تۇركيا ۋكراينانى قىرىمدى "قايتارۋ" تۋرالى كەلىسسوزدەر باستاماسىندا قولدادى. بۇل تۋرالى ەلدىڭ سىرتقى ىستەر ءمينيسترى مەۆليۋت چاۆۋشوگلۋ ۋكراينالىق ارىپتەسى دميتري كۋلەبامەن كەزدەسكەن سوڭ Twitter پاراقشاسىندا جازدى، - دەپ حابارلايدى “ادىرنا” ۇلتتىق پورتالى “Lenta.ru”-عا سىلتەمە جاساپ.
تۇرىك ديپلوماتى ارىپتەسىمەن كەزدەسۋگە قاناعاتتانعانىن دا اتاپ ءوتتى. چاۆۋشوگلۋ كيەۆ پەن انكارا قارىم-قاتىناستى، اسىرەسە اسكەري ىنتىماقتاستىق پەن قورعانىس ونەركاسىبى سالاسىنداعى قاتىناستاردى نىعايتاتىنىنا توقتالدى.
16 قازاندا تۇركيا پرەزيدەنتى رەجەپ تايىپ ەردوعان ۋكراينالىق ارىپتەسى ۆلاديمير زەلەنسكيمەن وتكەن ءباسپاسوز ءماسليحاتىندا تۇركيا ۋكراينانىڭ اۋماقتىق تۇتاستىعىن ساقتاي وتىرىپ، رەسەيدىڭ قىرىمدى "زاڭسىز اننەكسيالاۋىن" مويىندامايتىنىن ايتتى. ول ۋكراينانى تۇركيانىڭ تۇراقتىلىعى مەن قاۋىپسىزدىگىن قامتاماسىز ەتە الاتىن نەگىزگى ەل دەپ سانايتىنىن دا بىلدىرگەن.
23 قىركۇيەكتە زەلەنسكي بۇۇ-دا "قىرىم پلاتفورماسى" تۇجىرىمداماسىن ۇسىنىپ، حالىقارالىق قاۋىمداستىقتىڭ باستاماعا قوسىلۋىن سۇرادى. "بۇل قىرىمدىقتاردىڭ قۇقىقتارىن قورعاۋ جانە تۇبەكتىڭ دەوكۋپاتسياسى بويىنشا حالىقارالىق كۇش-جىگەردى ۇيلەستىرۋ", - دەپ ءتۇسىندىردى ول. قازىرگى ۋاقىتتا ۋكراينا ەۋرووداققا مۇشە ەلدەردىڭ ۇلتتىق ۇكىمەتتەرى دەڭگەيىندە ولاردىڭ باستاماعا قاتىسۋى تۋرالى كەلىسسوزدەر جۇرگىزۋدە.
قىرىم رەسەيدىڭ قۇرامىنا 2014 جىلى ناۋرىزدا وتكەن رەفەرەندۋمنان كەيىن كىردى، سول كەزدە ايماقتىڭ داۋىس بەرگەن تۇرعىندارىنىڭ كوپشىلىگى بۇل شەشىمدى قولدادى. ۋكراينا مەن باتىس ەلدەرى بۇل پلەبيستسيتتىڭ ناتيجەلەرىن مويىنداۋدان باس تارتتى.
فوتو اشىق دەرەككوزدەن الىندى
“ادىرنا” ۇلتتىق پورتالى
