وسىدان ەكى اي بۇرىن ەلىمىزدە بۇقارالىق اقپارات قۇرالدارى مەن تەلەراديو حابارلارىن تاراتۋ قىزمەتكەرلەرىنىڭ «BAQ KASIPODAQ» سالالىق كاسىپوداعى» قۇرىلعانىن حابارلاعان ەدىك. «ادىرنا» ۇلتتىق پورتالىنىڭ كەزەكتى سۇحباتى ۇيىم توراعاسى، بەلگىلى جۋرناليست زەيىن الىپبەكپەن بولدى.
– زەيىن مىرزا، بۇگىنى كاسىپوداق ءوزىنىڭ ايتارلىقتاي ىقپالىن جوعالتىپ العان جوق پا؟
– اڭگىمە ەلىمىزدەگى جالپى كاسىپوداق تۋرالى بولسا، ولاردى پارمەندىلىگىن جوعالتىپ الدى دەگەننەن گورى ءوز قۇزىرەتىن ءتيىمدى پايدالانا الماي وتىر دەگەن دۇرىس پا دەپ ويلايمىن. بۇگىنگى كاسىپوداقتاردىڭ دەنى شيپاجايلارعا باعاسىن ارزانداتىپ جولداما بەرۋ، جاڭا جىلدىق تاتتىلەر تاراتۋ، مەرەكەلىك جيىندار وتكىزۋ سەكىلدى دۇنيەلەرمەن شەكتەلىپ وتىرعانداي كورىنەدى كەيدە ماعان. ال، انىعىندا كاسىپوداقتىڭ قۇزىرەتى وتە ۇلكەن. ماسەلەن، كاسىپوداقتار بارلىق دەڭگەيدەگى مەملەكەتتىك بيلىك ورگاندارىمەن، جۇمىس بەرۋشىلەرمەن جانە ولاردىڭ بىرلەستىكتەرىمەن، ساياسي پارتيالار مەن وزگە دە قوعامدىق ۇيىمدارمەن تەڭ قۇقىلى ءوزارا قارىم-قاتىناس جاساي الادى. ءتيىستى مەملەكەتتىك ورگاندارعا ەڭبەكاقى تولەۋ، جۇمىسپەن قامتۋ، ەڭبەكتى قورعاۋ، ەكولوگيالىق قاۋىپسىزدىك جانە الەۋمەتتىك-ەڭبەك قاتىناستارىنا قاتىستى ماسەلەلەر بويىنشا زاڭ جوبالارى مەن وزگە دە ءنورماتيۆتى قۇقىقتىق اكتىلەردى ازىرلەۋ جانە قاراۋ تۋرالى ۇسىنىستار ەنگىزۋ قۇزىرەتى بار. نەگە وسى مۇمكىندىكتەردى پايدالانباسقا؟ بۇقارالىق اقپارات قۇرالدارى مەن تەلەراديو حابارلارىن تاراتۋ قىزمەتكەرلەرىنىڭ «BAQ KASIPODAQ» سالالىق كاسىپوداعى ءوزىنىڭ زاڭ اياسىنداعى وسى مۇمكىندىكتەرىن تولىعىمەن پايدالانۋدى كوزدەپ وتىر. بۇل – ماسەلەلەردى جۇيەلى تۇردە شەشۋگە جول اشادى.
– «BAQ KASIPODAQ» سالالىق كاسىپوداعىن قۇرۋعا نە تۇرتكى بولدى؟ قالاي قۇرىلدى؟
– شەرحان مۇرتازا اعامىزدىڭ «ءجۋرناليستىڭ ارقالاعانى – التىن، جەگەنى – جانتاق» دەگەن ايگىلى اۋەزەسى ءالى كۇنگە دەيىن وزەكتى. وزدەرىنەن كومەك سۇراپ كەلگەن ادامداردىڭ ماسەلەلەرىن شەشىپ بەرىپ جۇرەتىن ءتىلشى قاۋىمنىڭ وزدەرىنىڭ الەۋمەتتىك تۇيىندەرى تارقاتىلماعان. ارىپتەستەرىمىز تۇرعىن ۇيمەن قامتۋ مەملەكەتتىك باعدارلامالارىمەن ءۇي الۋ مۇمكىندىگىنەن جىلدار بويى قاعىلىپ كەلەدى. مەملەكەتتىك يدەولوگيانى جۇزەگە اسىرىپ كەلە جاتقان جۋرناليستەردىڭ ەلىمىزگە سىڭگەن ەڭبەگى ەرەن ەمەس دەپ كىم ايتا الادى؟ جۋرناليستەردىڭ مارتەبەسى ايقىندالماعاندىقتان وسىنداي ولقىلىققا جول بەرىلدى. بۇل - بۇقارالىق اقپارات قۇرالدارى قىزمەتكەرلەرىنە جاسالعان ادىلەتسىزدىك سەكىلدى سەزىلەدى. سوندىقتان، باسپانا – جۋرناليستەردىڭ بۇگىنگى باستى ماسەلەسى. قازىر ارىپتەستەرىمىز مادەنيەت، سپورت جانە بايلانىس سالاسىنا قاتىستى ءتۇرلى كاسىپوداقتار قۇرامىندا، ارقايسىسى ءار جاقتا ءجۇر. بۇل - كەزىندەگى مينيسترلىك قۇرىلىمىنىڭ ءار جىلدارى وزگەرىپ وتىرۋىنا بايلانىستى بولسا كەرەك. البەتتە، ءار سالا ءوز قىزمەتكەرلەرىن عانا ويلايتىنى ءمالىم. مىنە، وسىدان كەلىپ جۋرناليستەردىڭ باسپانادان باسقا دا كوپتەگەن الەۋمەتتىك ماسەلەلەرى شەشىلمەگەن كۇيى كەلە جاتىر. بۇكىل ءتىلشى اعايىننىڭ بارلىعىنىڭ باسىن قوسىپ، قيىندىقتارمەن بىرگە كۇرەسۋگە مۇمكىندىك بەرەتىن جەكە سالالىق كاسىپوداقتىڭ قاجەتتىگى بايقالدى. كاسىپوداقتى قۇرۋعا تۇرتكى بولعان نارسە – وسى. مۇنداي وي بۇرىننان جۇرەتىن. وسىنداي كاسىپوداق قۇرىلىپ، وعان جەتەكشىلىك جاساۋ ۇسىنىلعاندا باس تارتپادىم. سەبەبى، بۇل – مەن ءۇشىن جۋرناليستەردىڭ باسىنداعى تۇيتكىلدەردى تارقاتۋ جولىندا ارەكەت ەتۋىمە بەرىلىپ وتىرعان مۇمكىندىك.
– بۇل كاسىپوداق الدىنا قانداي ماقساتتار مەن مىندەتتەر قويىپ وتىر؟
– ءبىر سوزبەن ايتار بولساق، جۋرناليستەردىڭ الەۋمەتتىك-قۇقىقتىق ماسەلەلەرىن شەشۋگە اتسالىسۋدى مۇرات ەتىپ وتىرمىز. ارىپتەستەرىمىز ءۇشىن ساپالى مەديتسينانىڭ قولجەتىمدى بولعانىن قالايمىز، سپورت نىساندارىنا بارۋ مۇمكىندىگىنىڭ ارتۋىن دۇرىس كورەمىز، دۇرىس دەمالىپ، ساناتوريلەردە جۇرت قاتارلى ەم العانىن ءجون سانايمىز، تەاتر مەن مۋزەي سەكىلدى مادەنيەت وشاقتارىنا بارۋىنا جولدىڭ كەڭىنەن اشىلعانىن قۇپ سانايمىز. جۇمىس ورىندارى جارمەڭكەسىن ۇيىمداستىرۋدى، وتاندىق جانە شەتەلدىك ساراپشىلاردى تارتا وتىرىپ جۋرناليستەرگە وقىتۋ كۋرستارىن وتكىزۋدى، «جاس جۋرناليستەر مەكتەبى» جوباسىن جۇزەگە اسىرۋدى جوسپارلاپ وتىرمىز.
– وسى ۋاقىتقا دەيىن جۋرناليستەر كوبىنە قانداي ارىز-شاعىمدارمەن كومەككە جۇگىندى؟
– كاسىپوداقتىڭ قۇرىلعانىنا كوپ بولعان جوق. سوندىقتان بولار، ءال-ءازىر ناقتى جۇمىس بەرۋشىلەرگە بايلانىستى كومەككە جۇگىنە قويمادى. قول ۇشىن بەرۋدى سۇراپ جاتسا كومەك قولىن سوزۋعا دايىنبىز. ءتيىستى ماماندارىمىز بار. زاڭگەرلەرىمىز كەڭەس بەرۋگە ءازىر.
– جۇمىسشى مۇددەسىن قورعاۋدا الدا تاعى قانداي شارالار اتقارىلماق؟
– جۋرناليستەرگە ارناپ ەڭبەك قاۋىپسىزدىگى مەن ەڭبەكتى قورعاۋ بويىنشا قىسقا مەرزىمدى كۋرستار وتكىزۋدى جوسپارلاپ وتىرمىز. وندا توتەنشە جاعداي، تەحنوگەندىك اپات، اسكەري ارەكەتتەر كەزىندە جۇمىس ىستەۋ تاقىرىپتارى قامتىلاتىن بولادى. سونىمەن قاتار، زاڭ شىعارۋشى جانە اتقارۋشى ورگاندارعا باق جانە تەلەراديوحابارلارىن تاراتۋ قىزمەتكەرلەرىنىڭ جۇمىسىنىڭ قاۋىپسىز بولۋىنا كەدەرگى كەلتىرەتىن زاڭدىق كەدەرگىلەردى جويۋعا قاتىستى ۇسىنىستار ازىرلەمەك ويىمىز بار.
– كاسىپوداققا قالاي كىرۋگە بولادى؟
– قازىر كاسىپوداققا ونلاين كىرۋگە بولادى. كاسىپوداقتىڭ www.baqko.kz رەسمي سايتى ارقىلى ءوتىنىش جازسا جەتكىلىكتى. ال، نەگىزى كەڭسەمىز نۇر-سۇلتان قالاسىنداعى قازمەديا ورتالىعىندا. مەكەنجايى – قوناەۆ كوشەسى، 4-ءۇي. باسقا كاسىپوداققا مۇشە بولا المايدى. جارنا مولشەرى زاڭعا سايكەس - ەڭبەكاقىنىڭ 1 پروتسەنتى. فريلانسەرلەر 0,5 ايلىق ەسەپتىك كورسەتكىش كولەمىندە جارنا تولەيدى. زەينەت جاسىنداعى ادامدار مەن ستۋدەنتتەر جارنا تولەمەيدى. بۇكىل ارىپتەستەرىمدى بۇقارالىق اقپارات قۇرالدارى قىزمەتكەرلەرىنىڭ ءتول كاسىپوداعىنا مۇشە بولۋعا شاقىرامىن. «BAQ KASIPODAQ» سالالىق كاسىپوداعىنا بىرىگەيىك. ءوز ماسەلەلەرىمىزدى ءوزىمىز شەشپەسەك بولمايدى. وعان مۇمكىندىك جەتكىلىكتى.
«ادىرنا» ۇلتتىق پورتالى
