قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا قازاقستانداعى «بۇۇ-ايەلدەر» قۇرىلىمىمەن بىرلەسىپ ەلدە ىسكە اسىرىلعان وتباسىلىق جانە گەندەرلىك ساياسات باعىتىنداعى جوبالاردىڭ بازاسىن قۇرۋ جۇمىسىن قولعا الدى.
«گەندەرلىك جوبالاردىڭ كىتاپحاناسىن» جيناقتاۋداعى باستى ماقسات – وتباسىلىق جانە گەندەرلىك ساياسات جونىندەگى سالادا ىسكە اسىرىلعان بارلىق جوبالاردى جۇيەلەپ، جوبالاردىڭ اشىق بازاسىن قۇرۋ. سونداي-اق جوبالار اراسىنداعى ەڭ ۇزدىك تاجىريبەلەر جايىندا بارلىق مۇددەلى تاراپتارمەن اقپاراتتى ءبولىسىپ، ءوزارا اقپارات الماسۋدى قامتاماسىز ەتۋ.
ەسكە سالا كەتەيىك، ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمى ءلاززات رامازانوۆا بۇۇ باس اسامبلەياسىنىڭ 75-ءشى سەسسياسى كەزىندە ايەلدەردىڭ قۇقىعىن قورعاۋ سالاسىنداعى ۇزدىك تاجىريبەلەر جايىندا اقپاراتپەن شۇعىل الماسا الاتىن ورتاق الاڭ قۇرۋدى ۇسىنعان بولاتىن.
جوبالار بازاسى بارلىق ۇيىمدار مەن بارشا ازاماتتارعا قولجەتىمدى بولۋى ءۇشىن بۇل جيناق ينتەرنەتتە جاريالاناتىن بولادى. وسىلايشا، تاجىريبە جيناقتالىپ، قولدانىسقا تارالۋىنا مۇمكىندىك جاسالماق.
ەڭ ءبىرىنشى كەزەكتە، 2020 جىلدىڭ سوڭىنا دەيىن قازاقستاندا نە بولماسا جالپى وسى وڭىردە حالىقارالىق ۇيىمدار ىسكە اسىرعان جوبالاردى ءبىر جۇيەگە جيناۋ جۇمىسى جۇرگىزىلمەك. ودان كەيىنگى 3-5 جىلدا رەسپۋبليكالىق نەمەسە جەرگىلىكتى بيۋدجەت ەسەبىنەن ىسكە اسىرىلعان جوبالار جايىندا اقپارات جيناقتالادى. ودان كەيىن - ترانسۇلتتىق كومپانيالار ەسەبىنەن جۇزەگە اسىرىلعان جوبالار جايىندا اقپارات جينالاتىن بولادى. سونداي-اق باسقا ەلدەردە ءساتتى جۇزەگە اسىرىلعان گەندەرلىك جوبالارعا قاتىستى اقپاراتتاردى دا جيناۋ جوسپاردا بار.
قازىرگى كەزدە ازيا دامۋ بانكى، يۋنيسەف، ەۋروپالىق قايتا قۇرۋ جانە دامۋ بانكى، ەۋروپا وداعى، دۇنيەجۇزىلىك بانك، پروون، يۋنفپا، «بۇۇ-ايەلدەر» قۇرىلىمى سىندى بەلدى حالىقارالىق ۇيىمدارمەن قاجەتتى ماتەريالداردى جيناۋ جۇمىسى جۇرىپ جاتىر.
«جوبالار كىتاپحاناسىندا» قازاقستاننىڭ 2030 جىلعا دەيىنگى وتباسىلىق جانە گەندەرلىك ساياساتىنىڭ تۇجىرىمداماسىنداعى بارلىق باعىتتار قامتىلاتىن بولادى. ناقتىراق ايتساق:
وتباسى ينستيتۋتىن نىعايتۋ;
وتباسىنا ارنالعان قوسىمشا قىزمەتتەردىڭ ساپاسىن ارتتىرۋ جانە ونىڭ اياسىن كەڭەيتۋ;
رەپرودۋكتيۆتى دەنساۋلىقتى قورعاۋ;
ايەلدەر مەن بالالارعا قاتىستى وتباسىنداعى زورلىق-زومبىلىقتىڭ الدىن الۋ
گەندەرلىك تەڭدىك ينستيتۋتىن نىعايتۋ;
مەملەكەتتىك جانە بيۋدجەتتىك جوسپارلاۋ جۇيەسىنە گەندەرلىك تاسىلدەردى ەنگىزۋ تۇرعىسىنان ساراپتاۋ مەن باعالاۋدى ەنگىزۋ;
ايەلدەرگە قاتىستى زورلىق-زومبىلىقتىڭ الدىن الۋ;
كاسىپكەرلىككە قاجەتتى بارلىق رەسۋرستاردىڭ ەرلەر مەن ايەلدەرگە تەڭ قولجەتىمدى بولۋى;
ەڭبەكپەن قامتاماسىز ەتۋ باعىتىندا ەرلەر مەن ايەلدەرگە تەڭ مۇمكىندىكتىڭ جاسالۋى;
گەندەرلىك تۋرالى اقپاراتتى تۇسىندىرۋ، تاراتۋ;
ايەلدەردىڭ بەيبىتشىلىك پەن قاۋىپسىزدىكتى قامتاماسىز ەتۋگە اتسالىسۋ اياسىن كەڭەيتۋ سىندى باعىتتار قامتىلادى.
سونداي-اق، «جوبالار كىتاپحاناسىن» قۇرۋمەن قاتار بارلىق اقپاراتتاردى جۇيەلەۋ بويىنشا ادىسنامالىق نۇقساۋلىقتار قوسا ازىرلەنەتىن بولادى.
«جوبالار كىتاپحاناسى» ەلدىڭ ءتۇرلى باعىتتارىنىڭ دامۋىنا قاتىستى جىل سايىنعى باياندامالار مەن شولۋلاردى دايىنداۋعا قاجەتتى قۇرال بولاتىنىنا سەنىمدىمىز. سونداي-اق گەندەرلىك جوبالاردىڭ ناتيجەسىن، ونىڭ اقپاراتىن ساپالى تۇردە وڭدەي وتىرىپ، تۇيىتكىلدى ماسەلەلەردى انىقتاۋعا، ولارعا تالداۋ جۇرگىزۋگە جانە ۇتىمدى ۇسىنىستار ازىرلەۋگە اسا قاجەت بولارى ءسوزسىز.
جينالعان اقپارات ءتۇرلى باعىتتار بويىنشا قۇجاتتاردىڭ ادىسنامالىق ورتالىعىن قۇرۋعا، ءبىلىمدى شىڭداۋعا، ساراپشىلاردىڭ وقىتۋعا تاپتىرماس قۇرال بولماق. «جوبالار كىتاپحاناسى» جاڭا گەندەرلىك باستامالاردى جۇزەگە اسىرماس بۇرىن ونىڭ وسىعان دەيىنگى باعدارلامالاردى قايتالاماي، قايتا ونى تولىقتىرىپ وتىرۋىنا دا اسا قاجەت. ال بۇل قاراجاتتى ۇنەمدەپ، تيىمدىلىكتى ارتتىرۋعا اسەر ەتەرى ءسوزسىز.
