"ۆەرنىي كاپيتال" كومپانيالار توبى مۇحتار ءابليازوۆتىڭ قازاقستاندىق وليگارح "بولات وتەمۇراتوۆتىڭ قامالعانى جانە ونىڭ ۇستىنەن انگليا سوتىنا شاعىم تۇسكەنى" جايلى جازباسىن جوققا شىعاردى.
ءبىر كۇن بۇرىن قۋعىنداعى بيزنەسمەن مۇحتار ءابليازوۆ Facebook پاراقشاسىندا ءبىرىنشى پرەزيدەنت نۇرسۇلتان نازارباەۆتىڭ بۇرىنعى ءىس باسقارۋشىسى ءارى كومەكشىسى بولات وتەمۇراتوۆتىڭ "ۇستالىپ، ەلدەن شىعۋىنا تىيىم سالىنعانىن" جازعان ەدى.
"ينفورمبيۋرو" سايتىنىڭ جازۋىنشا، "ۆەرنىي كاپيتال" ءباسپاسوز قىزمەتى كومپانيانىڭ باستى اكتسيونەرى بولات وتەمۇراتوۆتىڭ ۇستالعانىن تەرىستەپ، ونىڭ نۇر-سۇلتاندا "قوعامدىق ىستەرمەن شۇعىلدانىپ جۇرگەنىن" ايتقان.
دەگەنمەن كومپانيا وتەمۇراتوۆتىڭ "بتا بانك" شاعىمى بويىنشا لوندون سوتىندا جاۋاپكەر ەكەنىن راستاعان، بىراق سوت قۇجاتتارىنان قاتە كەتكەنىن العا تارتقان.
"بۇل شاعىمدى باستاپقىدا 2015 جىلى "بتا بانك" اق مۇحتار ءابليازوۆ پەن ءىلياس حراپۋنوۆتىڭ ۇستىنەن تۇسىرگەن. ىزىنشە جاۋاپكەرلەر ءتىزىمى ۇزارىپ، 2020 جىلى قاراشا ايىندا ولاردىڭ قۇرامىنا بولات وتەمۇراتوۆ پەن ونىڭ بيزنەس-قۇرىلىمىنا كىرەتىن بىرقاتار تۇلعالار ەنگەن. ول شاعىمنىڭ تۇسۋىنە "بتا بانك" پەن زاڭگەرلەرى بەرگەن جالعان قۇجاتتار تۇرتكى بولعان. جاقىن ارادا شاعىمعا بايلانىستى ارىز تۇسىرىلەدى" دەلىنگەن كومپانيا حابارلاماسىندا.
ءابليازوۆتىڭ جازۋىنشا، وتەمۇراتوۆ وزىنە "اكتيۆتەرىن جاسىرۋعا كومەكتەستى" دەگەن كۇدىككە ءىلىنىپ وتىر. ول جازباسىندا قازاقستان ۇلتتىق قاۋىپسىزدىك كوميتەتىنىڭ توراعاسى كارىم ءماسىموۆتىڭ دە ەسىمىن اتاعان.
قازاقستان ۇلتتىق قاۋىپسىزدىك كوميتەتىنىڭ ءباسپاسوز قىزمەتى ازىرگە جاۋاپ بەرمەدى.
بولات وتەمۇراتوۆ – قازاقستانداعى ەڭ اۋقاتتى ادامداردىڭ ءبىرى. Forbes ونىڭ داۋلەتىن 2,8 ملرد دوللارعا باعالاعان. ول ەلدەگى تاۋ-مەتاللۋرگيا، مۇناي-گاز، تەلەكوممۋنيكاتسيا، قارجى قىزمەتى، جىلجىمايتىن مۇلىك سالاسىنداعى اكتيۆتەرگە يە.
قازاقستان بيلىگى ەكس-بانكير ءابليازوۆتى بتا بانكىنىڭ ميللياردتاعان قارجىسىن جىمقىردى دەپ ايىپتايدى.
2009 جىلدان بەرى شەتەلدە تۇرىپ كەلە جاتقان وپپوزيتسيالىق ساياساتكەر مۇحتار ءابليازوۆ وزىنە تاعىلعان ايىپتاردى تولىق جوققا شىعارادى جانە بيلىكتى "اكتيۆ كولەمى جاعىنان ەلدەگى ەڭ ءىرى بانكتى تارتىپ الدى" دەيدى.
نۇر-سۇلتان ونى ەلگە ەكستراديتسيالاۋعا كۇش سالعانىمەن، ناتيجە شىققان جوق. بيىل قازان ايىندا ءابليازوۆ فرانتسيادان ساياسي باسپانا الدى.
2017 جىلى الماتى سوتى مۇحتار ءابليازوۆتى بتا بانكىنىڭ "اقشاسىن جىمقىرۋ ءىسى" بويىنشا كىنالى دەپ تاۋىپ، سىرتتاي 20 جىلعا سوتتاعان.
فوتو اشىق دەرەككوزدەن الىندى
