«Genderlik jobalardyń kitaphanasy» jasalynbaq

2213
Adyrna.kz Telegram

QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa Qazaqstandaǵy «BUU-Áıelder» qurylymymen birlesip elde iske asyrylǵan otbasylyq jáne genderlik saıasat baǵytyndaǵy jobalardyń bazasyn qurý jumysyn qolǵa aldy.

«Genderlik jobalardyń kitaphanasyn» jınaqtaýdaǵy basty maqsat – otbasylyq jáne genderlik saıasat jónindegi salada iske asyrylǵan barlyq jobalardy júıelep, jobalardyń ashyq bazasyn qurý. Sondaı-aq jobalar arasyndaǵy eń úzdik tájirıbeler jaıynda barlyq múddeli taraptarmen aqparatty bólisip, ózara aqparat almasýdy qamtamasyz etý.

Eske sala keteıik, Áıelder isteri jáne otbasylyq-demografııalyq saıasat jónindegi ulttyq komıssııa tóraıymy Lázzat Ramazanova  BUU Bas asambleıasynyń 75-shi sessııasy kezinde áıelderdiń quqyǵyn qorǵaý salasyndaǵy úzdik tájirıbeler jaıynda aqparatpen shuǵyl almasa alatyn ortaq alań qurýdy usynǵan bolatyn.

Jobalar bazasy barlyq uıymdar men  barsha azamattarǵa qoljetimdi bolýy úshin bul jınaq  ınternette jarııalanatyn bolady. Osylaısha, tájirıbe jınaqtalyp, qoldanysqa taralýyna múmkindik jasalmaq.

Eń birinshi kezekte, 2020 jyldyń sońyna deıin Qazaqstanda ne bolmasa jalpy  osy óńirde halyqaralyq uıymdar iske asyrǵan jobalardy bir júıege jınaý jumysy júrgizilmek. Odan keıingi 3-5 jylda  respýblıkalyq nemese jergilikti bıýdjet esebinen iske asyrylǵan jobalar jaıynda aqparat jınaqtalady. Odan keıin - transulttyq kompanıalar esebinen júzege asyrylǵan jobalar jaıynda aqparat jınalatyn bolady.  Sondaı-aq basqa elderde  sátti júzege asyrylǵan genderlik jobalarǵa qatysty aqparattardy da  jınaý josparda bar.

Qazirgi kezde Azııa damý banki, IýNISEF, Eýropalyq qaıta qurý jáne damý banki, Eýropa odaǵy, Dúnıejúzilik bank, PROON, IýNFPA,  «BUU-Áıelder» qurylymy syndy beldi halyqaralyq uıymdarmen qajetti materıaldardy jınaý jumysy  júrip jatyr.  

«Jobalar kitaphanasynda»  Qazaqstannyń  2030 jylǵa deıingi otbasylyq jáne genderlik saıasatynyń tujyrymdamasyndaǵy barlyq baǵyttar qamtylatyn bolady. Naqtyraq aıtsaq:

otbasy ınstıtýtyn nyǵaıtý;

otbasyna arnalǵan qosymsha qyzmetterdiń sapasyn arttyrý jáne onyń aıasyn keńeıtý;

reprodýktıvti densaýlyqty qorǵaý;

áıelder men balalarǵa qatysty otbasyndaǵy zorlyq-zombylyqtyń aldyn alý

genderlik teńdik ınstıtýtyn nyǵaıtý;

memlekettik jáne bıýdjettik josparlaý júıesine genderlik tásilderdi engizý turǵysynan saraptaý men baǵalaýdy engizý;

áıelderge qatysty zorlyq-zombylyqtyń aldyn alý;

kásipkerlikke qajetti barlyq resýrstardyń  erler men áıelderge teń qoljetimdi bolýy;

eńbekpen qamtamasyz etý baǵytynda erler men áıelderge  teń múmkindiktiń jasalýy;

genderlik týraly aqparatty  túsindirý, taratý;

áıelderdiń beıbitshilik pen qaýipsizdikti qamtamasyz etýge atsalysý aıasyn keńeıtý syndy  baǵyttar qamtylady.

Sondaı-aq, «Jobalar kitaphanasyn» qurýmen qatar barlyq aqparattardy júıeleý boıynsha Ádisnamalyq nuqsaýlyqtar qosa ázirlenetin bolady.

«Jobalar kitaphanasy» eldiń túrli baǵyttarynyń damýyna qatysty jyl saıynǵy baıandamalar men sholýlardy daıyndaýǵa qajetti qural bolatynyna senimdimiz. Sondaı-aq genderlik jobalardyń nátıjesin, onyń aqparatyn sapaly túrde óńdeı otyryp, túıitkildi máselelerdi anyqtaýǵa, olarǵa taldaý júrgizýge jáne utymdy usynystar ázirleýge asa qajet bolary sózsiz.

Jınalǵan aqparat túrli baǵyttar boıynsha qujattardyń ádisnamalyq ortalyǵyn qurýǵa, bilimdi shyńdaýǵa, sarapshylardyń oqytýǵa taptyrmas qural bolmaq. «Jobalar kitaphanasy» jańa genderlik bastamalardy júzege asyrmas buryn onyń osyǵan deıingi baǵdarlamalardy qaıtalamaı, qaıta ony tolyqtyryp otyrýyna da asa qajet. Al bul qarajatty únemdep, tıimdilikti arttyrýǵa áser eteri sózsiz.

 

Pikirler