىنىڭ ءبىرى بولىپ تابىلادى. وسى باعىت شەڭبەرىندە مەملەكەتتىك قىزمەت كورسەتۋ ساپاسىن ارتتىرۋ ءۇشىن مەملەكەتتىك ورگانداردىڭ بارلىق پروتسەستەرى مەن جۇيەلەرىن ينتەگراتسيالاۋ جانە قاعاز قۇجاتتار مەن انىقتامالاردى الىپ تاستاۋ جوسپارلانىپ وتىر.
بۇگىندە مينيسترلىكتەر مەن ۆەدومستۆولاردىڭ جۇيەلەرىن ىقپالداستىرۋدىڭ ارنايى جوسپارى ازىرلەنىپ، ىسكە اسىرىلۋدا، سونىڭ ارقاسىندا ءارتۇرلى ۆەدومستۆولىق جۇيەلەر اراسىندا دەرەكتەرمەن اۆتوماتتى الماسۋ جولعا قويىلادى. 2019 جىلى 196 ينتەگراتسيا، ال 2020 جىلى تاعى 39 ينتەگراتسيا بولادى دەپ جوسپارلانۋدا.
"Smart Bridge"جوباسى ءوزارا ىقپالداسۋ پروتسەسىن جەدەلدەتۋگە ارنالىپ وتىر. ونىڭ ماقساتى مەملەكەتتىك ورگانداردىڭ بارلىق اقپاراتتىق جۇيەلەرى مەن دەرەكقورلارى ءۇشىن بىرىڭعاي پلاتفورما قۇرۋ، سونداي-اق بارلىق ينتەگراتسيالىق راسىمدەردى جەڭىلدەتۋ بولىپ تابىلادى.
مەملەكەتتىك قىزمەتتەردى اۆتوماتتاندىرۋ جانە وڭتايلاندىرۋ بويىنشا جۇمىسقا بارلىق مەملەكەتتىك ورگاندار-قىزمەت كورسەتۋشىلەر تارتىلعان. بۇل ۇدەرىستىڭ ۇيلەستىرۋشىسى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى.
بۇدان باسقا، "تسيفرلىق قازاقستان" مەملەكەتتىك باعدارلاماسىن ىسكە اسىرۋ شەڭبەرىندە، سونداي-اق تۇڭعىش پرەزيدەنتتىڭ "بولاشاقتىڭ تسيفرلىق ەكونوميكاسىن", اتاپ ايتقاندا "اۋقىمدى دەرەكتەر" جانە "جاساندى ينتەللەكتتى" دامىتۋدى قامتاماسىز ەتۋ جونىندەگى تاپسىرمالارىن ورىنداۋ ماقساتىندا "دەرەكتەردىڭ بىرىڭعاي قويماسى" جوباسىن ەنگىزۋ كۇتىلۋدە.
2020 جىلدىڭ 10 جەلتوقسانىندا وتكەن ۆەدومستۆوارالىق كوميسسيانىڭ وتىرىسىندا تسيفرلاندىرۋ ماسەلەلەرى تالقىلانعان ەدى.
وتىرىستا جوعارىدا ايتىلعان ماسەلەلەر، مەملەكەتتىڭ، وسى سالاعا جاۋاپتى مينيسترلىك پەن مەملەكەتتىك ورگانداردىڭ جۇزەگە اسىرىپ جاتقان، بولاشاقتا جۇزەگە اسىرىلۋى جوسپارلانعان ءىس-شارالار جايىندا ءسوز قوزعالدى.
سونىمەن قاتار «تسيفرلىق قۇجاتتار» جوباسىن ىسكە اسىرۋ بويىنشا مىندەتتەر، قىزمەتتەردى ۇزدىكسىز ۇسىنۋ مۇمكىندىكتەرى جانە باسقا دا ماسەلەلەر قارالدى.
قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى قۇجاتتاردىڭ تۇپنۇسقاسىن ۇسىنۋ قاجەتتىلىگىن بولدىرمايتىن «تسيفرلىق قۇجاتتار» سەرۆيسىن ىسكە اسىرعاندىعى اتار ءوتىلدى.
قازىرگى ۋاقىتتا سەرۆيستە مىنانداي 9 قۇجات ۇسىنىلعان: قازاقستان رەسپۋبليكاسى ازاماتىنىڭ جەكە كۋالىگى، نەكەنى تىركەۋ نەمەسە بۇزۋ تۋرالى، بالانىڭ تۋى تۋرالى جانە اتىن، تەگىن، اكەسىنىڭ اتىن وزگەرتۋ تۋرالى كۋالىكتەر، جۇرگىزۋشى كۋالىگى، ءبىلىمى تۋرالى ديپلوم، ستۋدەنتتىك بيلەت، پتر-تەست ناتيجەسى.
اعىمداعى كەزەڭدە بۇل قۇجاتتاردى زاڭدى تۇردە قولدانۋعا بولادى. ويتكەنى «اقپاراتتاندىرۋ تۋرالى» زاڭدا ەلەكتروندىق قۇجاتتار تسيفرلىق قۇجاتتار سەرۆيسى ارقىلى قالىپتاستىرىلادى، تەكسەرىلەدى جانە پايدالانىلادى، ياعني قاعاز قۇجاتتارمەن قاتار قولدانىلا الادى دەگەن نورما ەنگىزىلگەن.
تاعى ءبىر ەلەڭ ەتكىزگەن جاڭالىق، ول قۇجاتتاردىڭ تۇپنۇسقالارىن مىندەتتى تۇردە ۇسىنۋ تالاپ ەتىلمەيتىن پروتسەستەردى وڭتايلاندىرۋ بويىنشا ۇسىنىستار بەرىلدى. قۇجاتتىڭ ەلەكتروندىق نۇسقاسىنىڭ زاڭدى كۇشى بولا تۇرا، قاعاز جۇزىندەگى تۇپنۇسقاسىن تالاپ ەتۋ نەگىزى ارتىق ەكەنى داۋسىز.
سونىمەن قاتار، 2020 جىلى مەملەكەتتىك كورسەتىلەتىن قىزمەتتەردىڭ 90% - دان استامى ەلەكتروندىق فورماتتا قولجەتىمدى بولادى. بۇل اقپاراتتىق جۇيەلەردىڭ ۇزدىكسىز جۇمىسىنىڭ وزەكتىلىگىن ارتتىرادى. سول سەبەپتى اقپاراتتىق جۇيەلەردىڭ ىركىلىستەرىن ۇزدىكسىز قامتاماسىز ەتۋ جانە مونيتورينگ جۇرگىزۋ ماقساتىندا قازىرگى ۋاقىتتا «زەردە» ۇلتتىق ينفوكوممۋنيكاتسيا حولدينگى » اق تەحنولوگيالىق پروتسەستەرگە قاتىسۋشىلار اراسىندا جاۋاپكەرشىلىكتى شەكتەۋ بويىنشا «ۇلتتىق اقپاراتتىق تەحنولوگيالار» اق-مەن بىرلەسكەن جۇمىستار جۇرگىزۋدە.
وسى جۇمىستاردى وڭتايلاندىرۋعا مۇمكىندىك بەرەتىن SLA (Service Level Agreement, قىزمەت كورسەتۋ دەڭگەيى تۋرالى كەلىسىم) قاعيداتى بويىنشا مەملەكەتتىك ورگاندارمەن كەلىسىمدەر جاساۋدى قامتاماسىز ەتۋ ۇسىنىلدى.
ازاماتتىق حال اكتىلەرىن تىركەۋ بويىنشا ەلەكتروندىق قىزمەت كورسەتۋدى قامتاماسىز ەتۋ ماقساتىندا ازاماتتىق حال اكتىلەرىن مەملەكەتتىك تىركەۋ تۋرالى كۋالىكتەردى قاعاز نىساندا بەرۋدى بولدىرماۋ بولىگىندە 25 نورماتيۆتىك قۇقىقتىق اكتىلەرگە وزگەرىستەر ەنگىزۋ ماسەلەسى قارالدى.
قىزمەت كورسەتۋ ناتيجەسى قىزمەتتى الۋشىنىڭ Egov پورتالىنداعى جەكە كابينەتى ارقىلى قولجەتىمدى ازاماتتىق حال اكتىلەرىن مەملەكەتتىك تىركەۋ تۋرالى QR-كودى بار ەلەكتروندىق انىقتاما بولاتىنى كۇتىلۋدە.
بۇدان باسقا، قازاقستان رەسپۋبليكاسىنىڭ ىشكى ىستەر مينيسترلىگى، ءبىلىم جانە عىلىم مينيسترلىگى، اۋىل شارۋىشىلىق مينيسترلىكتەرىندە سۇرانىسقا يە قىزمەتتەر دە قارالدى.
وسىلايشا، قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ءبىلىم جانە عىلىم مينيسترلىگىمەن بىرگە الەۋمەتتىك سيپاتتاعى ءبىلىم بەرۋ قىزمەتتەرى بويىنشا بەلسەندى فورماتتى ەنگىزۋدى جوسپارلاۋدا. مىسالى، ۇيدە تەگىن وقىتۋ، مەكتەپ جانىنداعى لاگەرلەرگە مەكتەپ وقۋشىلارىنا جولداما بەرۋ، اۋىلدىق مەكەندەرگە تەگىن جەتكىزۋ جانە جەڭىلدىكپەن تاماقتانۋ.
بولاشاقتا پەرنەتاقتانى ءتۇرتىپ قانا، كومپيۋتەردىڭ ەكرانىنا قاراپ وتىرىپ، بارلىق شارۋانى تىندىرىپ، قاجەتتى قۇجاتتاردىڭ بارلىعىنا قول جەتكىزەمىز دەگەن سەنىم زور.
ەركە جومارت،
«ادىرنا» ۇلتتىق پورتالى
