Osydan eki aı buryn elimizde Buqaralyq aqparat quraldary men teleradıo habarlaryn taratý qyzmetkerleriniń «BAQ KASIPODAQ» salalyq kásipodaǵy» qurylǵanyn habarlaǵan edik. «Adyrna» ulttyq portalynyń kezekti suhbaty uıym tóraǵasy, belgili jýrnalıst Zeıin Álipbekpen boldy.
– Zeıin myrza, búgini kásipodaq óziniń aıtarlyqtaı yqpalyn joǵaltyp alǵan joq pa?
– Áńgime elimizdegi jalpy kásipodaq týraly bolsa, olardy pármendiligin joǵaltyp aldy degennen góri óz quzyretin tıimdi paıdalana almaı otyr degen durys pa dep oılaımyn. Búgingi kásipodaqtardyń deni shıpajaılarǵa baǵasyn arzandatyp joldama berý, jańa jyldyq táttiler taratý, merekelik jıyndar ótkizý sekildi dúnıelermen shektelip otyrǵandaı kórinedi keıde maǵan. Al, anyǵynda kásipodaqtyń quzyreti óte úlken. Máselen, kásipodaqtar barlyq deńgeıdegi memlekettik bılik organdarymen, jumys berýshilermen jáne olardyń birlestikterimen, saıası partııalar men ózge de qoǵamdyq uıymdarmen teń quqyly ózara qarym-qatynas jasaı alady. Tıisti memlekettik organdarǵa eńbekaqy tóleý, jumyspen qamtý, eńbekti qorǵaý, ekologııalyq qaýipsizdik jáne áleýmettik-eńbek qatynastaryna qatysty máseleler boıynsha zań jobalary men ózge de normatıvti quqyqtyq aktilerdi ázirleý jáne qaraý týraly usynystar engizý quzyreti bar. Nege osy múmkindikterdi paıdalanbasqa? Buqaralyq aqparat quraldary men teleradıo habarlaryn taratý qyzmetkerleriniń «BAQ KASIPODAQ» salalyq kásipodaǵy óziniń zań aıasyndaǵy osy múmkindikterin tolyǵymen paıdalanýdy kózdep otyr. Bul – máselelerdi júıeli túrde sheshýge jol ashady.
– «BAQ KASIPODAQ» salalyq kásipodaǵyn qurýǵa ne túrtki boldy? Qalaı quryldy?
– Sherhan Murtaza aǵamyzdyń «Jýrnalıstiń arqalaǵany – altyn, jegeni – jantaq» degen áıgili áýezesi áli kúnge deıin ózekti. Ózderinen kómek surap kelgen adamdardyń máselelerin sheship berip júretin tilshi qaýymnyń ózderiniń áleýmettik túıinderi tarqatylmaǵan. Áriptesterimiz turǵyn úımen qamtý memlekettik baǵdarlamalarymen úı alý múmkindiginen jyldar boıy qaǵylyp keledi. Memlekettik ıdeologııany júzege asyryp kele jatqan jýrnalısterdiń elimizge sińgen eńbegi eren emes dep kim aıta alady? Jýrnalısterdiń mártebesi aıqyndalmaǵandyqtan osyndaı olqylyqqa jol berildi. Bul - buqaralyq aqparat quraldary qyzmetkerlerine jasalǵan ádiletsizdik sekildi seziledi. Sondyqtan, baspana – jýrnalısterdiń búgingi basty máselesi. Qazir áriptesterimiz mádenıet, sport jáne baılanys salasyna qatysty túrli kásipodaqtar quramynda, árqaısysy ár jaqta júr. Bul - kezindegi mınıstrlik qurylymynyń ár jyldary ózgerip otyrýyna baılanysty bolsa kerek. Álbette, ár sala óz qyzmetkerlerin ǵana oılaıtyny málim. Mine, osydan kelip jýrnalısterdiń baspanadan basqa da kóptegen áleýmettik máseleleri sheshilmegen kúıi kele jatyr. Búkil tilshi aǵaıynnyń barlyǵynyń basyn qosyp, qıyndyqtarmen birge kúresýge múmkindik beretin jeke salalyq kásipodaqtyń qajettigi baıqaldy. Kásipodaqty qurýǵa túrtki bolǵan nárse – osy. Mundaı oı burynnan júretin. Osyndaı kásipodaq qurylyp, oǵan jetekshilik jasaý usynylǵanda bas tartpadym. Sebebi, bul – men úshin jýrnalısterdiń basyndaǵy túıtkilderdi tarqatý jolynda áreket etýime berilip otyrǵan múmkindik.
– Bul kásipodaq aldyna qandaı maqsattar men mindetter qoıyp otyr?
– Bir sózben aıtar bolsaq, jýrnalısterdiń áleýmettik-quqyqtyq máselelerin sheshýge atsalysýdy murat etip otyrmyz. Áriptesterimiz úshin sapaly medıınanyń qoljetimdi bolǵanyn qalaımyz, sport nysandaryna barý múmkindiginiń artýyn durys kóremiz, durys demalyp, sanatorıılerde jurt qatarly em alǵanyn jón sanaımyz, teatr men mýzeı sekildi mádenıet oshaqtaryna barýyna joldyń keńinen ashylǵanyn qup sanaımyz. Jumys oryndary jármeńkesin uıymdastyrýdy, otandyq jáne sheteldik sarapshylardy tarta otyryp jýrnalısterge oqytý kýrstaryn ótkizýdi, «Jas jýrnalıster mektebi» jobasyn júzege asyrýdy josparlap otyrmyz.
– Osy ýaqytqa deıin jýrnalıster kóbine qandaı aryz-shaǵymdarmen kómekke júgindi?
– Kásipodaqtyń qurylǵanyna kóp bolǵan joq. Sondyqtan bolar, ál-ázir naqty jumys berýshilerge baılanysty kómekke júgine qoımady. Qol ushyn berýdi surap jatsa kómek qolyn sozýǵa daıynbyz. Tıisti mamandarymyz bar. Zańgerlerimiz keńes berýge ázir.
– Jumysshy múddesin qorǵaýda alda taǵy qandaı sharalar atqarylmaq?
– Jýrnalısterge arnap eńbek qaýipsizdigi men eńbekti qorǵaý boıynsha qysqa merzimdi kýrstar ótkizýdi josparlap otyrmyz. Onda tótenshe jaǵdaı, tehnogendik apat, áskerı áreketter kezinde jumys isteý taqyryptary qamtylatyn bolady. Sonymen qatar, zań shyǵarýshy jáne atqarýshy organdarǵa BAQ jáne teleradıohabarlaryn taratý qyzmetkerleriniń jumysynyń qaýipsiz bolýyna kedergi keltiretin zańdyq kedergilerdi joıýǵa qatysty usynystar ázirlemek oıymyz bar.
– Kásipodaqqa qalaı kirýge bolady?
– Qazir kásipodaqqa onlaın kirýge bolady. Kásipodaqtyń www.baqko.kz resmı saıty arqyly ótinish jazsa jetkilikti. Al, negizi keńsemiz Nur-Sultan qalasyndaǵy Qazmedıa ortalyǵynda. Mekenjaıy – Qonaev kóshesi, 4-úı. Basqa kásipodaqqa múshe bola almaıdy. Jarna mólsheri zańǵa sáıkes - eńbekaqynyń 1 proenti. Frılanserler 0,5 aılyq eseptik kórsetkish kóleminde jarna tóleıdi. Zeınet jasyndaǵy adamdar men stýdentter jarna tólemeıdi. Búkil áriptesterimdi buqaralyq aqparat quraldary qyzmetkerleriniń tól kásipodaǵyna múshe bolýǵa shaqyramyn. «BAQ KASIPODAQ» salalyq kásipodaǵyna birigeıik. Óz máselelerimizdi ózimiz sheshpesek bolmaıdy. Oǵan múmkindik jetkilikti.
«Adyrna» ulttyq portaly
