ماجىلىس دەپۋتاتى، بۇرىنعى قازاقستان حالىقتىق كوممۋنيستىك پارتياسىنىڭ مۇشەسى ۆلاديسلاۆ كوسارەۆ بولەك كوممۋنيستىك پارتيا قۇرامىن دەپ جار سالدى دەپ حابارلايدى «ادىرنا» ۇلتتىق پورتالى كتك تەلەارناسىنا سىلتەمە جاساپ.
«ارىپتەستەرىم پارتيامىزدىڭ اتاۋىنداعى «كوممۋنيستىك» ءسوزىن الىپ تاستاي وتىرىپ، كەشىرۋگە كەلمەيتىن ساياسي قاتەلىك جاسادى. سول ارەكەتتەرىمەن مەنى ساتىپ كەتتى دەسە بولادى. جالپى كوممۋنيستەر پارتياسىنىڭ پارلامەنتكە ەنۋىنە ايانباي تەر توكتىم. ەندى سونى جوققا شىعارماق. ءارى پارلامەنتتەگى ورىندارىنان ايىرىلىپ قالماۋ ءۇشىن، الدەبىرەۋلەرگە ۇنامايتىن كوممۋنيزم سوزىنەن باس تارتىپ وتىر»، -دەيدى قارت كوممۋنيست كوسارەۆ.
ەستەرىڭىزگە سالا كەتەيىك، قازاقستان حالىقتىق كوممۋنيستىك پارتياسى كەزەكتەن تىس سەزىندە اتاۋىن وزگەرتتى. ۇيىم اتاۋىنان “كوممۋنيستىك” ءسوزى الىپ تاستالدى. پارتيا مۇشەلەرىنىڭ باسىم بولىگى رەبرەندينگتى قولداعان. ال ءماجىلىس دەپۋتاتى ۆلاديسلاۆ كوسارەۆ بۇعان ءۇزىلدى-كەسىلدى قارسى.
ايتا كەتسەك، ماجىلىستەگى ەڭ ەگدە دەپۋتات جۋىردا عانا 83-كە تولدى. ماجىلىستەگى “حالىق كوممۋنيستەرى” فراكتسياسىنىڭ مۇشەسى، حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى. ال حالىقتىق پارتيانىڭ حابارلاۋىنشا، كوسارەۆتىڭ وزىنەن پارتيادان شىعۋ تۋرالى رەسمي ءوتىنىش تۇسپەگەن. ەگەر پارتيادان شىعار بولسا، مانداتىنان ايىرىلىپ، ماجىلىستەگى ورنىن بوساتۋعا مىندەتتەلمەك. كوسارەۆتىڭ ءوزى بولسا، جاقتاستارىن جيناپ، جاڭا پارتيا قۇرۋ ىسىنە كىرىسىپ كەتكەن.
«ءتورت-بەس وبلىستا ۇيىمداستىرۋ كوميتەتتەرى جۇمىستارىن باستاپ كەتتى. ولار پارتيا قۇرامىن جاساقتاۋمەن اينالىسىپ جاتىر. بۇل قيىن شارۋا، الدىمىزدا توسقاۋىل كوپ. كوممۋنيستىك پارتيا تاريحىنىڭ ءوزى كۇرەسكە تولى، سوندىقتان دەمالىستى ىسىرىپ تاستاپ، كوممۋنيزم يدەياسىنىڭ ورنىعۋى ءۇشىن كۇش سالامىن»،- دەيدى كوسارەۆ.
كوممۋنيزم، كپسس دەگەندى قازىرگى ۇرپاق تۇسىنبەيدى دە، قابىلدامايدى دا. سەبەبى، وتكەن زاماننىڭ ساياسي ۇستانىمىن قازىرگى جاستارعا تىقپالاۋ مۇمكىن ەمەس. «كوممۋنيزم ەلەسىن قۋعانداردىڭ اقىرى وسىلاي بولارى بەلگىلى ەدى عوي. كوسارەۆ تە سول «ەلەس قۋعانداردىڭ» سوڭعى تۇياعى ىسپەتتەس. ايتپەسە، كوممۋنيزم دەگەن ادام سەنە قوياتىن، قيسىنعا كەلەتىن ساياسي باعىت پا؟ ءبىر كەزدەرى اتالارىمىز بەن اجەلەرىمىز سول كوممۋنيزمدى انە كەلىپ قالادى، مىنە ورناپ قالادى دەۋمەن ومىردەن ءوتتى. سايىپ كەلگەندە، كوممۋنيزم دەگەنىمىز ادام قيالىنداعى قوعامنىڭ ەلەسى عانا دەپ تۇسىنەمىن ءوزىم. كوسارەۆتى ارىپتەستەرىنىڭ شەتتەتۋى دە بەكەر ەمەس شىعار. الگىندەي ەلەس دۇنيەلەردىڭ ەتەگىنە شىرمالعان وتكەن عاسىر ادامىنىڭ تۇسىنىكتەرى قازىرگى جاستاردىڭ پايىمىنا ءدوپ كەلە بەرمەس»، -دەيدى ەشبىر پارتيانىڭ قاتارىنا كىرۋدى ءجون سانامايتىن، شەتەلدە ءبىلىم الىپ جۇرگەن باقىتجان بەردىبەكۇلى. ال، كوممۋنيستەردىڭ كوشىن باستاپ جۇرگەن كوسارەۆتىڭ بۇل كەتىسىن جاسىمەن بايلانىستىرعان زەينەتكەر اۋەلحان شونجان: «سۇيەگى قۋراپ قالعان كوممۋنيزمدى قايتا ءتىرىلتۋ كىمگە كەرەك؟ قازاقستان كەشەگىگە جالتاقتاماي، بۇگىنى مەن ەرتەڭىنە جول سالعان ەلگە ايناۋى كەرەك. كوممۋنيزمدى كۇتكەن ۇرپاقتىڭ سوڭعىسى ءبىز شىعارمىز، ءسىرا. كۇتتىك، ۇمىتتەندىك، بىراق وڭباي الدانىپپىز. الدانعانىمىزدى دا ەندى بىلدىك. كوسارەۆ شاماسى كەلسە، «نۇر وتانعا» قارسىلاس پارتيا قۇرسىنشى. ارينە، قۇرا المايدى. قازىرگى پارتيالاردىڭ ءبارى قۋىرشاقتار عوي. بيلىكتىڭ تاپسىرماسىنان ارىگە اسا المايتىن پارتيالار. كوسارەۆ تە تاعى ءبىر سونداي پارتيانى قۇرار ءارى كەتسە. بىراق ودان نە وزگەرەدى؟ سول باياعى بيلىكتىڭ قولبالاسى بولىپ قالا بەرەدى ەمەس پە؟» دەيدى.
كوممۋنيستىك يدەياعا ادال بولدىم دەيتىنننىڭ ءبىرى كوسارەۆتىڭ كوممۋنيزم كەمەسىنەن بۇلاي ءتۇسىپ قالعانى، ارينە، ۇيات بولعان ەكەن. قانشا دەگەنمەن، ەڭ بولماسا، قارت كوممۋنيستىڭ جاسىن ەسكەرىپ، اينالاسىنداعىلار كوڭىلىن اۋلاي سالسا بولماس پا ەدى دەپ تە ويلايسىڭ. بىراق وتكەن تاريحقا كوز سالساق، سول كوممۋنيستىك يدەولوگيا قازاق دالاسىندا ويران سالعانىنا كوزىڭىز جەتەدى دە، قولدى ءبىر سىلتەيسىز. كوممۋنيست كوسارەۆ قانداي پارتيا قۇرادى، باعىتى قالاي بولادى ونى ۋاقىتى جەتكەندە بىلەرمىز. ال قازىرگى كوممۋنيستەردىڭ ءوز ارىپتەستەرىن بۇلاي شەتتەتۋ ارەكەتىنە قاراپ، بۇلار بيلىك باسىنا قايتا كەلسە، جاعداي قالاي بولىپ كەتەر ەكەن دەگەن سۇراقتىڭ قۇلاعى قىلتيادى.
قارلىعاش بەيبىتقىزى،
«ادىرنا» ۇلتتىق پورتالى.
فوتو اشىق دەرەككوزدەن الىندى.
