ۆولونتەرلىك–قازاقتىڭ قانىندا بار قاسيەت. ال قاسيەتتەن ايىرىلۋ–قاسىرەت. نۇر-سۇلتان قالاسى جاستار ساياساتى ماسەلەلەرى باسقارماسىنىڭ تاپسىرىسىمەن «ادىرنا» ۇلتتىق-ەتنوگرافيالىق بىرلەستىگى» قق-ى «ۆولونتەرلىك باستامالاردى قولداۋ» جوباسى اياسىندا 22 بەلسەندى جاسقا 300 000 تەڭگە كولەمىندە قاراجات تابىستاعان ەدى. ارينە، قاراجات جەكە-باس قاجەتتىلىگىنە ەمەس، قوعامداعى تۇيىتكىلدى ماسەلەلەردى شەشۋگە جۇمسالۋدا. ماسەلەن، شاريموۆ الپامىس ەسىمدى جاس «تازاLIKE» جوباسىن ءساتتى اتقارىپ، جوبا اياسىندا 70 شاقتى ەلوردا تۇرعىندارى تازالىقپەن جۇمىستارىمەن اينالىسىپ، جارىستى. جەڭىمپاز توپتار 1,2,3 دارەجەلى ديپلوممەن جانە باعالى سىيلىقتارمەن ماراپاتتالدى. ناتيجەسىندە قالانىڭ كوركەيۋىنە كوڭىل بولگەن جاستار 2 توننا 40 كگ قوقىس جينادى.
ال كەرىم بەكسىرعاۇلى ەسىمدى جاستىڭ مۇگەدەكتىگى بار بولسا دا، ەلوردا تۇرعىندارىنە تەگىن ماسساج، گيتارا جانە كاراتە ۇيرەتۋدە. ءتىپتى ۇيرەتىپ قانا قويماي مۇمكىندىگى شەكتەۋلى جاندارعا گيتارانى سىيعا دا تارتتى.
ول، ول ما؟ ۇمبەتوۆا نۇردانا «گلينوتەراپيا» اتتى جوبانى قولعا الىپ، الەۋمەتتىك وسال ساناتتاعى 50 بالاقايعا ساز، بالشىق، كەسەكتەن ءتۇرلى قۇمىرا، ىدىس-اياق، ويىنشىقتاردى مۇسىندەۋگە باۋلىپ جاتسا، LIDER.KZ ۇيىمىنىڭ جاستارى جوعالعان ادامداردى ىزدەستىرۋ جانە العاشقى مەديتسينالىق كومەك جۇمىستارىمەن اينالىسۋدا.
ال پولينا شۋت «مەيىرىمدى جۇرەك» جوباسىنىڭ اياسىندا جان-جانۋارلارعا 700 كيللوگرام ازىق الىپ، ءبولىپ بەرىپ قانا قويماي، ناۋقاستانعاندارىنا ەم-شارا دا قولداندى.
ەڭ ۇزدىك جوبانىڭ تاعى ءبىر يەسى 16 جاستاعى مۇرات جاڭگىر – بالالار ءۇيىنىڭ تاربيەلەنۋشىلەرىنە ارناپ تەگىن گيتارا ۇيىرمەسىن وتكىزۋدە. ودان بولەك، ZOOM پلاتفورماسىندا اعىلشىن تىلىنەن دارىستەر دە جۇرگىزۋدە. ەلورداداعى بالالار ءۇيى مەن SOS بالالار اۋىلىندا بولىپ قايتقان ەڭ جاس ۆولونتەر نزم وقۋشىلارىمەن بىرگە ءوز ونەرلەرىن كورسەتىپ، بالالارعا گيتارا اسپاپتارىن تابىستادى.
سالىمگەرەەۆ ايان ەسىمدى جاس ۆولونتەر «قايىرىمدىلىق» جوباسىن ىسكە اسىرىپ، جوبا ناتيجەسىندە از قامتىلعان، تۇرمىستىق جاعدايى مۇشكىل وتباسىلارعا ازىق-تۇلىك، تۇرمىستىق-حيميالىق زاتتار، ءتاتتى-ءدامدى تاعامدارمەن قامتاماسىز ەتتى.
وسى سىندى بىرىنەن ءبىرى وتكەن جوبالار كوزى قاراقتى قاۋىمنىڭ كوڭىلىنە جۇبانىش سىيلارى–اقيقات. ەندەشە اتالعان جوبالارىن الداعى ۋاقىتتا دا اتقارار دەگەن سەنىممەن ەرىكتى تۇردە قوعامدىق ورتادا اقىسىز قىزمەت ەتىپ جۇرگەن جاس ۆولونتەرلەرگە ءسات-ساپار تىلەيمىز!
«ادىرنا» ۇلتتىق پورتالى
