بۇرىن ازاماتتىق فورۋمعا 700-800 ادام عانا قاتىسسا، بيىل ەل بويىنشا 10 مىڭ ادام ات سالىستى – ۆيتسە-مينيست.
بۇگىن ورتالىق كوممۋنيكاتسيالار قىزمەتىنىڭ بريفينگدە ءىح ازاماتتىق فورۋمنىڭ الدىن الا قورىتىندىسىن شىعارعان قر اقپارات جانە قوعامدىق دامۋ ۆيتسە-ءمينيسترى بولات تلەپوۆ 23 قاراشادان بەرى فورۋمعا نەشە ادام قاتىسىپ، قانداي جاڭالىقتار بولعانىن ايتىپ بەردى.
جالپى، ۆيتسە-مينيستر اتاپ وتكەندەي، فورۋم ەرتەڭ جابىلادى، سايكەسىنشە، ونىڭ تولىق قورىتىندىسى دا ەرتەڭ جاريا بولىپ، ەندى ءبىر جىلدان كەيىن وتەتىن فورۋمنىڭ ماقسات-مىندەتتەرى دە ەرتەڭ ايقىندالادى.
ازىرگە، بولات تلەپوۆ العاش رەت ونلاين فورماتتا وتكەن فورۋمعا شامامەن 10 مىڭ ادام قاتىسىپ، فورۋم سەسسيالارىن تاماشالادى دەيدى.
«ءتورتىنشى كۇنگە جالعاسقان فورۋمنىڭ قانداي ەرەكشەلىكتەرى بولدى؟ ەڭ ءبىرىنشى، ارينە، فورۋمنىڭ بارلىق ازاماتتار ءۇشىن قولجەتىمدى بولعانى. فورۋمنىڭ سەسسيالارى تاڭعى ساعات 07.00-دەن تۇنگى 00.00-گە دەيىن جالعاستى. بۇرىنعى فورۋمدارعا رەسپۋبليكانىڭ بارلىق ايماعىنان ساناۋلى دەلەگاتتار سايلانىپ، 700-800 ادام عانا قاتىسسا، بيىلعى ونلاين شاراعا شەكتەۋ بولمادى. كەز كەلگەن ادام ونلاين فورماتتا پىكىرتالاستارعا قاتىسىپ، ءوز ويىن ايتۋعا مۇمكىندىك الدى. فورۋمدى بارلىعى 10 مىڭنان استام ادام ونلاين كورىپ، يۋتۋب جەلىسىندە 2 مىڭ ادام، فەيسبۋك الەۋمەتتىك جەلىسىندە 4 مىڭنان اسا ادام فورۋم جۇمىسىمەن تانىسىپ وتىردى»، - دەيدى ۆيتسە-مينيستر.
ونلاين فورۋمنىڭ ەڭ ۇلكەن ناتيجەسى – شالعاي اۋداندارداعى ۇكىمەتتىك ەمەس ۇيىمداردىڭ داۋىسى تىڭدالدى. «وسىعان دەيىن كاسىبي ۇكىمەتتىك ەمەس ۇيىمدار تەك ءىرى قالالاردا عانا بار دەگەن تۇسىنىك قالىپتاسقان، ونى بيىلعى فورۋم تولىقتاي جوققا شىعاردى. شالعاي اۋدانداردا دا ورنالاسقان ۇكىمەتتىك ەمەس ۇيىمدار قاتىسىپ جاتىر. جاي عانا فورۋمعا قاتىسىپ قويماي، ءوز تاجىريبەلەرىمەن ءبولىستى»، - دەيدى ول.
جالپى، ءىح ازاماتتىق فورۋمنىڭ الدىن الا قورىتىندىسىن شىعارساق، فورۋم بارىسىندا 40-تان استام ءتۇرلى فورماتتاعى الاڭدار ۇيىمداستىرىلعان. فورۋمنىڭ ىڭعايلى فورماتى سپيكەرلەر رەتىندە 300-دەن استام ساراپشىنى تارتا وتىرىپ، 12 ورتالىق مەملەكەتتىك ورگاندارعا ۇەۇ-مەن ونلاين كەزدەسۋلەر وتكىزۋ ءۇشىن الاڭ ۇسىنىلعان.
بۇدان وزگە:
- قر ازاماتتىق قوعامدى دامىتۋدىڭ 2030 جىلعا دەيىنگى تۇجىرىمداماسى بەكىتىلدى;
-ۇكىمەتتىك ەمەس ۇيىمدار اراسىندا الەۋمەتتىك كاسىپكەرلىكتى دامىتۋدى ىنتالاندىرۋ بويىنشا جۇمىس جۇرگىزىلدى، «Ozgeris Ustasy» سىيلىعى ۇيىمداستىرىلدى، وسى باعىتتى دامىتۋ باعدارلاماسىنىڭ جوباسى ازىرلەندى;
-ۆولونتەرلەر جىلى اياسىندا بىرقاتار باستامالار مەن
ءىس-شارالار وتكىزىلدى;
-قوعامدىق كەڭەستەردىڭ جۇمىسىن جەتىلدىرۋ جونىندە شارالار قابىلداندى.
ازاماتتىق فورۋمداردىڭ قارارلارى ازاماتتىق سەكتور وكىلدەرىنىڭ ساندىق جانە ساپالىق وسۋىنە دە اسەر ەتتى»، - دەيدى ۆيتسە-مينيستر.
ەركە جومارت،
«ادىرنا» ۇلتتىق پورتالى
