جۋىردا ستامبۇل قالاسىندا الەمنىڭ 18 مەملەكەتىنەن 120-دان استام جۋرناليستەر باس قوستى. شارانىڭ ماقساتى – Turkish Airlines كومپانياسىنىڭ قىزمەت ساپاسىمەن تانىسۋ، سونداي-اق، ستامبۇلدىڭ تاريحي جانە كوركەم ورىندارىن ناسيحاتتاۋ.
ءبىزدى Turkish Airlines كومپانياسىنىڭ الماتىداعى فيليالىنىڭ ماركەتينگ جانە ساتۋ ءبولىمىنىڭ مەنەدجەرى جىبەك قامشىباەۆا باستاپ باردى. الماتىدان بەس كىسى (جىبەك، يرينا، دانا، ەركەبۇلان جانە وسى جولداردىڭ اۆتورى) بولىپ شىقتىق. مەن "تۇركى الەمى" گازەتىنىڭ اتىنان باردىم. ستامبۇلدا قازاقستانمەن قاتار قىرعىزستاننان جانە تاجىكستاننان كەلگەن جۋرناليستەر جەكە توپ رەتىندە توپتاستىرىلىپ، ءۇش كۇن بىرگە بولدىق.
ءبىر تاڭقالارلىعى، ءبىزدىڭ ورنالاسقان قوناق ءۇيىمىز (Radission Blu) ستامبۇلداعى قازاقتار ءجيى قونىستانعان زەيتىنبۇرنۋ اۋدانىندا ەكەن. قوناق ءۇيدىڭ سىرتى قانداي ساۋلەتتى، سۇلۋ بولسا، ىشكى جاعدايى مەن قىزمەت كورسەتۋى دە سونداي جوعارى دەڭگەيدە بولادى.
العاشقى كۇنى ستامبۇلدى ورتاسىنان ەكىگە ءبولىپ تۇرعان ءمارمار (مارمارا) تەڭىزىنىڭ بوسفور بۇعازىن كەمەمەن ارلى-بەرلى كەسىپ ءوتىپ ساياحات جاسادىق. 2014 جىلى تۋرا وسى قالادا ەكى اپتاداي وقۋ تاجىربيەسىمەن بولعان ەدىم. سول ساپارىمدا باسقا-باسقا ءدال وسى ءمارمار تەڭىزى مەن ونىڭ ۇسىتىندە قالىقتاپ قانات قاققان اق شاعالالارمەن قيماي-قيماي قوشتاسقان بولاتىنمىن. ەندى، مىنە، سول سۇيىكتى تەڭىزىمنىڭ جاعاسىندا سايران سالىپ ۇشقان اق شاعالالارمەن قايتا قاۋىشىپ وتىرعانىما ەرەكشە قۋاندىم. كەمە ىشىندە ءار ءتۇرلى ۇلتتاردىڭ مۋزىكاسى وينالىپ، سول ۇلتتىڭ وكىلدەرى سوعان قوسىلىپ ءان ايتىپ، بي بيلەپ جاتتى. ءبىز دە قاراپ قالماي ءشامشىنىڭ ايگىلى "ارىس جاعاسىندا" ءانىن ينتەرنەتتەن تاۋىپ قوستىردىق. قازاقتىڭ شالقار ءانى ءتۇرلى ۇلتتار مەن ۇلىستاردىڭ، ەۋروپا مەن ازيانىڭ توعىسقان تورابىندا، ءمارمار تەڭىزىندە تەربەتىلىپ ءجۇزىپ بارا جاتقان كەمە ىشىندە شىرقالعانى – ءتىپتى ەرەكشە اسەر ەتتى. ءبىزدىڭ كوڭىلدە دە ايرىقشا ماقتانىش سەزىمى ورنادى. شاما-شارقىمىزشا ءبىز دە انگە قوسىلىپ وتىردىق.
كەشكى بوسفوردىڭ سامالى كوڭىلگە شاتتىق سىيلاپ، جانىمىز جادىراپ سالا بەردى. كەمە تەڭىز جاعالاۋىندا ورنالاسقان سۇلۋ دا سىرلى رەستورانعا بارىپ تۇمسىق تىرەپ توقتادى. ءبىز سوندا كەشكى اس ءىشىپ، تاماقتاندىق. جاپون، كورەي ەلدەرىنەن كەلگەن جۋرناليستەرمەن ەمەن-جارقىن اڭگىمە-دۇكەن قۇرىپ كوڭىل كوتەردىك.
ەكىنشى كۇنى تۇسكە دەيىن Turkish Airlines كومپانياسى ۇشقىشتارىنىڭ جاتتىعۋ، اس ءمازىرىن ازىرلەۋ ورتالىقتارىندا بولدىق. ۇشقىشتاردى ازىرلەۋ قۇرىلعى تەحنولوگيالارى مەن ءادىس-تاسىلدەرى جىل سايىن جاڭارىپ وتىراتىن ورتالىقتا جۋرناليستەر ۇشاق سيمۋلياتورلارىن "جۇرگىزىپ" ەرەكشە لاززاتقا بولەندى. بۇل ورتالىقتان جىل سايىن 10 مىڭنان استام ادام ۇشقىشتىققا تاربيەلەنىپ وتىرادى ەكەن. بۇدان كەيىن كومپانيانىڭ اس ازىرلەۋ كومبيناتتارىندا بولىپ، ءدامى ءتىل ۇيىرەر ءدامدى تاعامداردىڭ ازىرلەنۋ ادىستەرىمەن تانىستىق. جۇزدەگەن ادام بىرلەسىپ جاسالىپ جاتقان جۇمىسقا سىرتتاي قاراپ تەك سۇيسىنۋگە بولادى. ءاربىر تاعامدى جوعارى دەڭگەيدەگى تالعامپازدىقپەن بەزەندىرىپ، بىردەي ۇلگىدە دايىندايتىنى قايران قالدىردى.
Turkish Airlines كومپانياسىنىڭ قاتارىنان 6 جىل بويى ەۋروپانىڭ ەڭ ۇزدىك اۋە كومپانياسى اتاعىن جەڭىپ الىپ وتىرعانىنىڭ سىرىن ەندى تۇسىنگەندەي بولدىق. اۋزىن ايعا بىلەگەن ەۋروپا ەلدەرى وڭايلىقپەن مۇنداي مارتەبەلى اتاقتى تۇركيالىق كومپانياعا جايدان-جاي قولدان بەرىپ قويىپ وتىرماسى انىق، ارينە. Turkish Airlines كومپانياسى سول اتاققا ساي حالىققا قىزمەت ەتىپ كەلە جاتقان الەمدىك ۇزدىك اۋە كومپانيا ەكەندىگىن كوزبەن كورىپ، كوڭىلمەن سەزىنگەندەي اسەر الدىق.
سول كۇنى تۇستەن كەيىن الەمنىڭ تۇكپىر-تۇكپىرىنەن كەلگەن جۋرناليستەر Turkish Airlines كومپانيا باسشىلىعىمەن كەزدەسۋ وتكىزدى. Turkish Airlines كومپانياسىنىڭ ديرەكتورلار كەڭەسىنىڭ توراعاسى يلكەر ايدجي تۇرىك اۋە جولى كومپانياسىنىڭ بولاشاعى، ونىڭ دامۋ ساتىلارى مەن مۇمكىندىكتەرى تۋرالى اڭگىمەلەدى. ول كەيىنگى كەزدە كەيبىر كەرىتارتپا توپتاردىڭ تەررورلىق شابۋىلدارى مەن توڭكەرىسكە ۇمتىلۋ ارەكەتتەرى سالدارىنان تۋريستەردىڭ تۇركياعا كەلۋى تومەندەپ كەتكەنىن، الايدا، قازىر تۋريستەر قاتارى كۇن ساناپ قايتا ارتىپ وتىرعانىن تىلگە تيەك ەتتى.
Turkish Airlines اۋەكومپناياسى ەۋروپا، ازيا، افريكا ايماقتارىنا تاسىمالداۋ جۇمىستارىن جۇرگىزىپ كەلەدى. كومپانيا 1933 جىلى 20 مامىردا قۇرىلعان. اۋەكومپنايا ەڭ ساپالى ءارى ەڭ جاڭا تەحنولوگيالار نەگىزىندە جابدىقتالعان. ۇشاقتارىنىڭ ورتاشا جاسى – 3 جىل. سونداي-اق، Turkish Airlines ەۋروپا مەن ازياداعى ەڭ جوعارى ساپالى دايىندىق ورتالىقتارىنا يە. 2006 جىلى جەلتوقسان ايىندا كومپانيا Star Alliance قاتارىنان كورىنە ءبىلدى. اۋەكومپانيانىڭ تۇراقتى شتاتىندا 13 000-عا جۋىق قىزمەتكەرلەر جۇمىس ىستەيدى.
ەڭ سوڭعى ءۇشىنشى ستامبۇلدىڭ ەسكى بازارلارىن ارالادىق. بىراق، ماعان توپقاپى سارايى مەن سۇلتان احمەت مەشىتىن تاماشالاۋ ءساتى ەرەكشە اسەرگە بولەدى. توپقاپى سارايى تۋرالى ەنتسەكلوپەديا دەرەكتەرى بىلاي دەيدى: "1453 جىلى II مەحمەت باستاعان وسمانلى اسكەرى كونستانتينوپول قالاسىن باسىپ الدى. سول كەزدە توپقاپى ورنىندا ۆيزانتيا يمپەراتورلارىنىڭ سارايى بولعان. بۇل سارايدىڭ قازىرگى ۋاقىتتا قالدىقتارى قالعان جوق. II مەحمەت جەڭىستەن كەيىن ۆيزانتيا سارايىنىڭ ورنىنا وسى توپقاپى سارايىن سالدىرتقان. ەڭ العاشقى 50 جىل بويى بۇل ساراي سۇلتانداردىڭ باسقارۋ رەزيدەنتسياسى بولعان. العاشقى 50 جىلدا توپقاپى سارايى سۇلتانداردىڭ تەك جۇمىس ورتالىعى عانا بولعان، وسى جاعداي II بايازيت سارايى كەزىندە دە ورىن العان. I سۇلەيمەن سارايدى قايتا سالعان. بۇل II مەحمەت نەگىزىن قالاعاننان كەيىن بولعان ەڭ ۇلكەن وزگەرىستەردىڭ ءبىرى. 1854 جىلى بۇل سارايدىڭ قۇرىلىسى جالعاستىرىلعان، 400 جىل بويى ۇلى وسمانلى مەملەكەتىنىڭ باستى سارايى بولىپ قالعان. 1923 جىلى مۇراجاي اتاندى".
مۋزەيدىڭ اۋدانى — 700 000 م². بۇدان بولەك، مۋزەيدىڭ سىرتىنان 1400 م. بولاتىن قورشاۋمەن اينالدىرىلا قورشالعان. توپقاپى جادىگەرلەرىنىڭ سانى 65 مىڭ شاماسىندا كورىنەدى.
ساپار بارىسىندا قىرعىزستان، موڭعوليايا، تاجىكستان، جاپونيا، قىتاي، ينديا، ليتۆا، يندونەزيا، فيليپين، ينديا جانە تاعى باسقا شەت ەلدەردەن كەلگەن ارىپتەستەرمەن تانىسىپ ءبىر ارقا-جارقا بولىپ قالدىق. تۇڭعىش رەت بيزنەس كلاسستا ۇشىپ مارقايىپ قالدىق. كومپانيانىڭ ءجۇزى جىلى قىزمەتشىلەرى بار ءمازىرىن ۇسىنىپ باقتى. ءدامى ءتىل ۇيىرەر ءدامدى تاعامدار، جوعارى ساپالى قىزمەت، جايلى ورىندار جانعا مايداي جاقتى. ۇشاق ىشىندە ءوزىڭىزدى ءوز ۇيىڭىزدەگىدەي ەركىن سەزىنەسىز. ءوز ورنىڭىزعا جايعاسقان سوڭ-اق اۋەسەرىكتەر گازەت-جۋرنالدىڭ ءتۇرلى-ءتۇرلىسىن ۇسىنادى. كينونىڭ، مۋزىكانىڭ اعىلشىن، تۇرىك، ورىس تىلدەرىندەگى ءتۇر-ءتۇرى قولايلى شاعىن تسەنسرلى ەكراننان جەدەل ىزدەپ تاۋىپ، قوسا الاسىز. ۇشاقتىڭ ۇشۋ اقپاراتى دا (بيىكتىك، تەمپەراتۋرا، قاشىقتىق ج.ت.ب.) كوز الدىڭىزدا تۇرادى. ۇشاق نەگىزىنەن تەڭىز دەڭگەيىنەن 10 000 مەتر بيىكتىكتە ۇشىپ وتىردى.
بيزەس-كلاسستىڭ تاماقتاندىرۋ دەڭگەيى وتە جوعارى ساپالى. وندا قالاعان ۋاقىتىڭىزدا كوڭىلىڭىز قالاعان اس ءمازىرىنىڭ تۇرلەرىنە تاپسىرىس بەرە الاسىز. بەزنەس-كلاسستا ۇشقان ۇشاق جولاۋشىلارىنا اۋەجايلاردا ارنايى دەمالىس ورىندارى ۇيىمداستىرىلعان. مەجەلى ورىنعا ەرتە بارا قالساڭىز، الگى دەمالىس ورىندارىنا قالاعانىڭىزشا ۇيىقتاپ الۋعا توسەك جايلار دا قاراستىرىلعان. جۋىنىپ-شايىنىپ الۋ ءۇشىن دۋش كابينالارى دا جۇمىس ىستەيدى. ءوزىڭىزدىڭ سۇيىكتى تاماق تۇرلەرىنە دە تاپسىرىس بەرسەڭىز بولادى. ءبىر تاڭ قالارلىعى، بارلىعى دا تەگىن. بيزنەس-كلاسس تيپىندەگى بيلەتىڭىزدى كورسەتسەڭىز جەتىپ جاتىر. بارار جولدا دا، قايتار جولدا ءبىز وسى بيزنەس-كلاسس بيلەتىنىڭ بارلىق مۇمكىندىكتەرىن تولىق پايدالانىپ، كومپانيانىڭ اۋە جولاۋشىلارىنا جاسالعان جاعدايىن ءوز باسىمىزدان كەشىرىپ، ءدان رازى بولدىق.
Turkish Airlines كومپانياسى جولسەرىكتەردى تەك اعىلشىن مەن تۇرىك ءتىلىن بىلەتىندەردى عانا ەمەس، ۇشاق قاتىنايتىن ەلدىڭ ءتول ءتىلىن بىلەتىندىگىنە قاراپ تاڭدايدى. سوندا ءتىل بىلمەيتىن ەلدىڭ ازاماتى ءوزىن ەمىن-ەركىن ۇستاپ، قالاعان زاتىنا تاپسىرىس بەرەدى، جولاۋشى ۇسىنىس-تىلەكتەرى مەن سۇراقتارىنا ءوز ويىنداعىداي جاۋاپ الۋعا تولىقتاي مۇمكىندىك الادى. ءبىز وتىرعان بيزنەس-كلاسستا قازاق جانە ورىس تىلدەرىن جەتىك بىلەتىن جولسەرىكتەر قىزمەت كورسەتىپ ءجۇردى. بۇنىڭ ءبارىن اۋە كومپانياسىنىڭ ۇزاق جىلدار بويى جەتىلدىرگەن تاجىريبەسى دەپ قانا ەمەس، ءوز باسەكەلەس اۋە كومپانيالارىنان باسىپ وزار ارتىقشىلىعى دەپ باعالار ەدىك.
Turkish Airlines – زاماناۋي تەحنولوگيالاردىڭ مۇمكىندىكتەرىن تولىق پايدالانا بىلەتىن، جولاۋشىلار تاسىمالداۋدا بارىنشا زامان تالاپتارىنا ساي جەتىستىكتەردى قولدانا الاتىن بىرەگەي كومپانيا. ول قولجەتىمدى بيلەتتەرىمەن قاتار ول ءوز تۇتىنۋشىلارىنا بارىنشا جاعداي جاساۋعا تىرىساتىندىعىمەن-اق حالىق ىقىلاسىنا بولەنىپ وتىر.
ارمان سەرىكۇلى،
الماتى - ستامبۇل - الماتى.
