بيىل قازاقستان كاسىپوداقتارىنىڭ قۇرىلعانىنا 30 جىل تولدى. بۇل قوزعالىستىڭ جۇمىسى سوناۋ حح عاسىردا بولعان جۇمىسشىلار كوتەرىلىسىنەن باستاۋ العان ەدى. قازىرگى تاڭدا «قازاقستان رەسپۋبليكاسى كاسىپوداقتار فەدەراتسياسى» رەسپۋبليكالىق كاسىپوداقتار بىرلەستىگى سالالىق كاسىپتىك وداقتاردى جانە اۋماقتىق كاسىپوداقتار بىرلەستىكتەرىن بىرىكتىرەتىن كوممەرتسيالىق ەمەس ۇيىم بولىپ تابىلادى. بۇگىنگىكاسىپوداقتىڭ تىنىس-تىرشىلىگى قانداي؟ «ادىرنا» ۇلتتىق پورتالى وسى سالادا جۇمىس ىستەپ جاتقان بقو كاسىپوداقتار وداعىنىڭ باس مامانى اقەركە شايقىمەن اڭگىمەلەسىپ، بۇگىنگە دەيىن اتقارىلعان جۇمىستار جايلى سۇراپ ءبىلدى.
زاماناۋي قوعام قالىپتاستىرۋدامىز
كاسىپوداقتىڭ نەگىزگى ماقساتى — ەڭبەك داۋلارىن شەشىپ، جۇمىسكەرلەردىڭ مۇددەلەرىن قورعاۋ، حالىقتىڭ ءومىر ءسۇرۋ دەڭگەيىن كوتەرىپ، الەۋمەتتىك كەپىلدىكتى قامتاماسىز ەتۋ. ەلباسىمىزدىڭ ءوزى «جۇمىسشىلار وزدەرىن لايىقتى سەزىنۋلەرى ءۇشىن كاسىپوداقتار قوزعالىسى ءوز بيىگىندە بولۋى ءتيىس» دەپ ايتقان بولاتىن. ۇيىم بۇگىندە زاماناۋي قوعامدى قالىپتاستىرۋ جولىندا قىزمەت ەتىپ كەلەدى.
ەكى ميلليونعا جۋىق مۇشە بار
قازىرگى تاڭدا ەلىمىزدە 22 سالالىق كاسىپوداق، 17 اۋماقتىق كاسىپوداق بىرلەستىكتەرى بار. ونىڭ قۇرامىنا 2 ميلليونعا جۋىق مۇشە كىرەدى. رەسمي ستاتيستيكا بويىنشا، ەلىمىزدەگى جالدامالى جۇمىسشىلار سانى 6 ملن ادام بولسا، سونىڭ 35 پايىزى كاسىپوداق ۇيىمدارىنا مۇشە. جالپى كاسىپوداق ءبىرشاما جۇمىستاردى اتقاردى. اتاپ ايتاتىن بولساق، ەڭبەك كودەكسىن ازىرلەۋ كەزىندە كاسىپوداقتار فەدەراتسياسى 200-دەن استام وزگەرىس ۇسىنىپ، ونىڭ 117-ءسى زاڭعا ەنگىزىلدى. ءبىز ەڭبەك نارىعىنىڭ تيىمدىلىگىن قامتاماسىز ەتۋگە تىرىسامىز. سونداي-اق، وبلىستىق كاسىپوداق كوميتەتىندە كاسىپوداق كادرلارى مەن اكتيۆىن وقىتۋعا كوڭىل ءبولىپ جاتىرمىز.
كاسىپوداقتىڭ جاس بۋىن لەگى قالىپتاسىپ كەلەدى
2020 جىلدىڭ 2 قىركۇيەك كۇنى قازاقستان رەسپۋبليكاسى كاسىپوداقتار فەدەراتسياسىنىڭ 26-شى سەزى وزدىرىلىپ، كاسىپوداق قوزعالىسىنىڭ 2020-2025 جىلدارعا ارنالعان ستراتەگياسى قابىلداندى. بۇل ورايدا "كەلەشەك" جاستار كەڭەسىنىڭ الداعى جوسپارلارى دا ءوزىنىڭ سالالارىن كەڭەيتىپ، قىزمەتتەرىن كۇشەيتپەك. ەندىگى جەردە كەلەشەكتىك جاستار - كاسىپوداقتىڭ قۇرامىنا جاس بۋىننىڭ لەگىن قالىپتاستىرىپ عانا قويماي، سول جاس ماماندارعا قۇقىقتىق باعىت-باعدار بەرىپ، الەۋمەتتىك-اقپاراتتىق قولداۋ كورسەتىپ، جۇمىسشى جاستاردىڭ قوعامداعى بەلسەندىلىكتەرىن ارتتىرۋ شارالارىمەن دە اينالىساتىن بولادى. اتالمىش كاسىپوداق جاستارىنان قۇرالعان بەلسەندى ۇيىمنىڭ ماڭىزدىلىعى ەلىمىزدەگى توتەنشە جاعداي كەزىندە ەرەكشە ءبىلىندى دەسەم ارتىق ايتپاعانىم بولار. باتىس قازاقستان وبلىسى بويىنشا "كەلەشەك" جاستار كەڭەسى 2 اي بويى "تەگىن الەۋمەتتىك دۇكەن" جوباسىن ۇيىمداستىرىپ، وڭىرىمىزدەگى 20 الەۋمەتتىك جاعىنان از قامتىلعان وتباسىلارعا تەگىن ازىق-تۇلىك كارزەڭكەلەرىن ۇلەستىرىپ، كيىم-كەشەك پاكەتتەرىن تابىستاعان بولاتىن. كاسىپوداق جاستارىنىڭ مۇنداي بەلسەندى باستامالارى الداعى ۋاقىتتاردا دا ءوز جالعاسىن تابادى دەپ سەنەمىن.
كاسىپوداققا قالاي مۇشە بولا الامىن؟
كاسىپوداق ۇيىمىنىڭ نەگىزى ەرىكتى تۇردە قۇرىلادى. ەگەر ءسىز جۇمىس ىستەيتىن مەكەمەدە كاسىپوداق ۇيىمى بولماسا، ونى ءوز بەتىڭىزبەن قۇرۋعا مۇمكىندىگىڭىز بار. ال جۇمىس ورىنىڭىزدا باستاۋىش كاسىپوداق ۇيىمى بولسا، كاسىپوداق كوميتەتىنە كاسىپوداققا مۇشەلىككە قابىلداۋ جانە مۇشەلىك كاسىپوداق جارناسىن ۇستاۋ تۋرالى ءوتىنىش جازۋ قاجەت.
قۇقىقتىق كومەك كورسەتۋگە دايىنبىز!
كاسىپوداققا قاتىستى بارلىق سۇراقتار بويىنشا 8(7172) 643481 جانە 643482 نومىرلەرىنە حابارلاسا الاسىز. ەگەر قۇقىقتىق كومەك العىڭىز كەلسە، ەلەكتروندى پوشتامىزعا (legaldep@fprk.kz) حات جازىڭىز.
«ادىرنا» ۇلتتىق پورتالى
