Qazaqtyń abyz aqsaqaly, tarıh ǵylymdarynyń doktory, akademık-ǵalym Ýáhıt ShÁLEKENOV 96 jasynda dúnıeden ótti.
Ol 1942-1943 jj. qan maıdanda oq keship, soǵysqa qatysyp, Otan aldyndaǵy boryshyn ótedi. Otstavkadaǵy polkovnık. «Qyzyl Juldyz», 1- jáne 2-dárejeli Otan soǵysy ordenderimen marapattalǵan.
Arda týǵan azamat elge kelgen soń joǵary bilim alyp, sanaly ǵumyryn qazaqtyń ǵylymy men bilimine arnady. Qazaq tarıhyn tereń zerdelep, zertteı bilgen ǵalym Qazaqstan Respýblıkasy Gýmanıtarlyq ǵylym akademııasynyń akademıgi (1991). Qazaqstan Respýblıkasynyń (1984) jáne Ózbekstan Respýblıkasynyń (1984) eńbek sińirgen ǵylym qaıratkeri ataqtaryn aldy. Talaı jyldary boıy ál-Farabı atyndaǵy Qazaq ulttyq ýnıversıtetinde ustaz bolyp, talaı shákirttiń júregindegi shyraǵyn jaǵa bildi. Sondaı-aq ol qazaq etnorgrafııa ǵylymynyń da negizin qalap, ári qaraı túrlenýine jol siltep berdi.
Onyń 700-den astam ǵylymı jarııalanymy, 30 monografııasy, oqý quraldary keler urpaqqa muraǵa qaldy.
Batys óńirinde dúnıege kelip, Qaraqalpaqstanda ósip, bar ǵumyryn qazaq jurtynyń kókirek kóziniń ashylýyna, tól tarıhymyzdyń túgeldenýine arnaǵan aqsaqaldyń otbasyna, týǵan-týysyna, kúlli qazaq jurtyna qaıǵyra kóńil aıtamyz!
Foto ashyq derekkózden alyndy
«Adyrna» ulttyq portaly
