Azat Perýashevtyń shekarada júk kólikterin elektrondy kezekke qoıatyn jobaǵa kóńili tolmady. Endi barlyq olqylyqtardy partııa tóraǵasy Úkimet deńgeıinde kótermek. Sebebi, jyl basynan beri shekarada kezegin kútken júk kólikterdiń sany azaıar emes, dep habarlaıdy QazAqparat tilshisi.
Búgin Almaty oblysyndaǵy jumys sapary barysynda «Aq jol» demokratııalyq partııasynyń tóraǵasy Azat Perýashev Qazaq-Qytaı shekarasyna bardy. Ol jerde «Nur joly» keden beketinde kezekte turǵan júrgizýshilerdiń shaǵymyn tyńdady. Birneshe aıdan beri sarǵaıa kezekterin kútken júrgizýshiler elektrondy kezektiń de jumysy kóńilderinen shyqpaǵanyn aıtady. Iaǵnı, júrgizýshi kezeginiń jyljyǵanyn kórip otyrady. Biraq onyń aldynda jáne odan keıin qandaı júk kólikterdiń turǵanyn kóre almaıdy. Dál osy jaıt azamattardyń kezek durys saqtalmaıdy dep kúdigin týdyrǵan. Qazirdiń ózinde 500-ge jýyq kólik kezekte tur. Shaǵymdardy tyńdaǵan Azat Perýashev máseleni Úkimet deńgeıinde kóteretinin jetkizdi.
Aıta keteıik, osydan bir aı buryn Almaty oblysyndaǵy «Nur joly» keden beketinde júk kólikteri tolyqtaı elektrondy kezekke qoıylatynyn habarlaǵan bolatynbyz. Panfılov aýdanynyń ákimdigi málimetinshe, bul kezekpen «Euro Transit« JShS aınalysýda. E limizde pandemııa bastalǵan sátten bastap «Nur joly» keden beketinde júk kólikterdiń uzyn-sonar kezegi qalyptasqan bolatyn. Tipti kezekte turǵan kólikterdiń uzyndyǵy 60 shaqyrymnan asty. Máseleniń kúrdelenýine Qytaı tarapynyń kólikterdi qabyldaýdy kúrt azaıtqany sebep bolǵan.
