ازات پەرۋاشەۆتىڭ شەكارادا جۇك كولىكتەرىن ەلەكتروندى كەزەككە قوياتىن جوباعا كوڭىلى تولمادى. ەندى بارلىق ولقىلىقتاردى پارتيا توراعاسى ۇكىمەت دەڭگەيىندە كوتەرمەك. سەبەبى، جىل باسىنان بەرى شەكارادا كەزەگىن كۇتكەن جۇك كولىكتەردىڭ سانى ازايار ەمەس، دەپ حابارلايدى قازاقپارات ءتىلشىسى.
بۇگىن الماتى وبلىسىنداعى جۇمىس ساپارى بارىسىندا «اق جول» دەموكراتيالىق پارتياسىنىڭ توراعاسى ازات پەرۋاشەۆ قازاق-قىتاي شەكاراسىنا باردى. ول جەردە «Nur joly» كەدەن بەكەتىندە كەزەكتە تۇرعان جۇرگىزۋشىلەردىڭ شاعىمىن تىڭدادى. بىرنەشە ايدان بەرى سارعايا كەزەكتەرىن كۇتكەن جۇرگىزۋشىلەر ەلەكتروندى كەزەكتىڭ دە جۇمىسى كوڭىلدەرىنەن شىقپاعانىن ايتادى. ياعني، جۇرگىزۋشى كەزەگىنىڭ جىلجىعانىن كورىپ وتىرادى. بىراق ونىڭ الدىندا جانە ودان كەيىن قانداي جۇك كولىكتەردىڭ تۇرعانىن كورە المايدى. ءدال وسى جايت ازاماتتاردىڭ كەزەك دۇرىس ساقتالمايدى دەپ كۇدىگىن تۋدىرعان. قازىردىڭ وزىندە 500-گە جۋىق كولىك كەزەكتە تۇر. شاعىمداردى تىڭداعان ازات پەرۋاشەۆ ماسەلەنى ۇكىمەت دەڭگەيىندە كوتەرەتىنىن جەتكىزدى.
ايتا كەتەيىك، وسىدان ءبىر اي بۇرىن الماتى وبلىسىنداعى «Nur joly» كەدەن بەكەتىندە جۇك كولىكتەرى تولىقتاي ەلەكتروندى كەزەككە قويىلاتىنىن حابارلاعان بولاتىنبىز. پانفيلوۆ اۋدانىنىڭ اكىمدىگى مالىمەتىنشە، بۇل كەزەكپەن «Euro Transit« جشس اينالىسۋدا. ە لىمىزدە پاندەميا باستالعان ساتتەن باستاپ «Nur joly» كەدەن بەكەتىندە جۇك كولىكتەردىڭ ۇزىن-سونار كەزەگى قالىپتاسقان بولاتىن. ءتىپتى كەزەكتە تۇرعان كولىكتەردىڭ ۇزىندىعى 60 شاقىرىمنان استى. ماسەلەنىڭ كۇردەلەنۋىنە قىتاي تاراپىنىڭ كولىكتەردى قابىلداۋدى كۇرت ازايتقانى سەبەپ بولعان.
