25 قاراشادا كۇندىز 20 شاقتى ايەل پارلامەنت عيماراتىنىڭ الدىنا جينالىپ، اشىق حاتقا قول جينادى. ولار مۇگەدەكتىگى بار بالا تاربيەلەپ وتىرعان اتا-انالارعا مەملەكەت تارابىنان تەگىن باسپانا بەرۋدى تالاپ ەتىپ وتىر.
ءماجىلىس توراعاسى نۇرلان نىعماتۋلليننىڭ اتىنا جازىلعان حاتتا ايەلدەر مۇگەدەكتىگى بار ادامداردى مەملەكەت قولداۋى قاجەتتىگى جايلى جازىلعان بىرقاتار زاڭدار مەن ەرەجەلەرگە سۇيەنگەن.
"ماسەلەن، "تۇرعىن ءۇي قاتىناستارى" تۋرالى زاڭنىڭ 13-بابىندا مۇگەدەكتەردىڭ تۇرعىن ءۇيدى تەگىن الۋ قۇقىعى بار ەكەنى كورسەتىلگەن. اتالعان زاڭنىڭ 98-بابىندا وسى زاڭدا بەلگىلەنگەن جاعدايلاردا كوممۋنالدىق تۇرعىن ءۇي قورىنان ۇيلەر جالداۋشىلاردىڭ مەنشىگىنە وتەۋسىز بەرىلەدى دەپ ايتىلعان" دەلىنگەن حاتتا.
حات اۆتورلارى بۇعان قوسا، وزدەرىنىڭ 15-20 جىلدان بەرى باسپانا كەزەگىندە تۇرىپ كەلە جاتقانىن، ماسەلە قانشا ايتىلسا دا، شەشىلمەي كەلە جاتقانىن ايتقان.
- ءبىزدىڭ كوبىمىز 10-15 جىلدان بەرى باسپانا كەزەگىندە تۇرىپ كەلەمىز. ال بالالارى اۋرۋعا شالدىققان اتا-انالارعا پاتەر جالداۋ وتە قيىن. سەبەبى، ونداي بالالارعا ەرەكشە كۇتىم كەرەك. ءبىز جۇمىس ىستەمەيمىز، بالالارىمىزعا قاراۋىمىز كەرەك. يپوتەكانى، پاتەراقىسىن دا تولەي المايمىز، - دەيدى اقمارال ءبىلالوۆا.
ونىڭ سوزىنە قاراعاندا 18 قاراشادا ايەلدەر اكىمدىككە بارعان كەزدە نۇر-سۇلتان قالاسى اكىمىنىڭ ورىنباسارى داۋرەن بابامۇراتوۆ شىعىپ "بۇل ءبىزدىڭ قۇزىرەتىمىزگە كىرمەيدى، بۇل ماسەلە پارلامەنت دەڭگەيىندە شەشىلىپ جاتىر" دەپ پارلامەنتكە بارۋعا مەڭزەگەن.
ايەلدەر جيىنىن ارنايى جاساق وكىلدەرى باقىلاپ تۇر. جاقىن جەردە ءبىرىنشى پرەزيدەنت نۇرسۇلتان نازارباەۆ قاتىسىپ جاتقان "نۇر وتان" سەزى ءوتىپ جاتقاندىقتان اۋماقتا پوليتسەيلەر وتە كوپ.
25 قاراشا تاڭەرتەڭ پوليتسيا ايەلدەر نارازىلىعىن قولداپ، وسىندا كەلمەك بولعان استانالىق بەلسەندى بولاتبەك ءبىلالوۆتى ۇيىنەن ۇستاپ اكەتكەن بولاتىن. پوليتسيا ازىرگە جاۋاپ بەرمەدى.
@azattyq
