Májilis depýtaty, burynǵy Qazaqstan halyqtyq kommýnıstik partııasynyń múshesi Vladıslav Kosarev bólek kommýnıstik partııa quramyn dep jar saldy dep habarlaıdy «Adyrna» ulttyq portaly KTK telearnasyna silteme jasap.
«Áriptesterim partııamyzdyń ataýyndaǵy «kommýnıstik» sózin alyp tastaı otyryp, keshirýge kelmeıtin saıası qatelik jasady. Sol áreketterimen meni satyp ketti dese bolady. Jalpy Kommýnıster partııasynyń parlamentke enýine aıanbaı ter tóktim. Endi sony joqqa shyǵarmaq. Ári parlamenttegi oryndarynan aıyrylyp qalmaý úshin, áldebireýlerge unamaıtyn kommýnızm sózinen bas tartyp otyr», -deıdi qart kommýnıst Kosarev.
Esterińizge sala keteıik, Qazaqstan halyqtyq kommýnıstik partııasy kezekten tys sezinde ataýyn ózgertti. Uıym ataýynan “kommýnıstik” sózi alyp tastaldy. Partııa músheleriniń basym bóligi rebrendıngti qoldaǵan. Al májilis depýtaty Vladıslav Kosarev buǵan úzildi-kesildi qarsy.
Aıta ketsek, Májilistegi eń egde depýtat jýyrda ǵana 83-ke toldy. Májilistegi “Halyq kommýnısteri” frakııasynyń múshesi, Halyqaralyq ister, qorǵanys jáne qaýipsizdik komıtetiniń múshesi. Al Halyqtyq partııanyń habarlaýynsha, Kosarevtiń ózinen partııadan shyǵý týraly resmı ótinish túspegen. Eger partııadan shyǵar bolsa, mandatynan aıyrylyp, májilistegi ornyn bosatýǵa mindettelmek. Kosarevtiń ózi bolsa, jaqtastaryn jınap, jańa partııa qurý isine kirisip ketken.
«Tórt-bes oblysta uıymdastyrý komıtetteri jumystaryn bastap ketti. Olar partııa quramyn jasaqtaýmen aınalysyp jatyr. Bul qıyn sharýa, aldymyzda tosqaýyl kóp. Kommýnıstik partııa tarıhynyń ózi kúreske toly, sondyqtan demalysty ysyryp tastap, kommýnızm ıdeıasynyń ornyǵýy úshin kúsh salamyn»,- deıdi Kosarev.
Kommýnızm, KPSS degendi qazirgi urpaq túsinbeıdi de, qabyldamaıdy da. Sebebi, ótken zamannyń saıası ustanymyn qazirgi jastarǵa tyqpalaý múmkin emes. «Kommýnızm elesin qýǵandardyń aqyry osylaı bolary belgili edi ǵoı. Kosarev te sol «eles qýǵandardyń» sońǵy tuıaǵy ispettes. Áıtpese, kommýnızm degen adam sene qoıatyn, qısynǵa keletin saıası baǵyt pa? Bir kezderi atalarymyz ben ájelerimiz sol kommýnızmdi áne kelip qalady, mine ornap qalady deýmen ómirden ótti. Saıyp kelgende, kommýnızm degenimiz adam qııalyndaǵy qoǵamnyń elesi ǵana dep túsinemin ózim. Kosarevti áriptesteriniń shettetýi de beker emes shyǵar. Álgindeı eles dúnıelerdiń etegine shyrmalǵan ótken ǵasyr adamynyń túsinikteri qazirgi jastardyń paıymyna dóp kele bermes», -deıdi eshbir partııanyń qataryna kirýdi jón sanamaıtyn, shetelde bilim alyp júrgen Baqytjan Berdibekuly. Al, kommýnısterdiń kóshin bastap júrgen Kosarevtiń bul ketisin jasymen baılanystyrǵan zeınetker Áýelhan Shonjan: «Súıegi qýrap qalǵan kommýnızmdi qaıta tiriltý kimge kerek? Qazaqstan keshegige jaltaqtamaı, búgini men erteńine jol salǵan elge aınaýy kerek. Kommýnızmdi kútken urpaqtyń sońǵysy biz shyǵarmyz, sirá. Kúttik, úmittendik, biraq ońbaı aldanyppyz. Aldanǵanymyzdy da endi bildik. Kosarev shamasy kelse, «Nur Otanǵa» qarsylas partııa qursynshy. Árıne, qura almaıdy. Qazirgi partııalardyń bári qýyrshaqtar ǵoı. Bıliktiń tapsyrmasynan árige asa almaıtyn partııalar. Kosarev te taǵy bir sondaı partııany qurar ári ketse. Biraq odan ne ózgeredi? Sol baıaǵy bıliktiń qolbalasy bolyp qala beredi emes pe?» deıdi.
Kommýnıstik ıdeıaǵa adal boldym deıtinnniń biri Kosarevtiń kommýnızm kemesinen bulaı túsip qalǵany, árıne, uıat bolǵan eken. Qansha degenmen, eń bolmasa, qart kommýnıstiń jasyn eskerip, aınalasyndaǵylar kóńilin aýlaı salsa bolmas pa edi dep te oılaısyń. Biraq ótken tarıhqa kóz salsaq, sol kommýnıstik ıdeologııa qazaq dalasynda oıran salǵanyna kózińiz jetedi de, qoldy bir silteısiz. Kommýnıst Kosarev qandaı partııa qurady, baǵyty qalaı bolady ony ýaqyty jetkende bilermiz. Al qazirgi kommýnısterdiń óz áriptesterin bulaı shettetý áreketine qarap, bular bılik basyna qaıta kelse, jaǵdaı qalaı bolyp keter eken degen suraqtyń qulaǵy qyltııady.
Qarlyǵash BEIBITQYZY,
«Adyrna» ulttyq portaly.
Foto ashyq derekkózden alyndy.
