دۋلات اعادىلگە ەسكەرتكىش قويىلدى

4259
Adyrna.kz Telegram

ازاماتتىق بەلسەندى دۋلات اعادىلدىڭ بەيىتىنىڭ باسىنا ەسكەرتكىش قويىلدى. مونۋمەنتتى جۋرناليست تۇراربەك قۇسايىنوۆ ءوز قاراجاتىنا جاساتقان. بەلگىلى ساياساتكەر زاۋرەش باتتالوۆانىڭ  ايتۋىنشا، ەسكەرتىشتىڭ اشىلۋ ءراسىمى 25 قاراشادا ءوتۋى كەرەك بولعان. بىراق دۋلات اعادىلدىڭ ۇلى جانبولاتتىڭ قازاسىنا بايلانىستى اشىلۋ ءراسىمى كەشە وتكەن. 

"كىسى ءولتىرۋ - بۇل قىلمىس. ال ساياسي كوزقاراستارى ءۇشىن ادام ءومىرىن قيۋ - حالىققا قارسى جاسالعان ەش كەشىرىلمەيتىن قاستاندىق.

فوتوسۋرەتتە ءسىز 2020 جىلدىڭ اقپانىندا قر ىشكى ىستەر مينيسترلىگىنىڭ زىندانىندا قازا تاپقان بەلگىلى ازاماتتىق بەلسەندى دۋلات اعادىلدىڭ قۇرمەتىنە جاسالعان ەسكەرتكىش-ءمۇسىندى كورە الاسىز. قازاقستاندىقتاردىڭ كوپشىلىگى دۋلاتتىڭ ءولىمى ونىڭ الەۋمەتتىك-قوعامدىق قىزمەتىمەن بايلانىستى دەپ سانايدى.

بۇل مونۋمەنت قازاقستانداعى پارلامەنتاريزمدى دامىتۋ قورىنىڭ زاڭگەر-ساراپشىسى، قازاقستاندىق ۇكىمەتتىك ەمەس ۇيىمدارى جونىندەگى ادام قۇقىقتارىن قورعاۋ جەلىسىنىڭ مۇشەسى، «دەموس» قوعامدىق بىرلەستىگىنىڭ توراعاسى، حالىقارالىق جۋرناليستەر فەدەراتسياسىنىڭ (IFJ) ءتىلشىسى تۇراربەك قۇسايىنوۆتىڭ باستاماسىمەن جانە جەكە قاراجاتىمەن جاسالدى.

تۇراربەك سونىمەن قاتار "مەن قالاي رۋحاني جاڭعىردىم", "شىرماۋىق", "زۇلمات: شىعىس تۇركىستاننىڭ كۇيرەۋى", "ساياسي رەجيم قۇرباندارى", "ايداھاردىڭ ايلاسى"اتتى كىتاپتاردىڭ اۆتورى.

تۇراربەك قۇسايىنوۆتىڭ بوستاندىقتىڭ سيمۆولى، حالىق باتىرى دۋلات اعادىلگە ەسكەرتكىش جاساۋ تۋرالى باستاماسىن ەڭ العاشقى بولىپ ءبىز قولدادىق. 25 قاراشادا وتەتىن ەسكەرتكىشتىڭ سالتاناتتى اشىلۋىن جوسپارلاعان ەدىك، بىراق وكىنىشكە وراي قايعىلى جاعدايدىڭ ورىن الۋىنا بايلانىستى ەسكەرتكىشتىڭ اشىلۋى بۇگىن دۋلات اعادىلدىڭ ۇلى جانبولاتتى جەر قوينىنا تاپسىرۋ، ياعني جەرلەۋ كۇنى بولدى.

نەلىكتەن قازاقستاندا جازىقسىز ادامدار قىرشىنىنان قيىلىپ جاتىر؟", - دەدى زاۋرەش باتتالوۆا.

"ادىرنا" ۇلتتىق پورتالى

 

پىكىرلەر