قازاقتىڭ ابىز اقساقالى، تاريح عىلىمدارىنىڭ دوكتورى، اكادەميك-عالىم ءۋاحيت شالەكەنوۆ 96 جاسىندا دۇنيەدەن ءوتتى.
ول 1942-1943 جج. قان مايداندا وق كەشىپ، سوعىسقا قاتىسىپ، وتان الدىنداعى بورىشىن وتەدى. وتستاۆكاداعى پولكوۆنيك. «قىزىل جۇلدىز»، 1- جانە 2-دارەجەلى وتان سوعىسى وردەندەرىمەن ماراپاتتالعان.
اردا تۋعان ازامات ەلگە كەلگەن سوڭ جوعارى ءبىلىم الىپ، سانالى عۇمىرىن قازاقتىڭ عىلىمى مەن بىلىمىنە ارنادى. قازاق تاريحىن تەرەڭ زەردەلەپ، زەرتتەي بىلگەن عالىم قازاقستان رەسپۋبليكاسى گۋمانيتارلىق عىلىم اكادەمياسىنىڭ اكادەميگى (1991). قازاقستان رەسپۋبليكاسىنىڭ (1984) جانە وزبەكستان رەسپۋبليكاسىنىڭ (1984) ەڭبەك سىڭىرگەن عىلىم قايراتكەرى اتاقتارىن الدى. تالاي جىلدارى بويى ءال-فارابي اتىنداعى قازاق ۇلتتىق ۋنيۆەرسيتەتىندە ۇستاز بولىپ، تالاي شاكىرتتىڭ جۇرەگىندەگى شىراعىن جاعا ءبىلدى. سونداي-اق ول قازاق ەتنورگرافيا عىلىمىنىڭ دا نەگىزىن قالاپ، ءارى قاراي تۇرلەنۋىنە جول سىلتەپ بەردى.
ونىڭ 700-دەن استام عىلىمي جاريالانىمى، 30 مونوگرافياسى، وقۋ قۇرالدارى كەلەر ۇرپاققا مۇراعا قالدى.
باتىس وڭىرىندە دۇنيەگە كەلىپ، قاراقالپاقستاندا ءوسىپ، بار عۇمىرىن قازاق جۇرتىنىڭ كوكىرەك كوزىنىڭ اشىلۋىنا، ءتول تاريحىمىزدىڭ تۇگەلدەنۋىنە ارناعان اقساقالدىڭ وتباسىنا، تۋعان-تۋىسىنا، كۇللى قازاق جۇرتىنا قايعىرا كوڭىل ايتامىز!
فوتو اشىق دەرەككوزدەن الىندى
«ادىرنا» ۇلتتىق پورتالى
