وليمپيادا: جۇلدە قورى — 1 ميلليون تەڭگە

2495
Adyrna.kz Telegram

نۇر-سۇلتان قالاسىنداعى Astana hub كەشەنىندە «زەردەلى» اقىل-وي دامىتۋ ورتالىعىنىڭ ۇيىمداستىرۋىمەن VI كەزەكتى «التىن ساقا» ماتەماتيكالىق وليمپياداسى ءوتىپ جاتىر.
ءداستۇرلى وليمپيادا «استانا دارىنى» دارىندىلىقتى دامىتۋ جانە پسيحلوگيالىق سۇيەمەلدەۋ ورتالىعىمەن بىرلەسىپ وتكىزىلۋدە.
وسى جىلى كارانتينگە بايلانىستى وليمپيادا ونلاين رەجىمدە ۇيىمداستىرىلدى.
وليمپيادانىڭ اشىلۋىنا «استانا دارىنى» ددجپس ورتالىعىنىڭ ديرەكتورى تۇرسىنوۆ عاجدەمبەك قۋانىشۇلى، «زەردەلى» اقىل-وي دامىتۋ ورتالىعىنىڭ ديرەكتورى ىرىسبەك ءماۋىت ارنايى قاتىسىپ، وقۋشىلارعا ساتتىلىك تىلەدى.
«التىن ساقا» ماتەماتيكالىق وليمپياداسىنىڭ ماڭىزى تۋرالى عاجدەمبەك تۇرسىنوۆ بىلاي دەدى:
– بۇل وليمپيادانىڭ ماقساتى – نۇر-سۇلتان قالاسىنداعى بارلىق مەكتەپ وقۋشىلارى ىشىنەن ماتەماتيكا پانىنە بەيىمدى بالالاردى انىقتاپ، ول بالالارمەن ارى قاراي كەشەندى جۇمىس جاساۋ. جەڭىمپازداردى جىل بويى وقۋ جاتتىقتىرۋ جيىندارىنا شاقىرىپ وتىرۋ. قالاداعى ەڭ ۇزدىك ماتەماتيك مۇعالىمدەرىنىڭ ماستەر كلاستارىنا قاتىستىرۋ، ساباق الۋىن ۇيىمداستىرۋ ارقىلى ولاردىڭ دەڭگەيىن جەتىلدىرۋ».
ال، ونلاين رەجيمدە ءوتىپ جاتقان وليمپيادانىڭ تەحنيكالىق مۇمكىندىگى مەن ۇيىمداستىرۋ جۇمىستارى تۋرالى ىرىسبەك ءماۋىت بىلاي باياندادى:
– بۇل وليمپيادانىڭ تەحنيكالىق مۇمكىندىگى وزگەشە دەۋگە بولادى. شەتەلدىك ەڭ وزىق يننوۆاتسيالىق تەحنولوگيامەن جابدىقتالعان ستۋديادامىزدا ءوتىپ وتىر. تىكەلەي ترانسلياتسيانىڭ ساپاسى، بايلانىس مۇمكىندىگى، عالامتورلىق جىلدامدىعى دا جوعارى دەڭگەيدە. وليمپيادانىڭ اكادەميالىق تازالىعىنا باسا ءمان بەرىلىپ وتىر. ءاربىر سۇراققا بەرىلگەن ۋاقىت – 3 مينۋت. سۇراقتارداعى 6 جاۋاپتىڭ 1, 2, 3 جاۋابى دۇرىس بولۋى مۇمكىن. ۋاقىتىنان كەشىككەن جاۋاپتار قابىلدانبايدى. ال، ىرىكتەلىپ الىنعان ۇزدىكتەردىڭ ءوزى ارنايى كوميسسيا الدىندا ءوز جاۋاپتارىن دالەلدەپ، سىننان وتەدى. بۇل كريتەريلەر قاتىسۋشىلاردىڭ كوشىرۋ، باسقالاردىڭ كومەگىنە جۇگىنۋ ىقتيمالدىعىن بارىنشا تومەندەتەدى.
تەحينكالىق پروتسەس پەن جاۋاپتاردى قاداعالاۋ ءۇشىن، 2 بىردەي ورتالىعىمىزدا 30-دان استام بىلىكتى مەنەدجەر ماماندار جۇمىلدىرىلدى».
«التىن ساقا» باسقا وليمپيادالاردان وزگەشە. وليمپياداعا قاتىسۋ – تەگىن. جانە جەڭىمپاز اتانۋ وڭاي ەمەس! ءوز ءبىلىمىڭ مەن بىلىكتىلىگىڭدى دالەلدەيسىڭ. سونىمەن قاتار، سايىستىڭ تاعى ءبىر وزگەشەلىگى – جەڭىمپازدار قارجىلاي ماراپاتتالادى.
جۇزدەن جۇيرىك شىققان جۇلدەگەرلەر ءۇشىن دەمەۋشىلەر كومەگىمەن جالپى قورى 1 ميلليون تەڭگەنى قۇرايتىن قارجىلاي سىيلىق قاراستىرىلعان.
«التىن ساقا» ولميپياداسى جىل سايىن وتكىزىلىپ كەلەدى. بۇل رەتكى وليمپيادا 6-رەت ءوتىزىلىپ وتىر.

پىكىرلەر