"ستاننان" قۇتىلامىز دەپ، ساۋ باسىمىزعا ساقينا تىلەپ المايمىز با؟

1910

«اق جول» دەموكراتيالىق پارتياسىنىڭ XVI سايلاۋالدى قۇرىلتايىندا توراعا ازات پەرۋاشەۆ قازاق رەسپۋبليكاسى اتاۋىن قايتارۋدى ۇسىندى دەپ حابارلايدى  «ادىرنا» ۇلتتىق پورتالى پارتيانىڭ ءباسپاسوز قىزمەتىنە سىلتەمە جاساپ.

قۇرىلتايدى ءسوز العان پارتيانىڭ توراعاسى:«بيىل «الاش» اۆتونومياسىنان باستاۋ الاتىن جانە قازىرگى قازاقستاننىڭ نەگىزىن قالاعان قازاق رەسپۋبليكاسىنا 100 جىل تولدى.

الدىمەن قاتەلەسىپ «قىرعىز» اۆتونوميالىق رەسپۋبليكاسى دەپ اتالىپ، 5 جىلدان كەيىن سۇلتانبەك قوجانۇلى، ساكەن سەيفۋللين، جالاۋ مىڭبايۇلى جانە دە باسقا تۇلعالاردىڭ ارقاسىندا رەسپۋبليكامىزعا ۇلتىمىزدىڭ ءتول اتاۋى قايتارىلدى»، دەدى. سونىمەن قاتار ازات پەرۋاشەۆ وسى ماسەلەگە بايلانىستى پارتيا تاراپىنان جاسالعان ۇسىنىستاردى تىزبەلەي كەلىپ: «وتكەن جىلى «اق جول» دەموكراتيالىق پارتياسى ۇكىمەتكە بۇل تاريحي داتانى رەسمي اتاپ ءوتۋدى جانە «قازاقستان» اتىمەن قاتار، توتاليتارلىق كەڭەس بيلىگىنىڭ ءوزى مويىنداعان «قازاق رەسپۋبليكاسى» اتاۋىن قولدانۋ تۋرالى ماسەلەنى كوتەردى. بۇل باستامانى ش.ءۋاليحانوۆ اتىنداعى تاريح ينستيتۋتى دا قولدادى، بىراق ءبىزدىڭ شەنەۋنىكتەر ءۇنسىز قالدى.سوندا دا ءبىز تاريحي بىرەگەيلىگىمىزدى بىلدىرەتىن قازاق رەسپۋبليكاسى مەملەكەتتىك اتاۋىن قايتارۋدى ءجون دەپ سانايمىز»، دەپ مالىمدەدى.

ازاماتتىق قوعام بەلسەندىسى ەرسايىن بالابەك پارتيانىڭ بۇل ۇسىنىسىمەن كەلىسپەيدى. "مەملەكەتتىڭ اتاۋىن وزگەرتۋ ۇلكەن شارۋا. قازاقستان اتاۋىن وزگەرتەر بولساق، جۇرت قۇجاتتارىن وزگەرتۋى كەرەك. ءبىزدىڭ ەلدە قۇجاتپەن جۇگىرۋدىڭ قانداي ەكەنىن ءبارى بىلەدى. "قازاقستان" دەگەن اتاۋدا تۇرعان نە بار؟ ونىڭ ۇستىنە الەم ءبىزدى "قازاقستان" دەپ تانيدى."ستاننان" قۇتىلامىز دەپ ساۋ باسىمىزعا ساقينا تىلەپ المايىق", -دەيدى ول.

«اق جول» پارتياسىنىڭ بۇل ۇسىنىسىنا قاتىستى تاريحشى دىلماحامبەت بەكتالى: «وتە قاجەت جانە ورىندالۋىن تالاپ ەتەتىن ۇسىنىس. «ستان» ءسوزىنىڭ ماعىناسى تۋرالى تالاي رەت ايتىلدى. ءبىزدىڭ جەرىمىز قازاقتىڭ توپىراعى. سوندىقتان دا «اق جول» پارتياسىنىڭ بۇل «قازاق رەسپۋبليكاسى» اتاۋىن قايتارۋدى سۇراعان ۇسىنىسىنىن قول قولداپ قولدايمىن. ءبىز قازاق رەسپۋبليكاسىنىڭ ازاماتىمىز. تاريحتاعى ساياسي بۇرمالاۋدىڭ سالدارىنان كەتكەن قاتەلىكتى تۇزەيتىن ۋاقىت جەتتى دەپ سانايمىن»،- دەيدى.

وسى ماسەلەگە قاتىستى ءوز پىكىرىن بىلدىرگەن ماگيسترانت عالىمجان بايىمبەت: «كەرەمەت بولار ەدى. مىسالى، شەتەلگە شىعا قالساق، قازاقستاننان كەلدىم دەسەك، كوبىسى ەش تۇسىنە المايدى. پاكىستان، اۋعانستانمەن شاتىستىراتىنى كوپ. كەيدە ارينە، نامىستانىپ تا كەتەسىڭ. قازاق رەسپۋبليكاسى، بولدى، ءبىتتى! وتە ادەمى ەمەس پە؟ ءوز باسىم پارتيانىڭ بۇل باستاماسىن قۇپ كورەمىن. وسى باستامانى تۇتاس قوعام بولىپ قولداۋىمىز كەرەك»،-دەيدى.

قازاقستان اتاۋىمەن قالا بەرگەن دۇرىس پا، الدە قازاق رەسپۋبليكاسى دەپ وزگەرتكەن ءجون بە، ءسىز قالاي ويلايسىز، قۇرمەتتى وقىرمان؟

مەرۋەرت حۋساينوۆا، 

«ادىرنا» ۇلتتىق پورتالى.

فوتو اشىق دەرەككوزدەن الىندى.

پىكىرلەر
ۇقساس جاڭالىقتار