شىرايلى شىم قالادا تابيعاتتى كوركەمدەپ، تۇرعىندارىنىڭ تىنىسىن اشىپ، كوزدەرىن جايناتا تۇسەتىن تاعى دا ءبىر جاقسى جاڭالىق بولدى. وسىعان دەيىن دە وڭتۇستىك ءوڭىرى جايقالعان تابيعاتى جاعىنان وزگە قالالاردان ەرەكشەلەنىپ تۇرسا، ەندى كوركىنە كورىك قوسا تۇسپەك. سەبەبى، شىمكەنتتە ا.اسقاروۆ اتىنداعى دەندرولوگيالىق ساياباققا 10 دانا قىرعاۋىل قۇسى اكەلىنىپ، ساياباق اۋماعىنا ۇشىرىلدى.
مامانداردىڭ ايتۋىنشا، ساياباقتىڭ فاۋناسىن ۇلعايتىپ، تابيعي ورتانى قالىپتاستىرۋ جانە تەپە-تەڭدىك ساقتاپ قالۋ ءۇشىن بۇل قۇستار سىرداريا-تۇركىستان وڭىرارالىق تابيعي پاركىنەن جەتكىزىلگەن. دەندروساياباق قالانىڭ قاق ورتاسىندا ورنالاسقان «كىشى ورمان» بولىپ ەسەپتەلەدى. سونداي-اق، ەرەكشە قورعالاتىن تابيعي اۋماق مارتەبەسى بەرىلگەن. سوندىقتان وزىنە ءتان تىنىس-تىرىشىلىگىمەن قوسا اڭ-قۇستارى مەن جابايى جانۋارى بولعانى دۇرىس.
قازىرگى تاڭدا ساياباق اۋماعىنداعى 3 گا جاساندى كولدە جابايى اققۋ، قاز، ۇيرەك جەرسىندىرىلگەن. قويناۋىندا بالىقتىڭ بىرنەشە ءتۇرى كەزدەسەدى. سونىمەن قاتار، ساياباقتا 84 قىرعاۋىل، 50 ءتيىن، 23 قويان،10 تاۋس (پاۆلين), 5 جىبەك جانە بەنتامكا تاۋىعى، 4 تسەساركا، 3 تەڭبىل بۇعى، 4 كەر بۇعى، 1 ەرگەجەيلى قوي بار. اتالعان اڭ-قۇستار ارنايى باستىرمالاردا، قورادا جانە ەركىندىكتە جۇرەدى. ولار جەم-شوپپەن تولىق قامتىلعان.
د.امانجولۇلى، شىمكەنت اقپاراتتىق كوممۋنيكاتسيالىق ورتالىقتىڭ كومەگىمەن دايىندالدى
