شىمكەنت قالاسىندا تسيفرلاندىرۋ باعىتىندا بىرقاتار جوبالار جۇزەگە اسىرىلۋدا دەپ حابارلايدى شىمكەنت قالاسى اكىمىنىڭ ءباسپاسوز قىزمەتى
قالا اكىمى مۇرات ايتەنوۆتىڭ توراعالىعىمەن وتكەن جيىندا تسيفرلاندىرۋ باسقارماسىنىڭ باسشىسى اسەت ءابدىراحانوۆ اتقارىلىپ جاتقان جۇمىستار مەن الداعى جوبالاردى باياندادى.
اسەت ماراتۇلىنىڭ ايتۋىنشا، پيلوتتىق رەجيمدە تاۋكە حان داڭعىلىنىڭ 3 قيىلىسىندا (قازىبەك بي، تاشەنوۆ جانە دۋلاتي كوشەلەرىنىڭ قيىلىسى) جول قوزعالىسىن رەتتەيتىن اۆتوماتتاندىرىلعان باعدارشامدار ورناتىلدى. ينتەللەكتۋالدى كولىك جۇيەسى (يتس) قالالىق جولاۋشىلار كولىگى جانە اۆتوموبيل جولدارى باسقارماسىمەن بىرلەسە قولعا الىنىپ وتىر.
وسى جۇمىستاردىڭ ناتيجەسىندە قالادا قيىلىستارداعى كولىك قوزعالىسى تيىمدىلىگى 42-48 %-عا ارتىپ، كەپتەلىستەر سانىنىڭ ازايۋى، وتكىزۋ قابىلەتتىلىگىنىڭ جوعارىلاۋى سىندى وڭ ناتيجەلەرگە قول جەتكىزىلدى.
سونىمەن قاتار جيىن بارىسىندا «اقىلدى ايالدامالار» جوباسى تانىستىرىلدى. باسقارما باسشىسى وسى باعىتتا ۇسىنىستارىن دا جەتكىزدى. اتاپ ايتقاندا، ءار ايالدامادا اقپاراتتىق تاقتا ورناتۋ، قوعامدىق كولىكتىڭ GPS ترەكەرلەرىن 2GIS, Yandex, Open Shymkent قوسىمشالارىمەن بىرىكتىرۋ كوزدەلۋدە. سونداي-اق، ءا. ءابدىراحانوۆ تۇرعىندارعا ىڭعايلى بولۋ ءۇشىن قوعامدىق كولىك كارتالارى مەن Shymkent Bike ۆەلوسيپەد جالعا الۋ جۇيەسىن ينتەگراتسيالاۋ قاراستىرىلىپ جاتقانىن مالىمدەدى.
د.امانجولۇلى.
شىمكەنت قالاسى اكىمىنىڭ ءباسپاسوز قىزمەتى كومەگىمەن دايىندالدى.
