«اق جول» دەموكراتيالىق پارتياسىنىڭ XVI سايلاۋالدى قۇرىلتايىندا توراعا ازات پەرۋاشەۆ باسقارۋ جۇيەسىندەگى كەمشىلىكتەردى اتاپ كورسەتتى، دەپ حابارلايدى «ادىرنا» ۇلتتىق پورتالى پارتيانىڭ ءباسپاسوز قىزمەتىنە سىلتەمە جاساپ.
پارتيانىڭ كەزەكتى قۇرىلتايىندا بايانداما جاساعان ازات پەرۋاشەۆ قوعامداعى ءتۇرلى كەلەڭسىزدىكتەر مەن پروبلەمالارعا كەڭىنەن توقتالىپ، بىلاي دەدى:«مىسالى، COVID-19 پاندەمياسى باستالعاننان بەرى بولىپ جاتقان وقيعالار ۆەرتيكالدى باسقارۋ جۇيەسىنىڭ كەمشىلىكتەرىن اشكەرەلەپ كورسەتتى. ال قوعامدا شيەلەنىسكەن پىكىرتالاستار ەل تاۋەلسىزدىگىنىڭ باستى قاۋىپ-قاتەرلەرىنىڭ اۋقىمىن اشىپ كورسەتتى، ولار:
– بيۋروكراتيا مەن سىبايلاس جەمقورلىق،
– الەۋمەتتىك ادىلەتسىزدىك جانە بايلار مەن كەدەيلەر اراسىنداعى الشاقتىق،
– ەكونوميكا مەن بيلىكتى مونوپوليالاندىرۋ.
جارتى جىلدىق كارانتين كەزىندە حالىقتىڭ تۇرمىسى ناشارلاپ كەتتى. شاعىن جانە ورتا بيزنەس قۇلدىرادى. بيۋدجەت قانا ەمەس، سونداي-اق ۇلتتىق قوردىڭ ترانسفەرتتەرى قازىرگى قاجەتىلىككە جۇمسالىپ، سونىڭ وزىندە تالان-تاراجعا سالىنۋدا. قوعامدا مەملەكەتتىك ينستيتۋتتارعا سەنىمسىزدىك كۇشەيىپ، حالىق بيلىك مونوپولياسىنان قاجي باستادى. ەلىمىزگە الەۋمەتتىك-ەكونوميكالىق سالادا، ساياسي جۇيەگە دە تۇبەگەيلى وزگەرىستەر قاجەت.
اتالعان وزگەرىستەردى تىم سوزا بەرۋدىڭ قاۋىپتىلىگى سوندا، بۇل – ۋكراينا، بەلارۋس پەن قىرعىز ەلىندەي مەملەكەتتىك داعدارىسقا اكەپ سوعۋى مۇمكىن. ال، تاۋەلسىزدىكتىڭ ەڭ باستى كەپىلى قارۋ ەمەس، ءوز مەملەكەتىن سىيلايتىن، باعالايتىن ازاماتتىق قوعام بولۋى كەرەك. سوندىقتان، قازىرگى بيلىك مودەلىنە بىر عانا بالاما بار – ول تەرەڭ الەۋمەتتىك-ەكونوميكالىق جانە ساياسي رەفورمالاردى قابىلداپ، جۇزەگە اسىرۋى قاجەت».
فوتو اشىق دەرەككوزدەن الىندى.
