رەسەي ۇكىمەتى قازاقستاننان، بەلورۋسسيادان، مولدوۆادان نەمەسە ۋكراينادان كوشىپ كەلگەندەر ءۇشىن ازاماتتىق الۋ ءراسىمىن ايتارلىقتاي جەڭىلدەتۋدى جوسپارلاپ وتىر.ازاماتتىق الۋدى بارىنشا جەڭىلدەتكەن كورشىمىزگە ەندىگى جەردە ءوز قانداستارىمىز ۇدەرە كوشىپ كەتپەي مە دەگەن قاۋىپ تە جوق ەمەس. وسى ماسەلەگە بايلانىستى StanRadar.com ءتىلشىسى قازاقستاندىق ساياساتتانۋشى دانيار اشىمباەۆپەن سۇحباتتاسىپتى دەپ حابارلايدى «ادىرنا» ۇلتتىق پورتالى.
مەملەكەتتىك دۋمانىڭ قاراۋىنا ەنگىزىلگەن جاڭا زاڭ جوباسىندا ازاماتتىق الۋ ءۇشىن رەسەيدە بەس جىل بولۋ تۋرالى تالاپتى الىپ تاستاۋ ۇسىنىلادى. سونىمەن قاتار، مۇقابادا ەكى باسى بار بۇركىتى بار پاسپورتقا ۇمىتكەرلەر وزدەرىنىڭ قارجىلىق جاعدايىن دالەلدەۋدىڭ قاجەتى جوق جانە جوعارىدا اتالعان ەلدەردىڭ ءبىرىنىڭ ازاماتىنىڭ پاسپورتىنان باس تارتۋدىڭ قاجەتى جوق.
بۇل وزگەرىستەر ورىس ءتىلدى ازاماتتاردىڭ قازاقستاننان ودان دا كوپ كەتۋىنە اكەلىپ سوقتىرماي ما جانە ولار نۇر-سۇلتان مەن ماسكەۋ اراسىنداعى قارىم-قاتىناستى بۇزباي ما دەگەن ءتىلشىنىڭ سۇراعىنا ساياساتتانۋشى: «جاپپاي كوشى-قون كەزەڭى باياعىدا اياقتالعان. كىم كەتكىسى كەلسە، ول 90-شى جىلدارى كەتىپ قالدى. قازاقستاندا تۇراتىن ورتا جاستاعى وكىلدەر بۇل جەرگە جاقسى بەيىمدەلگەن. ال ءوزىن مەملەكەتتىك قىزمەتتە دە، ءىرى بيزنەستە دە كورمەيتىن جاستار، ونىڭ ىشىندە ەتنوستىق قاتىستىلىعىنا بايلانىستى ادامدار باسقا ەلدەرگە كەتۋى مۇمكىن»،-دەپ جاۋاپ بەرگەن.
سونىمەن قاتار ساياساتتانۋشىنىڭ پايىمىنشا قازاقستاندا ينجەنەرلىك نەمەسە جاراتىلىستانۋ-عىلىم سالاسىندا ءبىلىم الۋدىڭ قيىنداي ءتۇسۋى دە جاستاردىڭ جاپپاي شەتەلگە ءبىلىم ىزدەپ كەتۋىنە تۇرتكى ەكەن. ءبىلىم رەيتينگى بويىنشا تومەنگى ورىنعا جايعاسقان ەلىمىزدە ءبىلىمسىز قالۋ قاۋپى دە باسىم ەكەنىن العا تارتقان اشىمباەۆ رەسەيگە قاراي جاستاردىڭ ءبىلىم الۋعا اعىلاتىنىن زاڭدى قۇبىلىس سانايدى. ال وقۋعا كەتكەندەر سول ەلدە قالىپ كەتۋى بەك مۇمكىن.
«جاستاردىڭ ەلدەن كەتۋىنىڭ ءبىر سەبەبى ءبىلىم سالاسىنداعى رەفورمالاردان جانە الەۋمەتتىك ماسەلەلەرگە تىكەلەي بايلانىستى. وسىدان كەيىن، ارينە رەسەيگە كەتكەندەر ەلگە قايتقىسى كەلمەيدى. بۇل رەسەيدىڭ ەمەس، قازاقستاننىڭ كىناسى. سوعان قاراماستان ميگراتسيا ماسەلەسى بىزدە جامان ەمەس. دەسەك تە، قازاقستانعا ەشكىم جەتىسكەننەن كەلمەيدى. ەلىمىزدە نەگىزىنەن ەتنيكالىق ميگراتسيا باسىم. ال بۇل ادامدار كوبىنەسە ورتا ءبىلىمدى ادامدار. وسىدان كەيىن تەپە-تەڭدىك بۇزىلادى، بولاشاعى بار، ءبىلىمدى جاستارىمىز كەتۋدە، ءبىلىمسىز، تاجىريبەسىز، مەملەكەت ەسەبىنەن ءوزىنىڭ ماتەريالدىق ماسەلەسىن شەشۋدى كوزدەگەن ەتنيكالىق ميگرانتتار كوپتەپ كەلۋدە. راسىن ايتساق، قازاقستان ءومىر سۇرۋگە اسا قولايلى ەمەس ەلگە اينالىپ بارادى»،-دەيدى ساياساتتانۋشى ءوز سۇحباتىندا.
ورىس تىلىنەن اۋدارىپ،
دايىنداعان راۋانا ديماشقىزى.
فوتو اشىق دەرەككوزدەن الىندى.
