بۇگىن «اق جول» پارتياسى الاش كوشباسشىلارىنىڭ ءبىرى مىرجاقىپ دۋلاتۇلىنىڭ تۋعانىنا 135 جىل تولۋىنا وراي «ويان، قازاق!» اتتى ونلاين كونفەرەنتسيا وتكىزدى، دەپ حابارلايدى «ادىرنا» پارتيانىڭ ءباسپاسوز قىزمەتىنە سىلتەمە جاساپ.
كونفەرەنتسياعا پارتيا توراعاسى ازات پەرۋاشەۆ، “الاش” مادەنيەت جانە رۋحاني جاڭعىرۋ ينستيتۋتىنىڭ ديرەكتورى سۇلتان حان اققۇلى، ءماجىلىس دەپۋتاتى بەرىك دۇيسەمبينوۆ، الاشتانۋشى عالىمدار مەن قوعام قايراتكەرلەرى قاتىستى.
كونفەرەنتسيادا مەملەكەتتىك تاريح ينستيتۋتىنىڭ ديرەكتورى، پروفەسسور ەركىن ءابىل، ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى، اكادەميك زيابەك قابىلدينوۆ، بەلگىلى عالىم-الاشتانۋشىلار مارات ابسەمەتوۆ، عاريفوللا انەس، ديحان قامزابەكۇلى، ەربول تىلەشوۆ، امانتاي ءشارىپ، الماسبەك ابسادىقوۆ، سايلاۋباي ەرلان، ساعىمباي جۇماعۇل جانە باسقا دا الاشتانۋشىلار بايانداما جاساپ، كورنەكتى اعارتۋشى، اقىن، جازۋشى، قوعام قايراتكەرى ءارى جالىندى كوسەمسوز شەبەرى م.دۋلاتوۆتىڭ قازاق ادەبيەتىنە قوسقان ۇلەسى مەن ونىڭ تۋىندىلارى جاپون جانە تۇرىك تىلىنە اۋدارىلعانىن تىلگە تيەك ەتتى.
كونفەرەنتسياداعى قورىتىندى سوزىندە ا.پەرۋاشەۆ «”الاشتان” ارتىق ۇلتتىق يدەيا جوق. ءبىز «الاش» ساياسي مۇرالارىن قازاقستاندى جاڭعىرتۋدىڭ ۇلتتىق يدەياسى رەتىندە قارايمىز جانە ولاردىڭ مۇراتتارىن مەملەكەتتىك قۇرىلىستا، ەكونوميكا جانە قوعامدا تاباندىلىقپەن جىلجىتاتىن بولامىز. الاشوردا قايراتكەرلەرى مالىمدەگەندەي قازاقستاننىڭ 20-25 جىلدىڭ ىشىندە ءوزىنىڭ قوعامى مەن ەكونوميكاسىن جاڭعىرتۋعا جانە الەمدە لايىقتى ورنىن الۋعا بارلىق مۇمكىندىگى بار دەگەنىنە سەنەمىز»،-دەدى.
«ادىرنا» ۇلتتىق پورتالى
