Mäjılıs deputaty, būrynǧy Qazaqstan halyqtyq kommunistık partiiasynyŋ müşesı Vladislav Kosarev bölek kommunistık partiia qūramyn dep jar saldy dep habarlaidy «Adyrna» ūlttyq portaly KTK telearnasyna sılteme jasap.
«Ärıptesterım partiiamyzdyŋ atauyndaǧy «kommunistık» sözın alyp tastai otyryp, keşıruge kelmeitın saiasi qatelık jasady. Sol äreketterımen menı satyp kettı dese bolady. Jalpy Kommunister partiiasynyŋ parlamentke enuıne aianbai ter töktım. Endı sony joqqa şyǧarmaq. Ärı parlamenttegı oryndarynan aiyrylyp qalmau üşın, äldebıreulerge ūnamaityn kommunizm sözınen bas tartyp otyr», -deidı qart kommunist Kosarev.
Esterıŋızge sala keteiık, Qazaqstan halyqtyq kommunistık partiiasy kezekten tys sezınde atauyn özgerttı. Ūiym atauynan “kommunistık” sözı alyp tastaldy. Partiia müşelerınıŋ basym bölıgı rebrendingtı qoldaǧan. Al mäjılıs deputaty Vladislav Kosarev būǧan üzıldı-kesıldı qarsy.
Aita ketsek, Mäjılıstegı eŋ egde deputat juyrda ǧana 83-ke toldy. Mäjılıstegı “Halyq kommunisterı” fraksiiasynyŋ müşesı, Halyqaralyq ıster, qorǧanys jäne qauıpsızdık komitetınıŋ müşesı. Al Halyqtyq partiianyŋ habarlauynşa, Kosarevtıŋ özınen partiiadan şyǧu turaly resmi ötınış tüspegen. Eger partiiadan şyǧar bolsa, mandatynan aiyrylyp, mäjılıstegı ornyn bosatuǧa mındettelmek. Kosarevtıŋ özı bolsa, jaqtastaryn jinap, jaŋa partiia qūru ısıne kırısıp ketken.
«Tört-bes oblysta ūiymdastyru komitetterı jūmystaryn bastap kettı. Olar partiia qūramyn jasaqtaumen ainalysyp jatyr. Būl qiyn şarua, aldymyzda tosqauyl köp. Kommunistık partiia tarihynyŋ özı küreske toly, sondyqtan demalysty ysyryp tastap, kommunizm ideiasynyŋ ornyǧuy üşın küş salamyn»,- deidı Kosarev.
Kommunizm, KPSS degendı qazırgı ūrpaq tüsınbeidı de, qabyldamaidy da. Sebebı, ötken zamannyŋ saiasi ūstanymyn qazırgı jastarǧa tyqpalau mümkın emes. «Kommunizm elesın quǧandardyŋ aqyry osylai bolary belgılı edı ǧoi. Kosarev te sol «eles quǧandardyŋ» soŋǧy tūiaǧy ıspettes. Äitpese, kommunizm degen adam sene qoiatyn, qisynǧa keletın saiasi baǧyt pa? Bır kezderı atalarymyz ben äjelerımız sol kommunizmdı äne kelıp qalady, mıne ornap qalady deumen ömırden öttı. Saiyp kelgende, kommunizm degenımız adam qiialyndaǧy qoǧamnyŋ elesı ǧana dep tüsınemın özım. Kosarevtı ärıptesterınıŋ şettetuı de beker emes şyǧar. Älgındei eles dünielerdıŋ etegıne şyrmalǧan ötken ǧasyr adamynyŋ tüsınıkterı qazırgı jastardyŋ paiymyna döp kele bermes», -deidı eşbır partiianyŋ qataryna kırudı jön sanamaityn, şetelde bılım alyp jürgen Baqytjan Berdıbekūly. Al, kommunisterdıŋ köşın bastap jürgen Kosarevtıŋ būl ketısın jasymen bailanystyrǧan zeinetker Äuelhan Şonjan: «Süiegı qurap qalǧan kommunizmdı qaita tırıltu kımge kerek? Qazaqstan keşegıge jaltaqtamai, bügını men erteŋıne jol salǧan elge ainauy kerek. Kommunizmdı kütken ūrpaqtyŋ soŋǧysy bız şyǧarmyz, sırä. Küttık, ümıttendık, bıraq oŋbai aldanyppyz. Aldanǧanymyzdy da endı bıldık. Kosarev şamasy kelse, «Nūr Otanǧa» qarsylas partiia qūrsynşy. Ärine, qūra almaidy. Qazırgı partiialardyŋ bärı quyrşaqtar ǧoi. Bilıktıŋ tapsyrmasynan ärıge asa almaityn partiialar. Kosarev te taǧy bır sondai partiiany qūrar ärı ketse. Bıraq odan ne özgeredı? Sol baiaǧy bilıktıŋ qolbalasy bolyp qala beredı emes pe?» deidı.
Kommunistık ideiaǧa adal boldym deitınnnıŋ bırı Kosarevtıŋ kommunizm kemesınen būlai tüsıp qalǧany, ärine, ūiat bolǧan eken. Qanşa degenmen, eŋ bolmasa, qart kommunistıŋ jasyn eskerıp, ainalasyndaǧylar köŋılın aulai salsa bolmas pa edı dep te oilaisyŋ. Bıraq ötken tarihqa köz salsaq, sol kommunistık ideologiia qazaq dalasynda oiran salǧanyna közıŋız jetedı de, qoldy bır sılteisız. Kommunist Kosarev qandai partiia qūrady, baǧyty qalai bolady ony uaqyty jetkende bılermız. Al qazırgı kommunisterdıŋ öz ärıptesterın būlai şettetu äreketıne qarap, būlar bilık basyna qaita kelse, jaǧdai qalai bolyp keter eken degen sūraqtyŋ qūlaǧy qyltiiady.
Qarlyǧaş BEIBITQYZY,
«Adyrna» ūlttyq portaly.
Foto aşyq derekközden alyndy.Ūqsas jaŋalyqtar
