پرەزيدەنت تاپسىرماسىن ورىنداماعاندار جاۋاپقا تارتىلسىن

1876
Adyrna.kz Telegram

«اقجول» پارتياسى تەز ارادا زارداپ شەككەن شاعىن جانە ورتا بيزنەستىڭ نەسيەلەرىن 6% كولەمىندە قايتا قارجىلاندىرۋدى باستاۋدى جانە جولداۋدىڭ ورىندالماۋىنا كىنالىلەردى جازاعا تارتۋدى تالاپ ەتىپ، ارنايى دەپۋتاتتىق ساۋال جولدادى دەپ حابارلايدى «ادىرنا» ۇلتتىق پورتالى پارتيانىڭ ءباسپاسوز قىزمەتىنە سىلتەمە جاساپ.

ءتيىستى دەپۋتاتتىق ساۋالدى بۇگىن ءماجىلىس وتىرىسىندا پارتيا توراعاسى ازات پەرۋاشەۆ جولدادى. قر پرەمەر ءمينيسترىنىڭ، قر ۇلتتىق بانك توراعاسى مەن قارجى نارىعىن رەتتەۋ جانە دامىتۋ اگەنتتىگىنىڭ اتىنا جودانعان ساۋالدا پارتيا جەتەكشىسى: «پرەزيدەنت ق.توقاەۆ بيىلعى جىلى 1 قىركۇيەكتەگى حالىققا جولداۋىندا «ەكونوميكانىڭ زارداپ شەككەن سەكتورلارىندا شاعىن جانە ورتا بيزنەستىڭ بارلىق قولدانىستاعى نەسيەلەرىنىڭ جىلدىق پايىزدىق مولشەرلەمەلەرىن 6%-عا دەيىن مەملەكەتتىك سۋبسيديالاندىرۋ قامتاماسىز ەتۋدى» تاپسىردى. پرەزيدەنت وسى ماقساتتارعا قوسىمشا 200 ملرد تەڭگە بولىنەتىنىن، ال سۋبسيديالاندىرۋ باعدارلاماسىنىڭ جالپى كولەمى 800 ملرد تەڭگەگە دەيىن جەتكىزىلەتىنىن حابارلادى.

بۇل تاپسىرما كاسىپكەرلىك قاۋىمداستىق ورتاسىندا قىزۋ تالقىعا ءتۇستى.

بيىلعى جىلدىڭ پاندەمياعا قارسى كۇرەسپەن بىرگە، اۋىر ەكونوميكالىق داعدارىسقا اينالعان جىل بولعانى ەشكىمگە قۇپيا ەمەس.

«اتامەكەن» ۇلتتىق كاسىپكەرلەر پالاتاسىنىڭ دەرەكتەرى بويىنشا پاندەميا مەن ونىڭ سالدارىنان 1 ملن-نان  استام كاسىپكەر، ياعني تىركەلگەن بيزنەس سۋبەكتىلەرىنىڭ 3/2 زارداپ شەكتى، توتەنشە جاعداي مەن لوكداۋن شەكتەۋلەرىنە بايلانىستى 430 مىڭنان استام كاسىپكەر ءوز قىزمەتىن توقتاتتى، ولاردىڭ باسىم بولىگى ءالى كۇنگە دەيىن كاسىپتەرىن قايتا ىسكە قوسا الماۋدا.

كولىك قىزمەتى، ساۋدا جانە قىزمەت كورسەتۋ سالالارى، تاماقتانۋ، قوناقۇي بيزنەسى، جىلجىمايتىن مۇلىك وپەراتسيالارى جانە باسقالارى ۇلكەن شىعىندارعا ۇشىرادى.

ەستەرىڭىزگە سالا كەتەيىك، «اقجول» دەموكراتيالىق پارتياسىنىڭ فراكتسياسى بيىلعى جىلدىڭ ناۋرىز ايىنان باستاپ ۇكىمەتكە، ۇلتتىق بانككە جانە قارجى نارىعىن رەتتەۋ جانە دامىتۋ اگەنتتىگىنە نەسيەلەردى جاي عانا كەيىنگە قالدىرۋدىڭ جەتكىلىكسىزدىگى، سونداي-اق بانكتەردىڭ ءوز قالاۋى بويىنشا نەسيەلەردى شەگىندىرەتىنى تۋرالى بىرنەشە رەت ساۋال قويعان بولاتىن.

ءبىز نەسيەلەردى بەلگىلى مەرزىمگە ۇزارتقانىمەن، قالعان كەزەڭدە جيناقتالعان تولەمدەردى وتەۋ قاجەتتىلىگىنىڭ تۋىندايتىنىن، بۇل بيزنەستى جەڭىلدەتۋدىڭ ورنىنا ولاردىڭ بورىشتىق جۇكتەمەلەرىنىڭ كۇرت وسۋىنە الىپ كەلەتىنىن بىرنەشە رەت ەسكەرتكەن بولاتىنبىز.

بيىلعى جىلدىڭ 13 تامىزىندا ءبىز داعدارىسقا قارسى شارالار شەڭبەرىندە قابىلدانعان جاڭا تومەندەتىلگەن نەسيەلىك مولشەرلەمەلەر بويىنشا قولدانىستاعى نەسيەلەردى بۇرىنعى بورىشتىق جۇكتەمەلەردى كوشىرمەي قايتا قارجىلاندىرۋدى ۇسىندىق.

سوندىقتان ءبىز پرەزيدەنتتىڭ زارداپ شەككەن شاعىن جانە ورتا بيزنەستىڭ بارلىق نەسيەلەرىن 6% -بەن قايتا قارجىلاندىرۋ تۋرالى تاپسىرماسىن اسا ماڭىزدى جانە ءتيىمدى شارا رەتىندە قابىلدادىق.

وتاندىق كاسىپكەرلەر ءۇشىن بۇرىنعى پايىزدىق مولشەرلەمەلەردىڭ وتە جوعارى ەكەندىگىن جانە وندىرىستىك اينالىمنىڭ اپاتتى تۇردە تومەندەۋىن ەسكەرسەك، قازىرگى جاعدايدا مۇنداي ءىس-شارانىڭ وتە وزەكتى ماسەلەلەردىڭ ءبىرى بولعانىن باتىل ايتا الامىز.

پرەزيدەنت  جولداۋى جاريالانعان كۇننەن بەرى ەكى اي ءوتتى.

الايدا «اقجول» دەموكراتيالىق پارتياسىنا بارلىق وڭىرلەردىڭ كاسىپكەرلەرىنەن كەلىپ تۇسكەن حابارلارعا سۇيەنسەك، وسى ۋاقىتقا دەيىن بىردە-ءبىر وبلىستا نەمەسە قالادا مۇنداي قايتا قارجىلاندىرۋ باستالعان جوق.

كوپ جاعدايدا بانكتەردىڭ فيليالدارى بانكتىڭ باس كەڭسەلەرىنەن تاپسىرمالاردىڭ جوقتىعىنا سىلتەمە جاساپ، كاسىپكەرلەردىڭ ءتيىستى وتىنىشتەرىن قابىلداۋدان باس تارتادى.

ال وتىنىشتەر قابىلدانعان بانكتەردە ولار جاۋاپسىز جاتۋدا.

«دامۋ» قورى مەن دامۋ ينستيتۋتتارى تۋرالى ەشتەڭە ايتقىمىز دا كەلمەيدى، ويتكەنى ولار بۇل شەشىمدەر بويىنشا بانك جۇيەسىنە تاۋەلدى.

«اقجول» دەموكراتيالىق پارتياسىنىڭ فراكتسياسى مەملەكەت باسشىسى تاپسىرمالارىنىڭ بيۋروكراتيالىق اۋرە-سارساڭعا سالىنىپ، مىڭداعان كاسىپكەرلەر كۇيرەۋ الدىندا تۇرعانىنا، ال كاسىپكەرلەردى قولداۋعا بولىنگەن جۇزدەگەن ميللياردتاردىڭ قوزعالىسسىز قالۋىنا جول بەرىلمەۋى كەرەك دەپ سانايدى.

وسىعان بايلانىستى، ءبىز ۇكىمەتتەن، ۇلتتىق بانكتەن جانە قارجى نارىعىن رەتتەۋ جانە دامىتۋ اگەنتتىگىنەن پاندەميادان زارداپ شەككەن بارلىق شاعىن جانە ورتا بيزنەس نەسيەلەرىن شۇعىل تۇردە جانە كىدىرىسسىز 6%-بەن قايتا قارجىلاندىرۋ شارالارىن باستاۋدى سۇرايمىز.

ءبىز، سونداي-اق، پرەزيدەنت جولداۋىنىڭ ورىندالماۋىنا، ونىڭ توقتاتىلۋىنا جول بەرگەن لاۋازىمدى تۇلعالاردى انىقتاۋدى جانە ولاردى جاۋاپكەرشىلىككە تارتۋدى سۇرايمىز" دەدى.

 

پىكىرلەر