قازاقستان رەسپۋبليكاسىنىڭ تۇڭعىش پرەزيدەنتى ن.ءا. نازارباەۆتىڭ جارلىعىمەن قۇرىلعان ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 25 جىلدىعى اياسىندا بۇگىن، 6 قاراشادا جۋرناليستيكا جانە ساياساتتانۋ فاكۋلتەتى ءباسپاسوز جانە باسپا ءىسى كافەدراسىنىڭ ۇيىمداستىرۋىمەن «5ۆ042200–باسپا ءىسى» ماماندىعى بويىنشا cتۋدەنتتەر اراسىندا ءىV رەسپۋبليكالىق پاندىك ونلاين وليمپيادا ءوتتى.
«باسپا ءىسى» ءبىلىم بەرۋ باعدارلاماسى بويىنشا وليمپياداعا قازاقستاننىڭ جوعارى وقۋ ورىندارى عانا ەمەس، رەسەيلىك ستۋدەنتتەر دە باق سىنادى. اتاپ ايتساق، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «ارمانداستار»، «پابليشەرس» (Publishers), «مۇزبالاق»، «قىران»، «فورتۋنا» كوماندالارى. ءال-فارابي اتىنداعى قازاق ۇلتتىق ۋنيۆەرسيتەتىنىڭ قولتاڭبا»، «سوزمەرگەن»، «ءتاستۇيىن»، «بىتىك» كوماندالارى جانە رەسەيدەن قيىرشىعىس فەدەرالدى ۋنيۆەرسيتەتىنىڭ (دالنەۆوستوچنىي فەدەرالنىي ۋنيۆەرسيتەت) «داليزدات» كومانداسى سايىسقا ءتۇستى.
ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ الەۋمەتتىك-مادەني دامۋ جونىندەگى پرورەكتورى، پروفەسسور ديحان قامزابەكۇلى ءداستۇرلى دودانىڭ شىمىلدىعىن اشىپ، ۋنيۆەرسيتەتىمىزدىڭ تاريحى مەن جەتىستىكتەرىنە از-كەم توقتالا كەلە، ايتۋلى شارانىڭ حالىقارالىق دەڭگەيدە وتكىزىلۋ ماڭىزىن تىلگە تيەك ەتتى.
ودان ءارى ءسوز العان ۋنيۆەرسيتەتتىڭ اكادەميالىق ماسەلەلەر دەپارتامەنتى ديرەكتورى بايجۇمان قاشقىنباي بۇگىنگى وليمپيادانىڭ ماقسات-مىندەتىن ايتا كەلە، قاتىسۋشىلارعا ساتتىلىك تىلەدى.
تاعىلىمى تەرەڭ، مازمۇنى باي، جاۋاپكەرشىلىگى جوعارى حالىقارالىق سايىستىڭ ۇيىمداستىرىلۋىنا ۇيىتقى بولىپ، باسشىلىق ەتكەن جۋرناليستيكا جانە ساياساتتانۋ فاكۋلتەتىنىڭ دەكانى، پروفەسسور قايرات ءومىربايۇلى ساق: «1920 جىلى 3 قاراشادا قازاق اسسر-ءى ورتالىق اتقارۋ كوميتەتىنىڭ «قازاق مەملەكەتتىك باسپاسىن قۇرۋ تۋرالى» دەكرەتى قابىلدانعان بولاتىن. ەلىمىزدەگى تۇڭعىش قازاق باسپاسىنىڭ اشىلعانىنا بيىل 100 جىل تولىپ وتىر. وليمپيادانىڭ وسى مەرەكەلىك داتامەن تۇسپا-تۇس كەلۋى بەكەر ەمەس. باسپا ءىسى ماماندىعى بويىنشا وتكىزىلىپ وتىرعان بۇگىنگى حالىقارالىق وليمپيادامىز عاسىر بۇرىنعى باسپا سالاسىنىڭ ءىزىن جاڭاشا جاڭعىرتىپ قانا قويماي، ستۋدەنتتەردىڭ رەداكتورلىق شەبەرلىكتەرىن دامىتۋدى جانە بولاشاق باسپاگەرلەردىڭ جاڭا تەحنولوگيانى مەڭگەرۋ دەڭگەيىن انىقتاۋدى كوزدەيدى. قاتىسۋشىلارعا جەڭىس پەن جەمىس تىلەيمىن!»، - دەدى.
قازاق جانە ورىس تىلىندە وتكىزىلگەن ءىV رەسپۋبليكالىق ونلاين وليمپيادانىڭ ماقساتى – بولاشاق باسپا ءىسى ماماندارىنىڭ كاسىبي قۇزىرەتتىلىگىن دامىتۋ بولاتىن.
باسپا ءىسى ماماندىعىنىڭ ساپاسىن ارتتىرۋدى، تالانتتى، ءبىلىمدى، ۇزدىك ستۋدەنتتەردى انىقتاۋ، ستۋدەنتتەردىڭ وزىندىك وي-كوزقاراسىن قالىپتاستىرۋ، كرەاتيۆتى ويلاۋ قابىلەتىن ارتتىرۋدى ماقسات ەتكەن ءبىلىم بايگەسىنىڭ قازىلار القاسى قۇرامىنا تانىمال تاجىريبەلى باسپاگەرلەر مەن رەداكتورلار بەكىتىلدى.
ولار: ادىلقازىلار القاسىنىڭ توراعاسى - «فوليانت» باسپاسىنىڭ باس ديرەكتورى نۇرلان سارسەنبىۇلى يسابەكوۆ. ادىلقازىلار القاسىنىڭ مۇشەلەرى - «فوليانت» باسپاسىنىڭ باس رەداكتورى الەكساندر يۋرەۆيچ سەروۆ، قر جازۋشىلار وداعىنىڭ نۇر-سۇلتان قالاسى فيليالىنىڭ ديرەكتورى داۋلەتكەرەي كاپۇلى، «كازاحستانسكايا پراۆدا» گازەتىنىڭ باس رەداكتورى اسىل ۇلانۇلى ساعىمبەكوۆ، «كاۋسار» باسپاسىنىڭ ديرەكتورى قۋات قۇرمانسەيىت، «Aيقىن» گازەتى باس رەداكتورىنىڭ ورىنباسارى امانگەلدى قۇرمەت.
بولاشاق باسپاگەرلەردىڭ ءبىلىم بايگەسىن ساناكوۆا سايانا، ءال-فارابي سەرىكوۆ، بايمەنتاەۆ ەراسىل سىندى فاكۋلتەتتىڭ ونەرلى جاستارى انمەن ايشىقتاپ، كۇيمەن كومكەردى.
دارالاردى دارالايتىن ءدۇبىرلى دودا ءىىى تۋردان قۇرالدى.
ءى تۋردا ءار كوماندا وزدەرىنىڭ ۇرانى مەن ەمبلەماسىن سلايد نەمەسە ۆيدەوروليك تۇرىندە تانىستىرسا، ءىى تۋردا «قازىرگى باسپا ءىسى»، «باسپا-رەداكتسيالىق ۇدەرىستىڭ تەحنولوگياسى»، «باسپا ءىسىنىڭ نەگىزدەرى»، «كىتاپتانۋ»، «قازىرگى پوليگرافيالىق تەحنولوگيالار» بويىنشا تەست سۇراقتارىنا جاۋاپ بەردى. ال ءىىى تۋردا سايىسكەر «ۇزدىك ەسسە»، «ۇزدىك رەداكتور» نوميناتسيالارى بويىنشا باقتارىن سىنادى. ياعني، «ۇزدىك ەسسە» نوميناتسياسىندا ءار توپقا «كەزدەيسوق ساندار گەنەراتسياسى» ارقىلى ەسسە تاقىرىپتارى ۇسىنىلىپ، قاتىسۋشىلار گەنەراتسيا ارقىلى تاڭداعان تاقىرىپ بويىنشا ەسسە جازدى. ەسسە جازۋ بارىسىندا قاتىسۋشىلار ۆيدەوكامەرا الدىندا وتىرىپ، قازىلار القاسى قاتىسۋشىلاردىڭ جۇمىس بارىسىن باقىلادى.
«ۇزدىك رەداكتور» نوميناتسياسىندا ۇيىمداستىرۋشىلار تاراپىنان دايىندالعان قاتە ماتىندەردى وڭدەدى. نوميناتسيا بويىنشا جازبا جۇمىستارى ۆيدەوكامەرا الدىندا ورىندالدى.
10 توپ سايىسقان ونلاين-وليمپيادا قورىتىندىسى بويىنشا قازاق بولىمىندە 1 ورىن - قۇرمانسەيىتوۆ سەرىك (ەۇۋ); 2-ورىن - مۇحيتقىزى ديانا (قازۇۋ), بولاتبەك حۋرالاي (ەۇۋ); 3-ورىن - الپىسباي ارۋجان (ەۇۋ), ارالبەك جىبەككە (قازۇۋ) بۇيىردى. ال ۇزدىك ونەر كورسەتكەنى ءۇشىن نۇربەك قوشكەلگەن (قازۇۋ) مەن قۇراقپاەۆا نۇراي (ەۇۋ) ماراپاتتالدى
ال ورىس ءبولىمى بويىنشا 1 ورىندى سلابوسپيتسكايا اناستاسيا (دۆفۋ) مەن ءومىرباي اقبوتا (ەۇۋ); 2 ورىندى ديۋسيۋكەەۆا دانا (ەۇۋ) مەن شەۆەلەۆا الەكساندرا (دۆفۋ), ال 3 ورىندى گريشينا ۆلاديسلاۆا (ەۇۋ) مەن ياكۋشەۆا اننا (دۆفۋ) يەلەندى.
گريشين ۆلاديسلاۆ «ۇزدىك رەداكتور»، ال «ۇزدىك ەسسە» نوميناتسياسىن پوپەنكو كسەني قانجىعالادى.
ال ۇزدىك ونەر كورسەتكەنى ءۇشىن پوپەنكو كسەنيا، كوجەكوۆا سالتانات جانە مۋرات مادينا ماراپاتتالدى.
سايىس بارىسىندا فاكۋلتەت دەكانى قايرات ساق پەن ءباسپاسوز جانە باسپا ءىسى كافەدراسىنىڭ مەڭگەرۋشىسى، دوتسەنت گۇلميرا شايتماعانبەتقىزى اشىربەكوۆا قازىلار القاسى مەن قاتىسۋشىلارعا ايرىقشا العىستارىن ءبىلدىرىپ، ءومىر جولدارىنا ساتتىلىك تىلەدى.
ادىلەتتى، وبەكتيۆتى باعاعا ريزا بولعان قاتىسۋشىلار ۇيىمداستىرۋشى تاراپقا شىنايى لەبىزدەرىن ءبىلدىرىپ، الداعى ۋاقىتتا ءبىلىم بايگەسىنىڭ وفلاين ومىردە جالعاسىن تابۋىنا تىلەكشى بولىپ، تاراستى.
گۇلجازيرا ەرتاسوۆا،
قازاقستان جۋرناليستەر وداعىنىڭ مۇشەسى
